Read Oshindonga-Ombiimbeli Ondjapuki EKSODUS 38 Bible Online

EKSODUS 38 - Oshindonga-Ombiimbeli Ondjapuki bible

EKSODUS 38

¹Okwa ningi oshiyambelo shomafikilondjambo miipilangi yomuthiya. Osha li shuule woondya ntano, omutamo gwoondya ntano nomuthika gwoondya ndatu.

²Komakuvu gasho gane okwa ningile ko ooniga dha kwatathana noshiyambelo. Ashihe okwe shi kolonga noshikushu.

³Okwa hambula iikwaniipangitho ayihe yoshiyambelo: Iipana, iihupulo, iiyaha, iizigitho niikangwa yomakala. Iikwaniipangitho mbika ayihe oya li ya hambulwa moshikushu.

⁴Okwa hambula oshihaya shoshikushu e te shi tula kohi yoongenge dhoshiyambelo, she endjelela sigo olwopokati koshiyambelo.

⁵Okwa hambula oonkogo ne e te dhi tula komakuvu gane goshihaya.

⁶Okwa hongo omitenge dhomuthiya e te dhi kolonga noshikushu.

⁷Okwe dhi hwekele moonkogo koombinga adhihe mbali dhoshiyambelo. Oshiyambelo osha li sha pangelwa miipilangi shi na omututu meni.

⁸Okwa hambula oshiyaha shoshikushu shi na omagulu goshikushu. Okwe shi ningi miiyitalelo yaakiintu mboka haa yakula posheelo shetsalihangano.

⁹Etsalihangano okwe li dhikile ehale lyomalapi goliina ombwanawa. Kombinga yokuumbugantu omalapi oga li guule woondya ethele,

¹⁰ga tsilikwa koongundhi omilongo mbali noompadhi dhadho dhoshikushu omilongo mbali; uuhake nomalukambo goongundhi oga li goshisiliveli.

¹¹Osho wo a ningi kombinga yokuumbangalantu wehale.

¹²Kombinga yokuuninginino omalapi oga li guule woondya omilongo ntano, oongundhi omulongo noompadhi omulongo.

¹³Kombinga yokuuzilo, nkoka kwa li osheelo, ehale olya li oondya omilongo ntano.

¹⁴Kombinga kehe yosheelo okwa li omalapi goondya omulongo nantano, oongundhi ndatu noompadhi ndatu.

¹⁶Omalapi agehe ga dhingilila ehale oga li ga tungwa moshiyata sholiina ombwanawa.

¹⁷Oompadhi dhoongundhi odha li dhoshikushu, ihe uuhake nomalukambo oga li goshisiliveli, nomitse dhoongundhi odha li dha kolongwa noshisiliveli. Oongundhi adhihe dhehale odha li dha kwatelwa kumwe nomalukambo goshisiliveli.

¹⁸Eshigolapi lyoposheelo shehale olya li lya ningwa moshiyata sholiina ombwanawa sha tungilwa oongodhi oombulau, oombwilili noontiliganembwilili. Olya li li na uule woondya omilongo mbali nomuthika gwoondya ntano gwa faathana nomalapi gehale.

¹⁹Olya li lya tsilikwa koongundhi ne dhi na oompadhi ne dhoshikushu. Uuhake nomalukambo gadho oga li goshisiliveli, nomitse dhadho odha li dha kolongwa noshisiliveli.

²⁰Oomboha adhihe dhotenda nodhehale odha li dhoshikushu.

²¹Mpaka ope na elandulathano lyuutale mboka wa longithwa metungo lyetsalihangano, moka mwa pungulwa iipelende yomamanya iyali mwa nyolelwa iipango omulongo. Elandulathano olya ningwa kuMoses keyalulo lyAalevi mboka ya longo mewiliko lyaItamar, omuna gwomuyambi Aaron.

²²Bezalel yaUri, omutekulu gwaHur, gwomezimo lyaJuda, okwa gwanitha ashihe shoka Omuwa a popi.

²³Omukwathi gwe Oholiab yaAhisamak, gwomezimo lyaDan, okwa li omuwegi gwomamanya, omufaneki nomutungi gwiiyata yi na uulenga woongodhi oombulau, oombwilili noontiliganembwilili nogwiiyata yoliina ombwanawa.

²⁴Oshingoli ashihe shoka sha yapulilwa Omuwa okutunga etsalihangano nosha gandjwa ombalagelo, osha li iitalendi omilongo mbali nomugoyi noosekeli omathele gaheyali nomilongo ndatu pandjele yosekeli ndjoka hayi longithwa motempeli.

²⁵Oshisiliveli shoka sha zi meyalulo lyegongalo, osha li iitalendi ethele noosekeli eyuvi limwe omathele gaheyali omilongo heyali nantano pandjele yosekeli ndjoka hayi longithwa motempeli.

²⁶Omuntu kehe meyalulo okwa futu etatasekeli pandjele yosekeli ndjoka hayi longithwa motempeli. Ayehe mboka ya yalulwa yomimvo omilongo mbali nenge dhi vule po, oya li 603 550.

²⁷Oshisiliveli shondjundo yoograma 3,400 osha tholoma oompadhi dhetsalihangano nodhetopolitho, oshitalendi shimwe ompadhi yimwe.

²⁸Oosekeli eyuvi limwe omathele gaheyali omilongo heyali nantano Bezalel okwe dhi hambula uuhake nomalukambo koongundhi nokusiikila omitse dhadho.

²⁹Oshikushu shoka she etwa ombalagelo, osha li iitalendi omilongo heyali noosekeli omayuvi gane.

³⁰Oshikushu shika okwe shi hambula oompadhi dhomweelo gwetsalihangano, oshiyambelo shoshikushu, oshihaya niikwaniipangitho ayihe yasho,

³¹oompadhi dhehale nodhosheelo shalyo noomboha adhihe dhetsalihangano nodhehale lye li kunduka.