Read Oshindonga-Ombiimbeli Ondjapuki JOB 14 Bible Online

JOB 14 - Oshindonga-Ombiimbeli Ondjapuki bible

JOB 14

¹Omuntu a valwa komukiintu omasiku ge omafupi nogu udha uupyakadhi.

²Ota hapa ongongala nota ganya; okwa fa omuzizimba tagu matuka nota kana po.

³Omuntu a tya ngawo oto mu tongolola? Oto mu eta koshipala shoye, a pangulwe?

⁴Maantu ya nyata otamu zi tuu omuyelele? Itamu zi nando ogumwe!

⁵Omasiku gomuntu ogu uthwa nale, omwaalu gwoomwedhi dhe owe gu ngambeka; okwa tendelwa ongamba noita vulu oku yi konda.

⁶Onkee ano, kala wa fa waahe mu wete, opo a vululukwe po, sigo a thiki kethimbo lye ongomulongeli gwondjambi.

⁷Nomuti wo ogu na etegameno: ngele tagu kewa po, otagu tsapuka ishewe, niitayi yagwo iipe itayi pu po.

⁸Nando omidhi dhagwo tadhi kulupile mevi, noshithindi shagwo tashi sile mo,

⁹ihe ngele gwa mono omeya, otagu tsapuka ishewe iitayi iipe.

¹⁰Omuntu ota si noke na po we sha; ota fudha mo omufudho nolwa hulu.

¹¹Ngaashi omeya taga pwine metale, nenge omulonga tagu filala,

¹²osho ngeyi omuntu ta lala noita penduka po we. Manga egulu inaali hula po, aantu itaa papudhuka moomposi dhawo.

¹³Andola u langeke ndje ashike muusi, u holeke ndje, sigo ondjahi yoye ya kodha. Ando u holeke ndje mo ethimbo lyu uthwa e to ka dhimbulukwa ndje ihe konale.

¹⁴Omuntu ngele okwa si, ota kala ishewe e na omwenyo? Momasiku guudhigu wandje otandi tegelele, sigo emanguluko lyandje lya thiki.

¹⁵Oto ka ithana ndje notandi ku itaale; oto ka yuulukwa omushitwa gwoye.

¹⁶Oto ka tonatela onkatu yandje kehe, noito tala omayono gandje.

¹⁷Omayono gandje oto ga holeke mompunda; oto siikile oondjo dhandje.

¹⁸Ngaashi oondundu tadhi gu, omamanya taga halakana,

¹⁹omeya taga wegula omamanya nekunguluko lyomeya tali fulu po evi, osho to hanagula po etegameno lyomuntu.

²⁰Oto mu sindi sigo aluhe, nota kana po. Oto shundula oshipala she e to mu tidha po.

²¹Oyana ngele taa simanekwa, ite shi tseya, nongele taa dhinwa, ite shi mono.

²²Ota kala e na uuwehame molutu lwe noti ilili ye mwene.