Read Oshindonga-Ombiimbeli Ondjapuki EKSODUS 15 Bible Online

EKSODUS 15 - Oshindonga-Ombiimbeli Ondjapuki bible

EKSODUS 15

¹Moses nAaisraeli oyi imbile Omuwa eimbilo ndika tali ti: “Otandi imbile Omuwa, oshoka okwa mono esindano enene; uukambe naakayili yawo okwe ya undulile mefuta.

²Omuwa oye oonkondo dhandje neimbilo lyandje; oye tuu a hupitha ndje. Oye Kalunga kandje, notandi mu tanga, Kalunga katate, notandi mu imbile molwuunene we.

³Omuwa oye ofule; edhina lye Omuwa.

⁴Aakwiita yAayegipiti nomatembakwiita gawo okwe ga umbile mefuta; omalenga gawo ga simana okwe ga dhogele mEfuta etiligane.

⁵Uulefuta we ya siikile; oya ka ningina mo sigo okondaandelo ngomamanya.

⁶Olulyo lwoye, Omuwa, olwa simana noonkondo; olwa tetagula aatondi iintimbu.

⁷Mesimano lyoye enene owa dhenge aatondi yoye; ondjahi yoye ya hwama oye ya lungunitha ya fa iiyagaya.

⁸Owa fudhile efuta, omeya noga thikama; oga thikama ga fa omakuma; ondaandelo yefuta oye ya pontundulu.

⁹Omutondi okwa ti: ‘Etha utale ndi ya landule notandi ya kwata po; otii ka hakana uuyamba, ndi kuthe shoka nda hala; otandi pweya mo egongamwele lyandje, e te kutha po ayihe yawo.’

¹⁰Omuwa, owa fudha lumwe aluke, nAayegipiti ya kulukile mo; oya ningine mo ya fa ooshumbu momeya omatilithi.

¹¹Omuwa, olye ngo e ku fa mokati kookalunga? Olye e ku fa meadhimo nomuuyapuki? Olye ta vulu okulonga iinyengandunge niilongankondo e ku fa?

¹²Owa ganeke okwooko kwoye kwokokulyo, evi nolya nina po aatondi yetu.

¹³Owa dhiginine euvaneko lyoye, owa wilike oshigwana shoka we shi mangulula; koonkondo dhoye owe shi wilike, u shi fale kevi eyapuki.

¹⁴Iigwana oye shi uvu, oyo notayi kakama; Aafilisti oya kwatwa kehaluko.

¹⁵Aawiliki Aaedom oya tila; aalumentu aanankondo yokuMoab otaa kakama; Aakaanana oya kanitha omukumo gwawo.

¹⁶Ehaluko netilo lye ya lambele. Omuwa, oya tala oonkondo dhoye noya pugalala ya kumwa ko, osigo aantu yoye ya piti taa katuka — aantu tuu mboka wa mangulula muupika.

¹⁷Owe ya eta mo e to ya tsike kondundu yoye, ehala ndyoka ngoye, Omuwa, we li ihogololele, li ninge onganda yoye, otempeli ndjoka ngoye mwene we yi tungu.

¹⁸Ongoye, Omuwa, to kala omukwaniilwa aluhe sigo aluhe.”

¹⁹Aaisraeli oye ende mefuta puukukutu. Ihe omatembakwiita gAayegipiti nuukambe wawo naahingi sho ya yi mefuta, Omuwa okwe ya siikile nomeya gefuta.

²⁰Omuhunganeki omukiintu Miriam, omumwayina gwaAaron, okwa kutha okantunda ke, naakulukadhi ayehe oye mu landula taa hiki uuntunda yo taa tembula.

²¹Miriam okwe ya yamukula ti imbi ta ti: “Imbileni Omuwa, oshoka okwa mono esindano enene; uukambe naakayili yawo okwe undulile mefuta.”

²²Moses okwa kutha po Aaisraeli pEfuta etiligane e te ya fala mombuga Shur. Oye ende omasiku gatatu mombuga, ihe inayi itsa nando omeya.

²³Nena oye ya kehala hali ithanwa Mara, ihe omeya gamo omalulu inaa vula nando oku ga nwa. Omolwashoka ehala lya lukwa Mara.

²⁴Aantu oya ngungutulile Moses noya pula ya ti: “Otatu ka nwa shike?”

²⁵Moses okwa galikana Omuwa a pwila po, Omuwa nokwe mu ulukile oshiti shoka e shi umbile momeya, nomeya oga ningi omatoye, taga nuwa. Pehala mpoka Omuwa okwe ya pe iipango, ye yi dhiginine nokwe ya makele.

²⁶Okwa ti: “Ngele otamu vulika kungame shili mokugwanitha shoka tandi shi tala shu uka e tamu dhiginine iipango yandje, nena itandi mu geele ndi mu undulile nando olimwe lyomomahepeko ngoka nde ga undulile Aayegipiti. Ongame Omuwa, ngoka te mu aludha.”

²⁷Esiku lyanofu oye ya kuElim, nkoka kwa li oothithiya omulongo nambali nomilunga omilongo heyali. Oyo noya yungu ontanda yawo pomeya.