Read Oshindonga-Ombiimbeli Ondjapuki JOB 15 Bible Online

JOB 15 - Oshindonga-Ombiimbeli Ondjapuki bible

JOB 15

¹Elifas Omuteman okwa yamukula ngeyi:

²Job, omunamayele ota gandja tuu eyamukulo lyaa na oondunge, nenge otu udhitha ela lye nombepo ompyu yokuuzilo?

³Ota ningi omaludhi gaa na shilonga, oohapu dhaa na sho tadhi kwatha?

⁴Ihe ongoye to hanagula po etilokalunga noto dhini okugalikana Kalunga.

⁵Oondjo dhoye otadhi holoka moohapu dhoye; oto landula okupopya kwaaniineya.

⁶Okana koye oko take ku pangula, hangame; omilungu dhoye mwene tadhi ku tompo.

⁷Ongoye omuvalwa gwotango mokati kaantu? Owa valwa, manga oondundu inaadhi holoka?

⁸Owa pulakenene oompangela dhaKalunga? Oto dhiladhila ongoye awike omunandunge?

⁹Oshike wa tseya, tse kaatu shi shi? Omatseho ogeni po u na kaatu ga na?

¹⁰Aakulupe naasamane yoomvi oye li nomokati ketu, aasamane aakuluntu nokuho.

¹¹Omahekeleko gaKalunga inage ku gwana, noohapu oontalala we dhi lombwelwa?

¹²Omolwashike omwenyo gwoye tagu ku thigi po, nomeho goye taga pakuma?

¹³Owa geela Kalunga, sho to pititha mo oohapu dha tya ngawo mokana koye?

¹⁴Omuntu a wape ngiini okukala omuyelele, omuvalwa komukiintu a ninge omuyuuki?

¹⁵Ngele nomaayapuki ye ini inekela mo nando ogumwe, negulu lyo lyene inali yela momeho ge,

¹⁶omuntu haye ngoka a nyata nokwa yonuka, ta nu uulunde ngaashi omeya?

¹⁷Job, pulakena ndje, ndi ku pukulule, nandi ku lombwele shoka nda mona.

¹⁸Aanamayele oya hokolola yo inaa holeka shoka ye shi uva koohekulu.

¹⁹Oyo ayeke ya li mo moshilongo; mokati kawo kamwa li omukwiilongo.

²⁰Omukeenakalunga oku li muudhigu omasiku agehe; uuwehame owe mu tegelela.

²¹Oonkugo nomahalutho otage ya momakutsi ge; uuna a fa a fudha po, omuhanaguli ote mu matukile.

²²Ita vulu okuhunuka mo momilema; oku uthilwa a se kegongamwele.

²³Ota telagana ta kongo iipalutha ye ina tseya esiku lyoshiponga li li popepi.

²⁴Uuwehame nuumbanda otau mu tilitha, otau mu adha ngaashi ehomono tali akele omukwaniilwa.

²⁵Okwa ganeke omaako ge, a kondjithe Kalunga, nokwi inenepekele Omunankondoawike.

²⁶Otu ukilile Kalunga e na othingo ya taganana nehuuyanza lya kola.

²⁷Oshipala she okwe shi gwayeka omagadhi; omatundji ge oga pama,

²⁸ihe ota ka kala miilando ya yonuka po nomomagumbo gaa na aantu; oga ethiwa ga ningi oondumba dhomamanya.

²⁹Oye ita yambapala we; uuyamba we itau kalelele, nomaliko ge itaga ihana we noshilongo.

³⁰Ita zi mo we momilema; omulilo otagu fike iitutuma ye, nomufudho gwomokana kaKalunga otagu mu tidha po.

³¹Inamu mu etha i ifundjaleke netalaleko lyaa na oshilonga, oshoka ita ka likola sha.

³²Ota ka lemba, manga e li metifa lyokukala kwe; ota ka ganya ngaashi oshitayi ye ita penduka po we.

³³Ota ka fa omuviinu tagu yagumuka omagongwa, nokwa fa omuolivi tagu yagumuka oonsheno.

³⁴Aakaanakalunga kaye na oluvalo, nomulilo otagu lungunitha po omatsali gaaholi yoombumbo.

³⁵Otaa kokitha uupyakadhi e taa vala omalwa; otaa kokitha omakotokelo meni lyawo.