Read Oshindonga-Ombiimbeli Ondjapuki EKSODUS 14 Bible Online

EKSODUS 14 - Oshindonga-Ombiimbeli Ondjapuki bible

EKSODUS 14

¹Omuwa okwa lombwele Moses a ti:

²“Lombwela Aaisraeli ya shune ya ka yunge oontanda peelo lyaPi Hahirot pokati kaMigdol nEfuta etiligane, popepi naBaal Zefon.

³Omukwaniilwa ota ka dhiladhila kutya Aaisraeli otaye endagula noshilongo ya kondekwa kombuga.

⁴Otandi ka kukutika omwenyo gwe note ke mu landula, ihe esindano lyandje lyokusinda iita ye otali ka simanekitha ndje. Nena Aayegipiti otaa ka tseya kutya ongame Omuwa.” Aaisraeli oya ningi, ngashika ya lombwelwa.

⁵Omukwaniilwa gwaEgipiti sho a lombwelwa kutya aantu ya yi, ye nomalenga ge oyi itedhulula e taa ti: “Otwa ningi ngiini? Otwe etha Aaisraeli ya ye, e tatu kanitha aapika yetu!”

⁶Omukwaniilwa okwa londo metembakwiita lye, netangakwiita lye oli ilongekidha.

⁷Okwa piti mo nomatembakwiita ge agehe, mwa kwatelelwa mo ngoka omathele gahamano ga simana, taga wilikwa komalenga ge.

⁸Omuwa okwa kukutike omwenyo gwomukwaniilwa e ta landula Aaisraeli mboka ya tembuka mo nomukumo.

⁹Etangakwiita lyAayegipiti, uukambe wawo auhe, omatembakwiita naahingi oye ya landula e taye ya endje mo mpoka ya yunga oontanda pEfuta etiligane popepi naPi Hahirot naBaal Zefon.

¹⁰Aaisraeli sho ya mono omukwaniilwa netangakwiita lye taye ya landula, oya haluka e taa kugile Omuwa ekwatho.

¹¹Oya ti kuMoses: “MuEgipiti kamwa li oombila nani? Owe tu tembudha mo, tu ye tu sile mombuga? Tala nduno shoka wa ningi, sho we tu tk embudha muEgipiti.

¹²Inatu ku lombwela nale kutya etha, tu longele Aayegipiti? Oshoka okukala muupika oku vule okusila mombuga muka.”

¹³Moses okwa yamukula a ti: “Inamu tila! Ikoleleleni ne mu tale ehupitho ndyoka Omuwa te mu hupitha nalyo nena ndjika; oshoka Aayegipiti mboka mwa tala itamu ya mono we sigo aluhe.

¹⁴Omuwa ote mu kondjele, nane omu na okumwena thilu.”

¹⁵Omuwa okwa lombwele Moses a ti: “Omolwashike to kugile ndje ekwatho? Lombwela aantu ya hume ko.

¹⁶Yeluthila ondhimbo yoye kefuta. Omeya otaga ka topoka pokati, nAaisraeli otaa ka enda mefuta puukukutu.

¹⁷Otandi ka kukutika oomwenyo dhAayegipiti notaye ya landulile mo, notandi ka likola esimano mesindano lyandje, sho te sindi omukwaniilwa, aakwiita ye, omatembakwiita ge naahingi ye.

¹⁸Shampa nde ya dhenge, Aayegipiti otaa ka tseya kutya ongame Omuwa.”

¹⁹Omuyengeli gwaKalunga ngoka a li komeho gosheendo shaIsrael, okwa lunduluka e ta yi konima yawo. Oshikogo shomunzile wo osha lundulukile konima yawo,

²⁰sha yi pokati kAayegipiti nAaisraeli. Kombinga yAayegipiti osha ningi omilema, ihe osha minikile Aaisraeli, onkee omatangakwiita inaga wapa okuhedhathana uusiku auhe.

²¹Moses okwa yeluthile okwooko kwe kefuta, Omuwa nokwa tondokitha po efuta lya shunithwa kombepo ondhigu yokuuzilo. Oya pepe uusiku auhe e tayi kutha po omeya, omeya noga thikama. Omeya oga topoka pokati,

²²nAaisraeli oya yi mefuta taa ende puukukutu. Omeya oga thikama ga fa omakuma koombinga noombinga.

²³Aayegipiti oye ya landulile mo mefuta pamwe nuukambe wawo auhe, nomatembakwiita gawo naahingi.

²⁴Ongula yoontundumene Omuwa okwa talele Aayegipiti moshikogo shomulilo noshomunzile e te ya piyaganeke.

²⁵Omagulu gomatemba gawo oga yi montopo noya humu ko nuudhigu. Aayegipiti oya ti: “Omuwa ota kondjele Aaisraeli note tu kondjitha. Tu yeni ontuku.”

²⁶Omuwa okwa lombwele Moses e ta ti: “Yeluthila okwooko kwoye kombanda yefuta, nomeya otaga siikile Aayegipiti nomatembakwiita gawo naahingi.”

²⁷Moses okwa ganeke oshikaha she kombanda yefuta, nopokutenda kweluwa omeya oga shuna kumwe ga kale ngashika shito. Aayegipiti oya kambadhala ye ga ye ontuku, ihe Omuwa okwe ya undulile mefuta.

²⁸Omeya oga shuna kumwe e taga siikile omatembakwiita, aahingi netangakwiita lyAayegipiti alihe ndyoka lya landulile Aaisraeli mefuta; inapa hupa nando ogumwe.

²⁹Aaisraeli oya taaguluka efuta puukukutu pokati komakuma gaali gomeya koombinga noombinga.

³⁰Esiku ndyoka Omuwa okwa hupitha Aaisraeli miikaha yAayegipiti, nAaisraeli oya mono omidhimba dhawo komunkulo gwefuta.

³¹Aaisraeli sho ya mono, Omuwa nkene a dhenge Aayegipiti koonkondo dhe oonene, oya tila Omuwa; oyo noyi itaale Omuwa nomuntu gwe Moses.