Read Oshindonga-Ombiimbeli Ondjapuki JOB 16 Bible Online

JOB 16 - Oshindonga-Ombiimbeli Ondjapuki bible

JOB 16

¹Job okwa yamukula ngeyi:

²Iinima ngaambika onde yi uva nale; ne amuhe aahekeleki mwaa na shilonga.

³Oohapu dheni odhi na tuu ehulilo? Oshike tashi mu endelelitha okuyamukula?

⁴Ngame wo ote vulu okupopya nde mu fa, ando one mwa li ngame, ote vulu okupopya, ndi mu tompe noku mu pukapukila omutse gwandje.

⁵Oohapu dhandje otadhi vulu oku mu laadhipika; etalaleko tali zi mokana kandje, otali vulu okufudhitha.

⁶Ihe ngele tandi popi, uuwehame wandje itau pepelele, nongele tandi mwena, itau pu po.

⁷Kalunga, owa hepeke ndje unene; oluvalo lwandje owe lu hanagula po.

⁸Owa kwata ndje nowa ningi ombangi yokutamaneka ndje; onda ningi omasipa gowala, naantu otaa tala kutya ongame omuyoni.

⁹Kalunga ota kondjitha ndje, ota tuula ndje mondjahi ye noti ikokotele ndje omayego; ota tongolola ndje nda fa omutondi gwe.

¹⁰Aantu oya makulila ndje omakana nokuninga ndje oshipwedhela. Otaa dhenge ndje koompanda ya dhina ndje, otaa imanga okapandi, ya hangene ndje.

¹¹Kalunga okwa gandja ndje miikaha yaakolokoshi noku umbile ndje momake gaakaanakalunga.

¹²Onda li ndi na ombili, ihe okwa nyanyagula ndje; okwa kwata ndje e ta hata ndje po. Okwa ningi ndje oshishonekwa she.

¹³Oondjumbeta dhe odha kunduka ndje, niikuti ye oya yaha ndje miitiyanathigo pwaa na henda, nonyango yandje oya tikile pevi.

¹⁴Okwa matukile ndje omathimbo nomathimbo nokwa ponokele ndje ongomukwiita omuhahu.

¹⁵Mokusa oluhodhi ondi izaleke ehahi, nesimano lyandje onde li fumvike montsi.

¹⁶Oshipala shandje osha pembe kokulila, nomulema omuluudhe ogwa kunduka oombafu dhandje,

¹⁷ihe natango tuu iikaha yandje oya kwatunuka kondjahi, nomagalikano gandje omayelele.

¹⁸Evi, ino siikila uuwinayi mbo nda ningilwa! Ino etha okulila kwandje ku mwenekwe!

¹⁹Tala, ombangi yandje oyi li megulu; omupopili gwandje oku li muule wokombanda.

²⁰Ookuume kandje otaa yolo ndje. Omahodhi gandje otaga tondokele kuKalunga.

²¹Ando pu kale ngoka ta galikanene ndje kuKalunga, ngaashi omuntu ta galikanene kuume ke!

²²Oku na owala oomvula dhimwe, ndi ye molweendo itaandi galuka we.