Read Oshindonga-Ombiimbeli Ondjapuki EKSODUS 29 Bible Online

EKSODUS 29 - Oshindonga-Ombiimbeli Ondjapuki bible

EKSODUS 29

¹“Nge to yapula Aaron noyana, ya ninge aayambi, oto ningi ngeyi. Oto kutha ongombe ondumentu yomutanda noonzi mbali oondumentu dhaa na oshipwe.

²Kutha osiimela, ihe ino kutha efulika. Ninga iikwiila mu na omagadhi gooholivi, iikwiila yimwe mwaa na omagadhi nayimwe molupe lwekaka yomapapi ya gwayekwa omagadhi.

³Yi tula montungwa e to yi yambele ndje, uuna to yamba ongombe ondumentu noonzi mbali oondumentu.

⁴“Eta Aaron noyana kosheelo shetsalihangano e to ya yogo nawa nomeya.

⁵Opo ihe zaleka Aaron omizalo dhuuyambi — ohema, omapepenguwo, eguyo lyokombanda, oshipapa shomontulo nekwamo.

⁶Mu zaleka etsilu e to mangele ko epapa eyapuki.

⁷Nena kutha omagadhi gokugwaya, ga tila komutse gwe e to mu gwayeke.

⁸“Hedhitha ko oyana e to ya zaleke oohema;

⁹ya zaleka omakwamo moombunda dhawo nomatsilu komitse dhawo. Osho ngaaka to yapula Aaron noyana. Oyo noluvalo lwawo oye na okulongela ndje muuyambi sigo aluhe.

¹⁰“Eta ongombe ondumentu kosheelo shetsalihangano e to lombwele Aaron noyana, ya tenteke iikaha yawo komutse gwayo.

¹¹Dhipagela ongombe ondumentu koshipala shandje oshiyapuki posheelo shetsalihangano.

¹²Kutha mombinzi yongombe e to yi gogo kooniga dhoshiyambelo nomunwe gwoye. Ombinzi onkwawo yi tila pekota lyoshiyambelo.

¹³Nena kutha ko oofu dhomiikwamela, ekalokwa lyokehuli niitiyanathigo ayihe iyali niinkene mbyoka yi li kuyo e to yi lungunithile koshiyambelo yi yambelwe ndje.

¹⁴Ihe onyama yongombe, ekunka lyayo nehoho lyayo yi lungunithila pondje yontanda. Ndika eyambo lyokukutha po oondjo dhaayambi.

¹⁵“Kutha yimwe yomoonzi oondumentu e to lombwele Aaron noyana, ya tenteke iikaha yawo komutse gwayo.

¹⁶Yi dhipaga e to kutha ombinzi yayo e to shashamine koombinga adhihe dhoshiyambelo.

¹⁷Tetagula onzi miintimbu, yoga iikwamela yayo e to yi tula pomutse nopiintimbu iikwawo.

¹⁸Onzi ayihe yi lungunithila koshiyambelo yi ninge iikulyandjambo. Oyo efikilondjambo kOmuwa, oyo eyambo lyezimba etoye kOmuwa.

¹⁹“Kutha onzi onkwawo ondumentu e to lombwele Aaron noyana, ya tenteke iikaha yawo komutse gwayo.

²⁰Yi dhipaga e to kutha ko ombinzi yayo yimwe e to yi gwayeke koshipapatsi shokutsi kwokolulyo kwaAaron nokiipapatsi yomakutsi gokomalulyo goyana nokomilumenwe dhawo dhokiikaha yokomalulyo nokominwe dhawo ominene dhokoompadhi dhokomalulyo. Shashamina ombinzi onkwawo koombinga adhihe dhoshiyambelo.

²¹Kutha mo ombinzi yimwe nombinzi ndjoka yi li koshiyambelo nomomagadhi gokugwaya e to ga shashamine Aaron noyana noonguwo dhawo. Osho ngaaka ye mwene, oyana noonguwo dhawo otaa yapulilwa ndje.

²²“Konzi kutha ko iinkene, omushila, oofu dhokiikwamela, ekalokwa lyokehuli, iitiyanathigo ayihe iyali niinkene yayo noshilama shokolulyo, molwashoka onzi ndjika oyeyapulo.

²³Montungwa yiikwiila mbyoka ya yapulilwa ndje, kutha mo oshikwiila shimwe moludhi kehe: oshikwiila shimwe sha ningwa nomagadhi gooholivi, shimwe inaashi ya omagadhi nashimwe shepapi.

