Read Oshindonga-Ombiimbeli Ondjapuki EKSODUS 19 Bible Online

EKSODUS 19 - Oshindonga-Ombiimbeli Ondjapuki bible

EKSODUS 19

¹Aaisraeli oya zi puRefidim, nomesiku lyotango lyomwedhi omutitatu sho ya tembuka muEgipiti, oye ya mombuga yaSinai. Oya yungu ontanda ponyonga yondundu Sinai,

³Moses nokwa londo kondundu kuKalunga. Omuwa okwe mu ithana kondundu e te mu lombwele, a lombwele Aaisraeli, oluvalo lwaJakob, a tye:

⁴“Omwa mono shoka ngame, Omuwa, nda ningile Aayegipiti, nonkene nde mu humbata, ngaashi ekodhi tali humbata uunimona komawawa galyo, nonde mu eta huka.

⁵Ngashingeyi, ngele otamu vulika kungame e tamu dhiginine ehangano lyandje, otamu ningi aantu yandje mwene. Evi alihe olyandje, ihe ne otamu ka ninga oshigwana shandje sha hogololwa,

⁶oshigwana sha yapulilwa ndje ngame awike, notamu ka ninga onkwaniilwa yaayambi.”

⁷Moses nokwa londoloka e ti ithana aawiliki yoshigwana ya gongale e te ya hokololele ayihe mbyoka Omuwa e mu lombwele.

⁸Nena aantu ayehe oya yamukula kumwe oshita ya ti: “Otatu gwanitha ashihe shoka Omuwa a popi.” Moses okwa fala eyamukulo lyoshigwana kOmuwa.

⁹Omuwa okwa ti kuMoses: “Otandi ke ya kungoye moshikogo oshinene, opo aantu ya uve ndje tandi popi nangoye noye ku itaale.” Moses okwa hokololele Omuwa shoka aantu ya popi.

¹⁰Omuwa okwa ti kuye: “Inda kaantu u ya lombwele, yi iyapule nena nongula omolwelongelokalunga. Naa yoge oonguwo dhawo,

¹¹noyi ilongekidhile esiku lyahela. Mesiku ndyoka otandi kulukile kondundu Sinai montaneho yaantu.

¹²Ninga ongamba ya dhingoloka ondundu, opo aantu yaahe yi taaguluke nando. Ya lombwela, yaa londe kondundu nenge ye yi gume. Ngele pe na ngoka te yi lyata ompadhi, na dhipagwe.

¹³Na dhipagwe nomamanya nenge a yahwe niikuti pwaa na ngoka te mu gumu. Shika nashi ningwe, ngele omuntu nenge oshinamwenyo; nashi dhipagwe. Ihe enkuma ngele lya hikwa, nena aantu naa londe kondundu.”

¹⁴Moses okwa londoloka kondundu e ta lombwele aantu yi ilongekidhile elongelokalunga. Oya yogo oonguwo dhawo,

¹⁵Moses nokwa ti kuyo: “Ilongekidhileni esiku etitatu ne inamu lala naakiintu.”

¹⁶Ongula yesiku etitatu okwa ningi omindundumo noombadhi tadhi shela, oshikogo oshinene osha holoka kondundu, nokwa uvika enkuma tali hikwa tali kugagana. Aantu ayehe montanda oya kala taa kakama kuumbanda.

¹⁷Moses okwe ya piitha mo montanda, ya ka tsakaneke Kalunga, oyo noya thikama ponyonga yondundu.

¹⁸Ondundu ayihe yaSinai oya kala tayi gundumuka olwithi, oshoka Omuwa okwa kulukile ko e li momulilo. Olwithi olwa gundumuka lwa fa olwithi lweziko enenenene, naantu ayehe oya li taa kakama noonkondo.

¹⁹Ewi lyenkuma olya mbololoka nokukugagana pombanda. Moses okwa popi, naKalunga okwe mu yamukula mendundumo.

²⁰Omuwa okwa kulukile kondungu yondundu Sinai e ti ithanene Moses kondungu yondundu. Moses okwa londo,

²¹nOmuwa okwa ti kuye: “Kulukila pohi, u ka londodhe aantu yaa taaguluke ongamba, ye ye yo ya tale ndje. Ngele taye shi ningi, nena oyendji yomuyo otaa si.

²²Nokuli aayambi taa hedha popepi nangame, oye na okwiiyapula, opo ndaahe ya geele.”

²³Moses okwa ti kOmuwa: “Aantu itaa vulu okulonda ko, oshoka owe tu londodha wa ti: ‘Ningila ondundu olugumbo, u yi yapule.’ ”

²⁴Omuwa okwa yamukula a ti: “Kulukila pevi, u ka tale ko Aaron, mu ye naye. Ihe aayambi naantu inaa taaguluka ongamba, ya londe ye ye kungame, ote ningi ndi ya geele.”

²⁵Moses okwa kulukile pevi kaantu e te ya hokololele shoka Omuwa a ti.