Read Oshindonga-Ombiimbeli Ondjapuki EKSODUS 16 Bible Online

EKSODUS 16 - Oshindonga-Ombiimbeli Ondjapuki bible

EKSODUS 16

¹Egongalo alihe lyaIsrael olya zi po puElim nomesiku etimulongo netitano lyomwedhi omutiyali, sho ya zi muEgipiti, oye ya mombuga Sin, ndjoka ya li pokati kaElim naSinai.

²Mombuga moka oya ngungutulile Moses naAaron

³noya ti kuyo: “Otwa hala Omuwa andola e tu dhipagelele muEgipiti. Hwiyaka otwa li hatu kuutumba poombiga dhoonyama niikulya oyindjiyindji ngaashi twa hala. Ne omwe tu tembudha mo, mu tu ete mombuga muka, mu tu sithe kondjala.”

⁴Omuwa okwa lombwele Moses e ta ti: “Ngashingeyi otandi ke mu lokithila iikulya megulu. Aantu naa ye ko esiku kehe, ya ka toole iikulya ya gwanena esiku ndyoka alike. Pamukalo nguka otandi ya makele ndi tale, ngele otaa landula omapukululo gandje.

⁵Mesiku etihamano oye na okweeta mo oyindji lwaali yi vule yesiku limwe, ye yi longekidhe.”

⁶Moses naAaron oya lombwele Aaisraeli ayehe ya ti: “Ongulohi yonena otamu ka tseya kutya Omuwa oye e mu tembudha mo muEgipiti.

⁷Ongula nge kwa shi, otamu ka mona eadhimo lyOmuwa. Okwa uvu omayemato geni, sho tamu mu nyenyetele — eeno, omwe mu tamaneke, oshoka tse otatu gwanitha owala omalombwelo ge.”

⁸Moses okwa ti natango: “Omuwa ote mu pe onyama yokulya ongulohi niikwiila ya gwana ongula, oshoka oku uvu engungutulo lyeni, sho mwe mu ngungutulile. Hatse mwa ngungutulile, aawe, omwa ngungutulile Omuwa.”

⁹Moses okwa lombwele Aaron a ti: “Lombwela egongalo alihe li ye li thikame koshipala shOmuwa, oshoka oku uvu engungutulo lyawo.”

¹⁰Aaron manga tu uvithile egongalo, oye mu pilamene ya taalela kombuga, nohaluka eadhimo lyOmuwa olya holoka moshikogo.

¹¹Omuwa okwa lombwele Moses a ti:

¹²“Ondu uvu omangungutulo gAaisraeli. Ya lombwela kutya peningino lyetango sho taku wiwile, otaa ka mona onyama yokulya, nongula sho kwa shi, otaa ka mona eloolo lyiikwiila. Nena otaa ka tseya kutya ongame Omuwa, ngame oKalunga kawo.”

¹³Ongulohi sho ye ya, okwa zi iimote oyindji noya halakana nontanda, nongula sho kwa shi, okwa li omume ya kunkula nontanda.

¹⁴Omume sho ya kaha, okwa monika uunima uushuushuu wa fa uumuma uunenguni u li pevi. Owa li wa fa oompawe.

¹⁵Aaisraeli sho ye u mono, inaye u tseya noya pulathana ya ti: “Shino oshikwashike?” Moses okwa ti kuyo: “Mbika iikwiila mbyoka Omuwa e mu pe mu lye.

¹⁶Omuwa okwa gandja oshipango tashi ti, shaa ngoka gwomune na gongele shi thike poompumbwe dhe, oshiyelekitho shogomer komuntu kehe maandjawo.”

¹⁷Aaisraeli oye shi ningi, yamwe oya gongele oshindji, nayamwe oshishona.

¹⁸Sho ye shi yeleke, mboka ya gongele oshindji, inaa hupitha ko sha, naamboka ya gongela oshishona, inaa kokota. Shaa ngoka okwa gongele pampumbwe dhe.

¹⁹Moses okwe ya lombwele a ti: “Inamu yi hupithila ongula.”

²⁰Yamwe oye shi ningi, inaa pulakena Moses, e taa hupitha ko sha. Ongula sho kwa shi, oya li yu udha omazinyo noyo ola, Moses nokwe ya geele.

²¹Ongula kehe shaa ngoka okwa gongele shi thike poompumbwe dhe, nomutenya nge gwa tsu, mbyoka ya hupu ko otayi hemukile mevi.

²²Mesiku etihamano oya gongele lwaali yi vule iikulya yesiku limwe, oogomer mbali komuntu kehe. Aawiliki yegongalo ayehe oye ya kuMoses e taye shi mu lombwele,

²³oye nokwe ya lombwele ta ti: “Omuwa okwa gandja oshipango tashi ti kutya ongula esiku eyapuki lyevululuko, lye mu yapulilwa. Telekeni shoka tamu teleke, ne mu pake po shoka tamu paka po nena. Shoka tamu hupitha, shi pungulileni ongula.”

²⁴Oya pungula, ngaashi ya lombwelwa kuMoses, sigo esiku lyongula noinashi yonuka nenge shi ninge omazinyo.

²⁵Moses okwa ti: “Shi lyeni nena, oshoka nena Esabati, esiku lyevululuko lya yapulilwa Omuwa, noitamu ka mona we iikulya pondje yontanda.

²⁶Omu na okugongela iikulya omasiku gahamano, ihe mesiku etiheyali, esiku lyevululuko, itaku kala sha.”

²⁷Mesiku etiheyali yamwe yomaantu oya yi ya ka konge iikulya, ihe inaa mona ko sha.

²⁸Omuwa okwa ti kuMoses: “Sigo uunake aantu taa tindi okuvulika kiipango yandje?

²⁹Dhimbulukweni kutya ongame Omuwa nde mu pe esiku lyevululuko, nomolwashoka mesiku etihamano tandi mu pe aluhe iikulya ya gwana omasiku gaali. Shaa ngoka na kale mpoka a kala mesiku etiheyali, ina za mo maandjawo!”

³⁰Ano aantu inaa longa sha mesiku etiheyali!

³¹Aaisraeli iikulya mbyoka oye yi luku “Omanna.” Oya li ya fa oombuto oonshona oontokele, yi na omulyo gwa fa guumbisikiti womagadhi goonyushi.

³²Moses okwa ti: “Omuwa okwe tu lombwele, tu kuthe ogomer yomanna tu yi pungulile omaluvalo tage ke ya, opo ya mone iikulya mbyoka e tu palutha nayo mombuga, sho e tu tembudha muEgipiti.”

³³Moses okwa ti kuAaron: “Kutha okayo e to tula mo ogomer yu udha omanna. Ka tula koshipala shOmuwa, opo omanna yi pungulilwe omaluvalo getu.”

³⁴Aaron okwe yi tula komeho goshikethahangano, yi pungulwe, ngaashi Omuwa a lombwele Moses.

³⁵Aaisraeli oya lile omanna omimvo omilongo ne, sigo ya thiki mevi lyaKaanan, moka ya tula.

³⁶(Ogomer yimwe oolita 20.)