Read Oshindonga-Ombiimbeli Ondjapuki EKSODUS 30 Bible Online

EKSODUS 30 - Oshindonga-Ombiimbeli Ondjapuki bible

EKSODUS 30

¹“Tunga oshiyambelo shiipilangi yomuthiya shokufikila ko iitsinino.

²Nashi kale nuule wolundya lumwe nomutamo gwolundya lumwe nomuthika gwoondya mbali. Ooniga dhokomakuvu nadhi kale dha kwatathana noshiyambelo.

³Kolonga kombanda yasho, olutu nooniga dhasho noshingoli sha yela, u shi ningile wo epaya lyoshingoli.

⁴Koombinga adhihe mbali dholutu kohi yoongenge, shi ningila oonkogo mbali dhoshingoli dhokuhukilwa omitenge dhoku shi humbata.

⁵Omitenge dhi honga dhomuthiya e to dhi kolonga noshingoli.

⁶Oshiyambelo shika shi tula pondje yetopolitho ndjoka lye endjelela komeho goshikethahangano. Pehala mpoka opo tandi ku tsakanekele.

⁷Ongula kehe Aaron sho te ya a opaleke oolamba, na fikile ko iitsinino ya nika nawa.

⁸Nonge ta ka hwameka oolamba ongulohi, osho natango ta ningi. Etsininondjambo ndika nali kale tali yambwa esiku kehe koshipala shOmuwa sigo aluhe.

⁹Koshiyambelo shika inamu yambela ko iitsinino yi indikwa nenge omafikilondjambo nenge iikulyandjambo; inamu tila ko oshinuwandjambo.

¹⁰Lumwe momumvo kehe Aaron na yelithe oshiyambelo pamisindilo nokutula ko kooniga dhasho ne ombinzi yeyonondjambo. Shika nashi ningwe omumvo kehe aluhe sigo aluhe. Oshiyambelo shika oshiyapukilela, sha yoololelwa ndje, ngame Omuwa.”

¹¹Omuwa okwa lombwele Moses a ti:

¹²“Nge to yalula Aaisraeli, kehe ngoka e na okukala meyalulo, na fute iikulila yomwenyo gwe, opo kaa kwatwe koshivu pethimbo lyeyalulo.

¹³Kehe ngoka e li meyalulo, na fute etatasekeli pandjele yosekeli ndjoka hayi longithwa motempeli. Iimaliwa mbika nayi kale eyambo kungame Omuwa.

¹⁴Shaa ngoka ta yalulwa meyalulo, omulumentu kehe gwomimvo omilongo mbali noku vule po, na fute omwaalu nguka.

¹⁵Omuyamba ina futa oshindji, nohepele ina futa oshishona, uuna taa futu iikulila yoomwenyo dhawo.

¹⁶Gongela iimaliwa mbika kAaisraeli, u yi longithile iilonga yometsalihangano. Iigandjwa mbika otayi ningi iikulila yoomwenyo dhawo, notandi dhimbulukwa oku ya gamena.”

¹⁷Omuwa okwa lombwele Moses a ti:

¹⁸“Hambula oshiyaha shoshikushu nomagulu gasho goshikushu. Shi tula pokati ketsalihangano noshiyambelo e to tula mo omeya.

¹⁹Aaron noyana naa yoge iikaha noompadhi dhawo,

²⁰manga inaaya ya metsalihangano nenge manga inaaya hedha koshiyambelo ya yambe iikulyandjambo, opo yaa se.

²¹Naa yoge tuu iikaha noompadhi dhawo, opo yaa se. Shika nashi kale eutho taye li gwanitha nomaluvalo gawo sigo aluhe.”

²²Omuwa okwa lombwele Moses a ti:

²³“Kutha iizimba iiwanawa: ookilograma hamano dhomira ya hemuka, ookilograma ndatu dhokanela ya nika nawa, ookilograma ndatu dholutope

²⁴nookilograma hamano dhakasia (ayihe ya vihwa pamuthika gu uthwa). Kutha wo oolita ne dhomagadhi gooholivi

²⁵e to lungu omugwayo omuyapuki gwa longekidhwa paunkulungu niizimba.

²⁶Gwayeka nagwo etsalihangano noshikethahangano,

²⁷oshitaafula niinima yasho ayihe, oshihukikwanyeka niikwaniipangitho yasho ayihe, oshiyambelo shiitsinino,

²⁸oshiyambelo shomafikilondjambo niikwaniipangitho yasho ayihe noshiyaha shokwiiyogela nomagulu gasho.

²⁹Iinima mbika yi yapula pamukalo nguka, e tayi ningi iiyapukilela, noshaa ngoka te yi gumu, ota yapuka.

³⁰Gwayeka Aaron noyana noku ya yapula, ya ninge aayambi taa longele ndje.

³¹Lombwela Aaisraeli u tye: ‘Omugwayo nguka omuyapuki nagu longithwe melongelokalunga lyandje aluhe sigo aluhe.

³²Inamu gu tila kolutu lwomuntu gwowala ne inamu gu holela, mu ilungile omugwayo gwa fa nguka. Ogwo omuyapuki, nomu na oku gu tala omuyapuki.

³³Ngele oku na ngoka te gu ilungile nenge te gu gwayeke omuntu kee shi omuyambi, na dhimwe mo maantu yandje.’ ”

³⁴Omuwa okwa lombwele Moses a ti: “Kutha oondumba dhi thike pamwe dhiinima mbika ya nika nawa: eka lya nika nawa, iipakosolwa ya nika nawa, iitowaleki ya nika nawa niitsinino yo yeneyene.

³⁵Yi ninga iitsinino ya nika nawa, ya longwa nuunkulungu. Gunda mo omongwa gwoku yi ninga iiyogoki niiyapuki.

³⁶Vundula po yimwe yi ninge uusila, u yi fale metsalihangano e to yi gundu komeho goshikethahangano, mpoka tandi ku tsakaneke. Otayi kala iiyapukilela nokune wo.

³⁷Inamu iningila iitsinino yilwe ya tya ngeyi. Yi taleni iiyapuki ya yapulilwa ndje, ngame Omuwa.

³⁸Ngele ope na ngoka te shi yelekele a longithe iizimba ngaambika, na dhimwe mo maantu yandje.”