Read Oshindonga-Ombiimbeli Ondjapuki EKSODUS 7 Bible Online

EKSODUS 7 - Oshindonga-Ombiimbeli Ondjapuki bible

EKSODUS 7

¹Omuwa okwa ti: “Otandi ke ku ninga wa fa Kalunga komukwaniilwa, namumwanyoko Aaron ote ke mu lombwela a fa omuhunganeki gwoye.

²Hokololela Aaron ashihe shoka tandi ku lombwele, noye ta ka lombwela omukwaniilwa, a laleke Aaisraeli ya tembuke mo moshilongo she.

³Ihe otandi ka kukutika omukwaniilwa, noite ke mu pulakena nando, kashi na mbudhi, nando ndi longe iitilithi oyindji muEgipiti.

⁴Nena otandi ka etela Egipiti egeelo edhigu nokutembudha mo omazimo gaantu yandje moshilongo.

⁵Aayegipiti otaa ka tseya kutya ongame Omuwa, sho tandi yelutha okwooko kwandje ndi ya kondjithe e tandi tembudha mo Aaisraeli moshilongo.”

⁶Moses naAaron oya ningi sho ya lombwelwa kOmuwa.

⁷Pethimbo ndyoka sho taa popi nomukwaniilwa, Moses okwa li e na omimvo omilongo hetatu, naAaron omimvo omilongo hetatu nandatu.

⁸Omuwa okwa lombwele Moses naAaron a ti:

⁹“Omukwaniilwa ngele ote mu lombwele ta ti: ‘Ningii po oshinyengandunge shasha’, lombwela Aaron a umbile ondhimbo ye komeho gomukwaniilwa, oyo notayi shituka eyoka.”

¹⁰Moses naAaron oya yi komukwaniilwa e taa ningi, ngaashi Omuwa e ya lombwele. Aaron oku umbile ondhimbo ye komeho gomukwaniilwa nomalenga ge, noya shituka eyoka.

¹¹Nena omukwaniilwa okwi ithana aanongo noompulile dhe, nokoonkondo dhawo dhuumpulile osho ya ningi wo.

¹²Oyu umbile oondhimbo dhawo pevi, nodha shituka omayoka. Ihe ondhimbo yaAaron oye dhi nina po.

¹³Omukwaniilwa okwa kukutike omwenyo gwe, ngaashi Omuwa a ti, ye ina pulakena Moses naAaron.

¹⁴Nena Omuwa okwa lombwele Moses a ti: “Omukwaniilwa okwa kukuta unene nokwa tindi okulaleka aantu ya ye.

¹⁵Inda u ke mu tsakaneke ongula, sho ta yi kuNiili. Inda nondhimbo yoye ndjoka ya shitukile eyoka, u mu tegelele pomunkulo gwomulonga.

¹⁶Mu lombwela u tye: ‘Omuwa, Kalunga kAahebeli, okwa tumu ndje, ndi ku lombwele, u laleke aantu ye ya ye ye ke mu simaneke mombuga. Ihe ngoye ino pulakena sigo opo mpaka.

¹⁷Ngashingeyi, Nkeyama, Omuwa ote ke ku ulukila kutya oye lye, sho ta ka longa sha. Tala ko, otandi dhenge omeya gomomulonga nondhimbo ndjika, nomeya otaga shituka ombinzi.

¹⁸Oohi otadhi ka sa, nomulonga otagu ka nika unene; Aayegipiti itaa ka vula okunwa mo.’ ”

¹⁹Omuwa okwa lombwele Moses a ti: “Lombwela Aaron a kuthe ondhimbo ye, e yi taganekele komilonga, komikanka nokomadhiya agehe gaEgipiti. Omeya otaga ka shituka ombinzi, notayi ka menka nevi alihe notayi ka kala momatenga nomiiyuma.”

²⁰Moses naAaron oya ningi, ngaashi Omuwa e ya lombwele. Montaneho yomukwaniilwa nomalenga ge Aaron okwa yelutha ondhimbo ye e ta dhenge omulonga, nomeya agehe gamo oga shituka ombinzi.

²¹Oohi odha sile momulonga, nogwa li tagu nika nayi, nAayegipiti inaa vula we okunwa mo. MuEgipiti alihe omwa li mu na ombinzi.

²²Nena oompulile dhomukwaniilwa odhe shi ningi wo koonkondo dhuumpulile wadho, omukwaniilwa nokwa kukutike omwenyo gwe e vule nale. Okwa tindi okupulakena Moses naAaron, ngaashi Omuwa a tile.

²³Okwa shuna kuuwa we ye ina pupa ko kwaashika.

²⁴Aayegipiti ayehe oya hupu momunkulo gwomulonga, ya mone omeya gokunwa, oshoka oya li itaa vulu okunwa omeya gomomulonga.

²⁵Opwa piti omasiku gaheyali, Omuwa sho a dhenge omulonga Niili.