Read Oshindonga-Ombiimbeli Ondjapuki JOB 12 Bible Online

JOB 12 - Oshindonga-Ombiimbeli Ondjapuki bible

JOB 12

¹Job okwa yamukula ngeyi.

²Eeno, osho lela, one aantu, nuunongo otau ka sa pamwe nane!

³Ngame wo ondi na oondunge nde mu fa. Kandi shi oshikengelela showala. Olye inaa tseya iinima mbino ayihe?

⁴Onda yolwa kookuume kandje, nando ngame ohandi indile Kalunga e ta yamukula. Onda yolwa, nando ngame omuyuuki nomukeenashipo!

⁵Aalinawa otaa dhini oshiponga, omupya tagu adha ngoka ta gwile po.

⁶Aafuthi oye li mombili, naambo haa geyitha Kalunga, oye li nawa; oomboka haa humbata iikalunga miikaha yawo.

⁷Pula iinamwenyo, oyo notayi ku nongeke, nenge u pule oondhila dhokegulu.

⁸Popya niishitwa yokevi, oyo notayi ku lombwele, nenge oohi dhomefuta otadhi ku yelithile.

⁹Ayihe mbika oya tseya kutya Omuwa oye e yi shita.

¹⁰Omwenyo gwiishitwa ayihe ogu li miikaha ye, osho wo omufudho gwaantu ayehe.

¹¹Ngaashi okutsi ku hole okuuva, osho wo elaka li hole okulola iikulya.

¹²Oondunge otadhi monika mokati kaakokele; okukala nomwenyo omule otaku ku etele owino.

¹³Kalunga oye oluthithiya lwoondunge noonkondo, oku na uunongo nomayele.

¹⁴Kalunga ngele ta kumuna po, olye ta vulu okutungulula? Ngele ta tula omuntu mondjedhililo, olye te mu mangulula mo?

¹⁵Kalunga ngele ta kankeke omeya, otaku ya oshikukuta, nongele te ga etha, otaga kungulula evi.

¹⁶Kalunga oku na oonkondo noye omusindani aluhe; nakupukithwa nomupukithi ayehe oye li miikaha ye.

¹⁷Aagandjimayele ote ya fala mokusindika, naatokolihapu ote ya goyapaleke.

¹⁸Aakwaniilwa ote ya kutha oonkondo yaa mange we aantu, note ya ningi oonkwatwa.

¹⁹Aayambi ya luwa iinima yawo ote ya fala kiilongo, nota shundula aanankondo.

²⁰Ota mweneke aayinekelwa nota hulitha po omayele gaakuluntu.

²¹Aanenentu ote ya undulile mesithahoni, noonkondo dhaapangeli ote dhi hulitha po.

²²Ota holola puuyelele iinima yomomilema, nomilema ote dhi eta muuyelele.

²³Oti indjipaleke iigwana e te yi hanagula po; ote yi halakanitha noku yi pongeka.

²⁴Aapangeli yomuuyuni ote ya kutha omayele; ote ya pukithile mombuga mwaa na omapola.

²⁵Otaa pampadhala momilema mwaa na uuyelele, note ya telaganitha ya fa oonkolwi.