Read Oshindonga-Ombiimbeli Ondjapuki EKSODUS 32 Bible Online

EKSODUS 32 - Oshindonga-Ombiimbeli Ondjapuki bible

EKSODUS 32

¹Aantu sho ya mono Moses a kala ko kondundu inaa za ko, oya gongalele Aaron e taa ti kuye: “Katu shi wo tuu shoka sha adha omulumentu nguka Moses, ngoka e tu tembudha muEgipiti; tu ningila kalunga e tu kwatele komeho.”

²Aaron okwa ti kuyo: “Kuthii mo omagola goshingoli ngoka ga zalwa momakutsi kaakiintu nokaana yeni aamati naakadhona, mu ga etele ndje.”

³Aantu ayehe oya hula mo omagola gawo goshingoli momakutsi gawo e taye ga eta kuAaron.

⁴Oye okwa taamba omagola nokwe ga hemuna e ga tula montelekelo e te ga tholoma ontana yoshingoli. Aantu oya popi ya ti: “Israel, kalunga koye oye ngu e ku tembudha muEgipiti!”

⁵Aaron sho e shi mono, okwa tungile oshiyambelo komeho gontana yoshingoli e ta ti: “Ongula esiku lyoshituthi shOmuwa.”

⁶Aantu oya meneka ongulangula noya yamba omafikilondjambo nomakwatathanondjambo. Oya kuutumba ya lye e taa nu noya thikama ya dhane.

⁷Omuwa okwa lombwele Moses a ti: “Londoloka u ye pohi, oshoka aantu yoye mboka wa tembudha muEgipiti, oya yono noye ekelehi ndje.

⁸Oye etha ondjila ndjoka nde ya lombwele ye yi landule; oyi iningile ontana ya tholomwa moshingoli noye yi simaneke noku yi yambela omayambo. Otaa ti, oyo kalunga kawo, ngoka e ya tembudha muEgipiti.”

⁹Omuwa okwa ti ishewe kuMoses: “Aantu mbaka onde ya tala, oyo aatangalali.

¹⁰Ano ngashingeyi etha ndje, ndi ya geele. Otandi ya kombo po, ihe ngoye otandi ku ningi oshigwana oshinene.”

¹¹Moses okwa galikana Omuwa, Kalunga ke, e ta ti: “Omuwa, omolwashike to geele aantu yoye, mboka we ya mangulula muEgipiti koonkondo dhoye oonene noshikaha shoye sha kola?

¹²Omolwashike to pe Aayegipiti ompito yokutya, aantu yoye owe ya tembudha muEgipiti, opo u ya dhipagele moondundu noku ya komba po thilu? Geyuluka, itedhulula, waa etele aantu yoye omupya gu thike mpoka.

¹³Dhimbulukwa euvaneko lyoye we li uvanekele aantu yoye Abraham, Isak naJakob nokugana wa ti: ‘Otandi mu pe oluvalo lu thike poonyothi dhokegulu; evi alihe ndjoka ndu uvaneke, otali ningi uuthiga wawo sigo aluhe.’ ”

¹⁴Omuwa nokwi itedhulula noine etela we aantu ye uuwinayi mboka a li e u ya dhiladhilile.

¹⁵Moses okwa punguluka e ta londoloka ko kondundu a humbata iipelende yomamanya yiipango ya nyolwa koombinga adhihe mbali.

¹⁶Kalunga oye mwene a hongo iipelende mbika e ta takele mo iipango.

¹⁷Josua oku uvu ombuyagano yaantu, sho taa kudhile e ta ti kuMoses: “Ondu uvite onkugo yolugodhi montanda.”

¹⁸Moses okwa ti: “Ewi ndika kali shi lyekaluluko lyekandanga lyesindano nenge lyaamboka taa kugu sho ya sindika, ondu uvite ewi lyaantu taa imbi meziminathano.”

¹⁹Ano Moses sho a hedha kontanda e ta mono ontana naantu nkene taa dhana, ondjahi ye oya hwama. Oye nokwe ekelehi iipelende mbyoka a li a humbata e te yi tatulile mpoka ponyonga yondundu.

²⁰Okwa kutha ontana ndjoka ye yi hambula e te yi lungunitha po momulilo e tayi ningi omutoko, ngoka a pilulile momeya e te ga nwetha Aaisraeli.

²¹Okwa ti kuAaron: “Aantu mbaka oye ku ningi shike, sho we ya etele eyono enene li thike mpano?”

²²Aaron okwa yamukula a ti: “Ino geela ndje, mwene gwandje, ou shi shi naanaa kutya aantu mbaka aawinayi shili.

²³Oya lombwele ndje ya ti: ‘Katu shi wo shoka sha adha omulumentu nguka Moses, ngoka e tu tembudha muEgipiti; tu ningila kalunga e tu kwatele komeho.’

²⁴Onde ya indile, ye etele ndje iingoli yawo, mbyoka ye yi ikutha e taye yi etele ndje. Onde yi tula meziko e tamu zi ihe ontana ndjika.”

²⁵Moses okwa mono kutya aantu oya tangalala, oshoka Aaron okwe ya ethele etangalalo, ya ninge ekugililo kaatondi yawo.

²⁶Moses okwa thikama muuyanda wontanda e ti igidha ta ti: “Shaa ngoka a gama kOmuwa, ne ye kungame.” Aalevi ayehe noye mu gongalele,

²⁷e ta ti kuyo: “Omuwa, Kalunga kaIsrael, ta ti: ‘Omulumentu kehe na zale egongamwele lye ponto, ye a ye moontanda okuza posheelo shika sigo okoshikwawo nokudhipaga shaa ngoka, ngele omumwayina nenge kuume ke nenge omushiinda.’ ”

²⁸Aalevi oya vulika noya dhipaga po aalumentu ye thike pomayuvi gatatu esiku ndyoka.

²⁹Moses okwa ti kAalevi: “Nena omwi iyapula ne yene mwa ningi aayambi mokulongela Omuwa, sho mwa dhipaga aana yeni aamati naamwanyoko aalumentu, onkee Omuwa te mu yambeke.”

³⁰Esiku lyanofu Moses okwa lombwele aantu a ti: “Omwa yono nayi. Ano ngashingeyi otandi londo ndi ye kOmuwa kondundu, pamwe tandi ningile wo tuu eyono lyeni epopilokwatathano.”

³¹Moses okwa shuna kOmuwa e ta ti: “Aantu mbaka oya yono nayi. Oyi iningile kalunga koshingoli.

³²Dhima po oondjo dhawo; ihe ngele nani hasho, dhima ndje mo shila membo lyoye moka wa nyolele aantu yoye.”

³³Omuwa okwa yamukula a ti: “Ngoka a yono kungame, oye tandi dhimi mo membo lyandje.

³⁴Ngashingeyi inda u ka fale aantu kehala ndyoka nde ku lombwele. Tala, omuyengeli gwandje ote ku kwatele komeho, ihe esiku tandi ke ya adha, otandi ya geelele ondjo yawo.”

³⁵Omuwa nokwa tumu oshivu maantu, oshoka oya thiminikile Aaron e ya hambulile ontana.