Read Oshindonga-Ombiimbeli Ondjapuki EKSODUS 21 Bible Online

EKSODUS 21 - Oshindonga-Ombiimbeli Ondjapuki bible

EKSODUS 21

¹“Longa Aaisraeli oompango ndhika:

²Ngele to landa omupika Omuhebeli, ne ku longele omimvo hamano. Momumvo omutiheyali oku na okumangululwa pwaa na iifuta yasha.

³Ngele okwa ningi omupika gwoye, manga inaa ya mondjokana, ina ya nomukiintu nge ta manguluka, ihe ngele okwa li mondjokana, sho a ningi omupika gwoye, nena na ye nomukadhi.

⁴Ngele omwene gwe te mu pe omukiintu e te mu valele aamati naakadhona, nena omukiintu naanona oyamwene gwe, nomulumentu ota yi awike.

⁵Ihe ngele omupika ota ti, ye oku hole mwene gwe, omukadhi noyana noina hala okumanguluka,

⁶nena mwene gwe ne mu fale kehala lyelongelokalunga e te mu tula pomweelo nenge piikulo yomweelo e tu ulula okutsi kwe noniho. Nena ota kala omupika gwe sigo aluhe.

⁷“Ngele oku na omuntu ta landitha po omwana omukadhona a ninge omupika, ina mangululwa, ngaashi aapika aalumentu haa ningwa.

⁸Ngele okwa landithwa po kungoka e mu hala a ninge omukadhi, ihe ine mu hala we, nena ne mu landithulule po, a shune kuhe; mwene gwe ita vulu oku mu landitha po kaakwiilongo, oshoka okwe mu henge po.

⁹Ngele oku na omuntu ta landa omupika omukiintu, e mu pe omwana, nena na kale naye ngaashi omwana omukadhona.

¹⁰Ngele ope na omuntu tu ushike omukiintu omutiyali, oku na okupa omukadhi gwotango natango iikulya, omizalo nuuthemba mboka a kala nawo nale.

¹¹Ngele ite mu gwanithile mbika itatu, ne mu ethe a ye pwaa na iikahu yasha.”

¹²“Ngele oku na ngoka ta dhenge omuntu e ta si, na dhipagwe.

¹³Ihe ngele oshiponga shohaluka, molwashoka ina dhiladhila a dhipage omuntu, nena ota vulu okufadhuka po, a ye kehala ndyoka tandi mu hogololele nota hupu.

¹⁴Ihe uuna omuntu a geya e ta dhipaga mukwawo owina, na dhipagwe, nonando na ka holame koshiyambelo.

¹⁵“Ngele oku na ngoka ta dhenge he nenge yina, na dhipagwe.

¹⁶“Ngele ope na ngoka ta yaka po omuntu, ashihe shimwe ngele te mu landitha po nenge ta ningi omupika gwe, na dhipagwe.

¹⁷“Ngele oku na ngoka ta tuku he nenge yina, na dhipagwe.

¹⁸“Ngele oku na olugodhi, nagumwe ta dhenge mukwawo nemanya nenge nongonyo, ye ine mu dhipaga, nena ina geelwa. Ngele omudhengwa okwa kala momulalo,

¹⁹nokomeho okwa aluka e ta yi pondje ti itsile koshiti, ngoka e mu dhengele oku na oku mu futila ethimbo lye ndyoka a kanitha noku mu sila oshimpwiyu, sigo a ti po nawa.

²⁰“Ngele oku na ngoka ta kutha oshitago e ta dhenge omupika gwe omulumentu nenge omukiintu, nomupika ta sile miikaha ye, na geelwe.

²¹Ihe ngele omupika ina sa esiku ndyoka nenge konima yomasiku gaali, nena mwene gwe ina geelwa, oshoka oye eliko lye.

²²“Ngele oku na omukiintu omusimba, ndele ela tali gu mo, ye ina mona we oshiponga shilwe, ngoka e mu ehameke na fute, omulume shoka ta pula, nongaashi aatokolihapu ya koleke.

²³Ihe ngele omukiintu mwene oye a si, nena egeelo otali pula omwenyo gu futwe nomwenyo,

²⁴eho okeho, eyego okeyego, oshikaha okoshikaha, ompadhi okompadhi,

²⁵efiko okefiko, oshilalo okoshilalo, ombole okombole.

²⁶“Ngele ope na omuntu ta dhenge omupika gwe omulumentu nenge omukiintu keho e tali tsipuka mo, nena ne mu mangulule omolweho lye.

²⁷Ngele ota kula mo eyego lyomupika, ne mu mangulule omolweyego lye.”

²⁸“Ongombe ngele tayi tsu omuntu e ta si, nayi dhipagwe nomamanya, nonyama yayo inayi liwa, ihe mwene gwayo ina geelwa.

²⁹Ihe ongombe ngele ohayi tsu aantu, namwene okwe shi lombwelwa noine yi edhilila moshili — nena nge tayi tsu omuntu e ta si, nayi dhipagwe nomamanya, ndele namwene gwayo na dhipagwe wo.

³⁰Mwene gwayo ngele okwa ziminwa a fute oshikolo, a hupithe omwenyo gwe, nena na fute omwaalu aguhe gwa pulwa.

³¹Ongombe ngele otayi tsu omumati nenge omukadhona e ta si, osho ngaa tashi ningwa, ngaashi sha tiwa.

³²Ongombe ngele otayi tsu omupika omulumentu nenge omukiintu e ta si, mwene gwayo na fute mwene gwomupika iimaliwa iisiliveli omilongo ndatu, nongombe nayi dhipagwe nomamanya.

³³“Ngele oku na omuntu itaa siikile onyombo, nenge te yi hupu ye ite yi siikile, ndele ongombe nenge okasino taka gwile mo,

³⁴na fute oshimuna shoka. Iimaliwa mbyoka ne yi pe mwene gwasho ye ta kala noshimuna shoka sha sa.

³⁵Ngele ongombe yomuntu tayi tsu ongombe yamukwawo e tayi si, nena aantu ayehe yaali naa landithe po ongombe yi na omwenyo, yo ya topolelathane iimaliwa. Otaa topolelathana wo onyama yongombe ya sa.

³⁶Ihe ngele okwa tseyika kutya ongombe ndjoka ohayi tsana, namwene gwayo ine yi dhiginina, nena na gandje ongombe yi na omwenyo ye a kuthe po ndjoka ya sa.”