Read Oshindonga-Ombiimbeli Ondjapuki EKSODUS 36 Bible Online

EKSODUS 36 - Oshindonga-Ombiimbeli Ondjapuki bible

EKSODUS 36

¹“Bezalel naOholiab nayakwawo oonkulungu ayehe mboka ya pewa kOmuwa uunongo noondunge okutseya, nkene oshilonga kehe shi na okulongwa metungo lyetsalihangano, oye na okuninga ashihe, naanaa ngaashi Omuwa e shi utha.”

²Moses okwi ithana Bezalel naOholiab noonkulungu adhihe ndhoka dha pewa kOmuwa uunongo nodha hala okulonga.

³Odha pewa kuMoses omayambo agehe ngoka ge etwa kAaisraeli okutunga etsalihangano. Ihe aantu oya tsikile okweetela Moses oombalagelo ongula kehe.

⁴Nena oonkulungu ndhoka dha li tadhi longo, odha yi

⁵e tadhi tseyithile Moses tadhi ti: “Aantu otaye eta oshindji shi vulithe shoka sha pumbiwa miilonga mbyoka Omuwa e yi utha yi longwe.”

⁶Moses okwa tumu elaka lya yi noontanda adhihe kutya aantu inaye eta we oombalagelo dhokutungitha etsalihangano. Osho ngaaka aantu ya zimbuka okweeta oombalagelo.

⁷Mbyoka ya gongelwa oya li ya gwanenena noya pitilila metungo alihe.

⁸Aalumentu oonkulungu mokati kaalongi yiilonga oya tungu etsalihangano momalapi omulongo goliina ombwanawa ga tungilwa oongodhi oombulau, oombwilili noontiliganembwilili nomafano gaakerubi paunkulungu.

⁹Elapi kehe olya li li thike pekwawo, lyuule woondya omilongo mbali nahetatu nomutamo gwoondya ne.

¹⁰Oya hondjele kumwe oondya ntano, dhi ninge oshitopolwa shimwe, osho wo oondya ntano okuninga oshitopolwa oshitiyali.

¹¹Kolungenge lwelapi lyotango moshitopolwa kehe oya ningi ko omalulo gongodhi ombulau.

¹²Oya ningi omalulo omilongo ntano kolungenge lwelapi lyahugunina moshitopolwa shimwe nomalulo omakwawo omilongo ntano kolungenge lwelapi lyahugunina moshitopolwa oshitiyali. Miitopolwa ayihe iyali omalulo oga li ga tegama.

¹³Oya hambula uuhake woshingoli omilongo ntano wokukogekela iitopolwa kumwe.

¹⁴Oya ningi esiikilo lyotenda lyomalapi omulongo nalimwe lya tungwa momafufu giikombo.

¹⁵Elapi kehe olya li li na uule woondya omilongo ndatu nomutamo gwoondya ne.

¹⁶Oya hondjele oondya ntano kumwe, osho wo oonkwawo ntano kumwe.

¹⁷Oya tula omalulo omilongo ntano kolungenge lwelapi lyahugunina moshitopolwa shimwe nomalulo omilongo ntano kolungenge lwelapi lyahugunina moshitopolwa oshikwawo.

¹⁸Oya hambula uuhake woshikushu omilongo ntano wokukogekela iitopolwa kumwe, yi ninge esiikilo limwe.

¹⁹Oya ningi omasiikilo gaali galwe, limwe olyiipa yoonzi oondumentu ya tethwa iitiligane nekwawo lyiipa yoongombefuta.

²⁰Oya hongo momuthiya iipilangi yokuthikameka etsalihangano.

²¹Oshipilangi kehe osha li shi na uule woometa ne nomutamo gwoosentimeta omilongo hamano nahamano.

²²Oshipilangi kehe osha li shi na iikwatakanithi iyali tayi shi kwatakanitha kumwe noshikwawo. Iipilangi ayihe oya li yi na iikwatakanithi mbika.

²³Oya hongo iipilangi omilongo mbali omolwombinga yokuumbugantu wotenda,

²⁴noku yi tholomena oompadhi omilongo ne dhoshisiliveli, mu hwekelwe mo iikwatakanithi yiipilangi yoku yi thikamitha.

²⁵Oya ningi iipilangi omilongo mbali omolwombinga yokuumbangalantu wotenda,

²⁶noompadhi dhoshisiliveli omilongo ne, mbali kohi yoshipilangi kehe.

²⁷Konima yotenda kuuninginino oya hongele ko iipilangi ihamano

²⁸niipilangi iyali yokomakuvu.

²⁹Iipilangi mbika yokomakuvu oya kwatathana pekota nokukwatela kumwe ayihe sigo opombanda. Iipilangi iyali mbyoka ya ningi omakuvu, oya longwa pamukalo nguka.

³⁰Okwa li ku na iipilangi ihetatu yi na oompadhi dhayo dhoshisiliveli omulongo nahamano, koshipilangi shimwe okwa li mbali.

³¹Oya hongo omalukambo omulongo nagatano gomuthiya, gatano omolwiipilangi kombinga yimwe yetsali,

³²gatano ogokombinga onkwawo nagatano ogokuuninginino konima.

³³Olukambo lwopokati olwa tulwa pokati kiipilangi lwa shigakana lwa tsa koombinga adhihe.

³⁴Oya kolonga iipilangi noshingoli noya tula ko oonkogo dhoshingoli dhokukwatela kumwe omalukambo, ngoka nago wo ga kolongwa noshingoli.

³⁵Oya ningi etopolitho lyoshiyata sholiina ombwanawa sha tungilwa oongodhi oombulau, oombwilili noontiliganembwilili nomafano gaakerubi paunkulungu.

³⁶Oya hongele eshigolapi oongundhi ne dhomuthiya dha kolongwa noshingoli, dhi na uuhake woshingoli. Oya tholoma oompadhi ne dhoshisiliveli dhokuthikamitha oongundhi.

³⁷Posheelo shetsali oya tula po eshigolapi lyoliina ombwanawa lya tungilwa oongodhi oombulau, oombwilili noontiliganembwilili.

³⁸Etopolitho ndika oye li hongele oongundhi ntano dhi na uuhake; omitse nomalukambo gadho oga kolongwa noshingoli nodha tholomenwa oompadhi dhoshikushu ntano.