Read Oshindonga-Ombiimbeli Ondjapuki EKSODUS 39 Bible Online

EKSODUS 39 - Oshindonga-Ombiimbeli Ondjapuki bible

EKSODUS 39

¹Oya tungu oonguwo dhuuyambi noongodhi oombulau, oombwilili noontiliganembwilili, dhi zalwe kaayambi, sho taa ka yakula mEhala lyuuyapuki. Oya tungile Aaron oonguwo, ngaashi Omuwa a lombwele Moses.

²Oya tungu omapepenguwo noongodhi dhoshingoli, noongodhi oombulau, oombwilili noontiliganembwilili nonoongodhi dholiina ombwanawa.

³Oya ndanda oshingoli, sigo sha pepuka noonkondo noye shi kondo oondali noku dhi tungila mumwe noongodhi oombulau, oombwilili noontiliganembwilili nonoongodhi dholiina.

⁴Oya ningile omapepenguwo omakwi gaali ge ga kwatakanitha koombinga adhihe mbali.

⁵Ekwamo olya ningwa moshiyata shomapepenguwo nolya kwatakanithwa kugo, ngaashi Omuwa a lombwele Moses.

⁶Oya longo omamanya gaoniks e taye ga tula muundambo woshingoli; omadhina gaana yaJakob omulongo nayaali oga li ga takelwa mo nuunkulungu.

⁷Oye ga tula komakwi gomapepenguwo, ga kalele po omazimo omulongo nagaali gaIsrael, naanaa ngaashi Omuwa a lombwele Moses.

⁸Oya tungu oshipapa shomontulo moshiyata shimwe nomapepenguwo: sha tungikika noongodhi dhoshingoli, noongodhi oombulau, oombwilili noontiliganembwilili nonoongodhi dha dhingwa dholiina ontokele.

⁹Osha li shi na oonkotso ne, sha gonywa, uule washo oshitine sholundya, osho wo omutamo.

¹⁰Oya tula mo omikweyo ne dhomamanya gondilo: momukweyo gwotango oya tula mo ospineli, otopasi nosmaragdi;

¹¹momukweyo omutiyali orubini, osafire nojaspes;

¹²momukweyo omutitatu oturkoisi, oagate noametiste;

¹³momukweyo omutine oberil, okarnelia nojasper. Oga li ga dhamithwa muundambo woshingoli.

¹⁴Pamwaalu gwaana yaJakob omamanya oga li omulongo nagaali, kehe limwe lyokukalela po ezimo limwe padhina ndyoka lya takelwa mo.

¹⁵Koshipapa shomontulo oya ningile ko uulyenge woshingoli sho shene wa dhingwa nawa wa fa oongodhi.

¹⁶Oya hambula uulinga uyali woshingoli e taye u tula koonkotso dhopombanda dhoshipapa shomontulo.

¹⁷Kuulinga mboka uyali oya mangele ko oongodhi dhoshingoli.

¹⁸Oondungu oonkwawo dhadho oye dhi mangele komapando gaali e taye ga mangele ishewe komakwi gomapepenguwo, kombinga yokomeho.

¹⁹Oya hambula ishewe uulinga uyali woshingoli e taye u tula koonkotso mbali dhokohi dhoshipapa shomontulo, koongenge dhomeni dha gama pomapepenguwo.

²⁰Oya hambula po ishewe uulinga woshingoli e taye u tula koondungu dhopevi dhopontulo dhomakwi agehe gaali gomapepenguwo, popepi nomuhondjo kombanda yekwamo lyuulenga.

²¹Oya mangele uulinga woshipapa shomontulo kuulinga womapepenguwo nongodhi ombulau, opo oshipapa shomontulo shi kankame kombanda yekwamo noitashi dhituluka we. Ashihe osha ningwa, ngaashi Omuwa a lombwele Moses.

²²Eguyo lyokombanda yomapepenguwo olya hondjwa moshiyata oshimbulau.

²³Olya li li na ombululu yokuya omutse, nombululu ndjika oya kolekwa nomugoyo gwa tungikika, opo yaa tuuke.

²⁴Komugoyo gwopevi aguhe oya tula ko omafano giiyimati yomugranati omambulau, omambwilili nomatiliganembwilili ga togwa mumwe nuungendjo woshingoli, naanaa ngaashi Omuwa a lombwele Moses.

²⁷Oya tungile Aaron noyana oohema dhoongodhi oontokele dholiina,

²⁸egala, omatsilu, oombulukweya

²⁹nekwamo lyoongodhi oontokele dha dhingwa dholiina li na uulenga woongodhi oombulau, oombwilili noontiliganembwilili, ngaashi Omuwa a lombwele Moses.

³⁰Oya hambula uulenga wokoshipala, epapa lyoshishani oshiyapuki lyoshingoli sho shene e taa takele mo enyolo tali ti “Osha yapulilwa Omuwa.”

³¹Oye li mangele nongodhi ombulau kegala lwokomeho, ngaashi Omuwa a lombwele Moses.

³²Iilonga ayihe yetsalihangano oya hulithwa ya pu. Aaisraeli oya gwanitha ashihe shoka Omuwa a lombwele Moses.

³³Oye etele Moses otenda niikwaniipangitho yayo ayihe, uuhake wayo, iipilangi yayo, omalukambo gayo, oongundhi dhayo noompadhi dhadho;

³⁴esiikilo lyiipa yoonzi oondumentu ya tethwa iitiligane; esiikilo lyiipa yoongombefuta; etopolitho lyokushiga;

³⁵oshikethahangano shi na iipelende yomamanya, omitenge dhasho noshisiikilo shesilohenda;

³⁶oshitaafula niikwaniipangitho yasho ayihe niikwiila iiyapuki;

³⁷oshihukikwanyeka shoshingoli sho shene, oolamba dhasho, iikwaniipangitho yasho ayihe nomagadhi gomoolamba;

³⁸oshiyambelo shoshingoli; omugwayo; iitsinino yezimba etoye; eshigolapi lyoposheelo shetsalihangano;

³⁹oshiyambelo shoshikushu noshihaya shasho shoshikushu, omitenge dhasho niikwaniipangitho yasho ayihe; oshiyaha shokwiiyogela nomagulu gasho;

⁴⁰omalapi gehale noongundhi dhago noompadhi dhadho; eshigolapi lyoposheelo shehale noongodhi dhalyo; oomboha dhotenda; iikwaniipangitho ayihe tayi longithwa metsali;

⁴¹oonguwo dha tungika dhokuzalwa kaayambi, nge ye li meyakulo mEhala Lyuuyapuki — oonguwo oondjapuki dhomuyambi Aaron nodhoyana.

⁴²Aaisraeli oya ningi ayihe mbika, naanaa ngaashi Omuwa a lombwele Moses.

⁴³Moses okwa konakona ayihe nokwa mono kutya oya ningwa, naanaa ngaashi Omuwa a gandjele oshipango shoku yi longa. Moses okwe ya laleke nuuyamba.