²⁴Ayihe mbika yi tenteka peke lyaAaron nopomake goyana e to yi dhungadhunga koshipala shOmuwa.

²⁵Nena yi kutha po pomake gawo, u yi lungunithile koshiyambelo kombanda yefikilondjambo, yi ninge iikulyandjambo yokuyambelwa ndje. Ezimba lyondjambo ndjika ohali opalele ndje, ngame Omuwa.

²⁶“Kutha ondete yonzi ndjika ondumentu e to yi dhungadhunga koshipala shOmuwa. Oshitopolwa shika otashi ningi shoye.

²⁷“Uuna omuyambi ta yapulwa, ondete noshilama shonzi tayi longithwa peyapulo, nayi yapulilwe ndje, yi ninge omagano gedhungadhungo, mu ga itulile ga ninge gaayambi.

²⁸Eutho ndika itali lunduluka nando, uuna aantu yandje taa yamba omakwatathanondjambo; ondete noshilama shoshimuna nashi ninge shaayambi. Omagano ngaka aantu otaye ga yambele ndje, ngame Omuwa.

²⁹“Konima yeso lyaAaron oonguwo dhe dhuuyambi nadhi thigululwe po koyana, ye dhi zale, uuna taa gwayekwa ya yapulilwe oshilonga.

³⁰Omuna gwaAaron ngoka te mu landula muuyambi e ta yi metsalihangano, a longele ndje mUuyapuki, na zale oonguwo ndhika omasiku gaheyali.

³¹“Kutha onyama yonzi ondumentu ya longithwa meyapulo lyaAaron noyana, e to yi telekele pehala eyapuki.

³²Aaron noyana naye yi lile posheelo shetsalihangano pamwe niikwiila mbiyaka ya hupile montungwa.

³³Oye na okulya shoka sha longithwa momusindilo gwokudhima po oondjo dhawo peyapulo lyawo, sho taa langekwa miilonga. Aayambi oyo ayeke naa lye iikulya mbika, oshoka oyo iiyapuki.

³⁴Nongele onyama yimwe nenge iikwiila yimwe ya hupu ko e tayi lala sigo ongula, nayi lungunithwe po; inayi liwa we, oshoka oyo iiyapuki.

³⁵“Gwanitha omisindilo dheyapulo lyaAaron noyana omasiku gaheyali, naanaa ngaashi nde ku lombwele.

³⁶Esiku kehe ou na okuyamba ongombe ondumentu, yi ninge efikilondjambo, opo oondjo dhi dhimbwe po. Otayi yelitha oshiyambelo. Nena shi gwayeka nomagadhi gooholivi, shi ninge oshiyapuki.

³⁷Ninga shika esiku kehe momasiku gaheyali. Nena oshiyambelo otashi ningi naanaa oshiyapuki, ndele shaa ngoka nenge shaa shoka tashi shi gumu, otashi ningi oshiyapuki.”

³⁸“Esiku kehe ethimbo alihe koshiyambelo naku yambelwe oonzigona mbali dhomumvo gumwe.

³⁹Onzigona yimwe ou na oku yi yamba ongula, nonkwawo oto yi yamba lwokongulohi.

⁴⁰Onzigona yotango oto yi yamba pamwe noolita mbali dhosiimela ya pilulilwa mumwe nolita yimwe yomagadhi gooholivi ga yengwa. Tila mo ishewe olita yimwe yomaviinu, ga ninge omayambo.

⁴¹Onzigona ontiyali yi yamba ongulohi pamwe niikulyandjambo noshinuwandjambo naanaa ngaashi ongula. Ezimba etoye lyondjambo ndjika ohali opalele ndje, ngame Omuwa.

⁴²Esiku kehe ethimbo alihe kala ho yamba efikilondjambo ndika koshipala shandje posheelo shetsalihangano. Opo mpoka tandi tsakaneke aantu yandje e tandi ku popitha.

⁴³Opo mpoka tandi tsakaneke Aaisraeli, nehala ndyoka otali yapulwa keadhimo lyandje.

⁴⁴Otandi yapula etsalihangano noshiyambelo, notandi yapula Aaron noyana, ya longele ndje muuyambi.

⁴⁵Otandi ka kala mokati kAaisraeli, ongame Kalunga kawo.

⁴⁶Otaa ka tseya kutya ongame Omuwa, Kalunga kawo, nde ya tembudha muEgipiti, opo ndi wape okukala mokati kawo. Ongame Omuwa, Kalunga kawo.”