Read Oshindonga-Ombiimbeli Ondjapuki JOB 20 Bible Online

JOB 20 - Oshindonga-Ombiimbeli Ondjapuki bible

JOB 20

¹Sofar Omunaema okwa yamukula ngeyi:

²Job, omatedho gandje owe ga piyaganeke, ite vulu okukala inaandi yamukula.

³Ondu uvu oohapu dhomusheko dha sitha ndje ohoni, ihe pamayele gandje ote tseya, nkene te yamukula.

⁴Owe shi tseya okuza konale, okuza omuntu sho a shitilwa muuyuni,

⁵kutya enyanyu lyomulunde nolyomukeenakalunga olyo efupi.

⁶Nando uuntsa we u tse kegulu, nomutse gwe gu adhe kiikogo,

⁷ota kana po a fa onyata ye. Mboka ya li haye mu mono, otaa ka tya: “Oku li peni ano?”

⁸Ota tuka po ngondjodhi noita monika we, ota wilola po ongemoniko lyuusiku.

⁹Omeho ge mu mwene, itage mu mono we, nopehala mpo a li, ita monika po we.

¹⁰Oyana otaa ka panga uukuume naafupi notaa ka shunithila ooyene eliko lyawo ndyo e ya yugile.

¹¹Oonkondo dhomuugundjuka we ndho dha li momasipa ge, otadhi ka ya mevi pamwe naye.

¹²Uulunde ou na omulyo mokana ke, note u holeke kohi yelaka lye.

¹³Ina hala oku u etha, ote u kaleke mokana ke.

¹⁴Ihe iikulya mbika otayi shituka onyango mela lye, notayi ningi uuzigo wontoka meni lye.

¹⁵Eliko e li lile, ote li kungu mo, Kalunga ote li mu kungitha mo.

¹⁶Okwa fa a lya uuzigo wontoka; omayego gefu otage mu dhipaga.

¹⁷Ita ka mona omilonga noompompolonga tadhi kunguluka omahini nomagadhi goonyushi.

¹⁸Ota gandja po ashihe shoka a longele nuudhigu, noita ka nyanyukilwa iihohela yiipindi ye.

¹⁹Oshoka okwa hepeke oohepele nokwe dhi ethele moluhepo e ta lala omagumbo inee ga tunga.

²⁰Uufukedhi we itau lotele; eliko lye itali mu kwatha sha.

²¹Olwiho lwe inalu mu thigila po nando osha, onkee uuyamba we itau kalelele.

²²Metifa lyuuyamba we omupya otagu mu kwata; oluhepo olululu otalu mu matukile.

²³Uuna a hokwa okuudhitha ela lye, Kalunga ote mu tumine ondjahi ye ompyu note mu lokithile ongeyo ye.

²⁴Nando na fadhuke po iikondjitho yosheela, omivi otadhi mu yaha.

²⁵Oti itona iikuti, eholongo tali tayima otali tyuula mehuli lye; ehaluko otali mu kwata.

²⁶Omilema thokothoko otadhi langele emona lye, nomulilo itaagu dhimi otagu mu lungunitha po, nakehe shoka sha kala megumbo lye, otashi pi po.

²⁷Egulu otali holola omayono ge puuyelele, nevi otali mu tsile ondumbo.

²⁸Efundja otali ka kungulula po egumbo lye; uuyamba we otau yi nomeya mesiku lyondjahi yaKalunga.

²⁹Shika osho oshipewa shomukeenakalunga, uuthiga e u tulilwa po kuKalunga.