Read Oshindonga-Ombiimbeli Ondjapuki EKSODUS 35 Bible Online

EKSODUS 35 - Oshindonga-Ombiimbeli Ondjapuki bible

EKSODUS 35

¹Moses okwa gongele egongalo alihe lyAaisraeli e ta ti kulyo: “Oohapu ndhika Omuwa okwa ti nadhi gwanithwe:

²Ne omu na omasiku gahamano gokulonga iilonga yeni, ihe esiku etiheyali olyo eyapuki, esiku lyevululuko lya yapulilwa ndje, ngame Omuwa. Shaa ngoka ta longo esiku ndyoka, na dhipagwe.

³Inamu tema nokuli omulilo momagumbo geni mEsabati.”

⁴Moses okwa lombwele Aaisraeli ayehe a ti: “Omuwa okwa utha ngeyi:

⁵Momaliko geni kuthii mo omayambo gokuyambela Omuwa. Shaa ngoka a hala oku shi ninga, ne ete omayambo goshingoli, goshisiliveli nenge goshikushu;

⁶oongodhi oombulau, oombwilili noontiliganembwilili, iiyata yoliina ombwanawa nomafufu giikombo;

⁷iipa yoonzi oondumentu ya tethwa iitiligane, iipa yoongombefuta, iipilangi yomuthiya,

⁸omagadhi gomoolamba, iizimba yokugwaya noyokufika iitsinino,

⁹omamanya gaoniks nuuwe wokutula momapepenguwo gomuyambi nomoshipapa shomontulo.”

¹⁰“Oonkulungu adhihe dhomokati keni nadhi ye dhi longe ashihe shoka Omuwa a ti:

¹¹otenda nesiikilo lyetsalihangano, uuhake, iipilangi, omalukambo, oongundhi noompadhi dhadho,

¹²oshikethahangano nomitenge dhasho, oshisiikilo shasho netopolitho lyoku shi shiga;

¹³oshitaafula, omitenge dhasho niikwaniipangitho ayihe; iikwiila iiyapuki;

¹⁴oshihukikwanyeka shokuminikila niipumbiwa yasho; oolamba nomagadhi gadho;

¹⁵oshiyambelo shiitsinino nomitenge dhasho; omagadhi gomugwayo, iitsinino yezimba etoye neshigolapi lyoposheelo shetsalihangano;

¹⁶oshiyambelo shomafikilondjambo noshihaya shoshikushu, omitenge niikwaniipangitho yasho ayihe; oshiyaha shokwiiyogela nomagulu gasho;

¹⁷omalapi gehale, oongundhi dhago noompadhi dhago, eshigolapi lyoposheelo shehale;

¹⁸oomboha noongodhi dhothayila yetsalihangano nodhomalapi gehale;

¹⁹noonguwo dha tungika dhaayambi dhokuzala, sho taa yakula mEhala lyuuyapuki — oonguwo oondjapuki dhomuyambi Aaron nodhoyana.”

²⁰Aaisraeli ayehe oya zi puMoses ya yi,

²¹noshaa ngoka a li a hala, okwe etele Omuwa omayambo gokutunga etsalihangano. Oye eta shaa shoka sha pumbiwa meyakulo nomokutungitha oonguwo dhaayambi.

²²Shaa ngoka a hala oku shi ninga, omulumentu nenge omukiintu, okwe eta oompate, omagola, uulinga, uugondo wuulenga nuulenga auhe woshingoli noku yi yapulila Omuwa.

²³Shaa ngoka a li e na oongodhi oombulau, oombwilili noontiliganembwilili, oliina ya tungika, omafufu giikombo, iipa yoonzi oondumentu ya tethwa iitiligane niipa yoongombefuta, okwe yi eta.

²⁴Ayehe mboka ya li ye na oshisiliveli nenge oshikushu, oye shi etele Omuwa ombalagelo, naamboka ya li ye na iipilangi yomuthiya yokulongitha, oye yi eta.

²⁵Aakiintu ayehe oonkulungu oya yogoha oongodhi oombulau, oombwilili noontiliganembwilili noongodhi oontokele dholiina noye dhi eta.

²⁶Oya yogoha wo oongodhi dhomafufu giikombo.

²⁷Aawiliki oye eta omamanya gaoniks nomamanya omakwawo gondilo gokutula momapepenguwo nomoshipapa shomontulo,

²⁸niizimba nomagadhi gomoolamba, gomugwayo nogiitsinino yezimba etoye.

²⁹Aaisraeli ayehe mboka ya li ya hala okweetela Omuwa omayambo gawo molwiilonga mbyoka Omuwa a lombwele Moses, oye shi ningi.

³⁰Moses okwa lombwele Aaisraeli a ti: “Omuwa okwa hogolola Bezalel yaUri, omutekulu gwaHur gwomezimo lyaJuda.

³¹Kalunga okwe mu udhitha ombepo ye e te mu pe uunongo, oondunge, ontseyo nuunkulungu

³²okuthaneka iinima yuungomba noku yi longa moshingoli, moshisiliveli nomoshikushu,

³³okuwega nawa omamanya gondilo noku ga tula moondambo, okuhonga omiti nokulonga oshilonga kehe shuunkulungu.

³⁴Omuwa okwe mu pa wo omagano guulongi, a longe yakwawo, nosho wo Oholiab yaAhisamak gwomezimo lyaDan e mu pa omagano gokulonga yakwawo.

³⁵Okwe ya pe uunkulungu wiilonga yi ili noyi ili mbyoka hayi longwa kaawegi yomamanya, kaafaneki nokaatungi yiiyata yi na uulenga yoongodhi oombulau, oombwilili noontiliganembwilili, yiiyata yoliina ombwanawa noyiiyata yilwe. Oyo mboka taa vulu okulonga shaa shoka noku shi faneka.”