Read Oshindonga-Ombiimbeli Ondjapuki JOB 22 Bible Online

JOB 22 - Oshindonga-Ombiimbeli Ondjapuki bible

JOB 22

¹Omuntu ota vulu tuu okwoopalela Kalunga? Omunandunge ote mu kwatha tuu sha?

³Ngele ngoye omuyuuki, otashi kwatha shike Omunankondoawike? Ota likola po shike, oondjila dhoye ngele kadhi na oshipo?

⁴Kalunga ite ku geele molwaasho ho mu tila, noite ku fala koompangu molwaasho ho mu simaneke.

⁵Omayono goye ogo ga lundu pombanda. Uukolokoshi woye owo waa na ehulilo.

⁶Mumwanyoko owe mu pula oongunga pwaa na etompelo nowa hula omunankayi omizalo dhe.

⁷Omusinota owe mu tindile omeya, nomusindjala ino mu pa iikulya,

⁸nando ongoye omulumentu omuyamba, omunedhina moshilongo.

⁹Omuselekadhi owe mu tidha po iikaha yowala, nowa keelele oothigwa dhi kwathwe.

¹⁰Onkee oomwigo odhe ku tegelwa nodhe ku kunduka; otadhi ku halutha ombaadhilila.

¹¹Omolwaasho ku na omilema waa dhi wete nefundja lyomeya tali ku siikile.

¹²Kalunga ke li megulu lyokombandambanda? Tala noonyothi, nkene dhi li muuleeleka.

¹³Ngoye oto pula: “Kalunga ota tseya shike? Okwa siikilwa kiikogo iiluudhe — ota vulu ngiini oku tu tokola?

¹⁴Iikogo otayi mu siikile, opo kee tu mone, note ende momunkulo gweyalelo.”

¹⁵Owa hala okukala momadhiladhilo gaakaanakalunga?

¹⁶Oya kuthwa po, manga ethimbo lyawo inaali thika, nomakankameno gawo oga kungululwa po kefundja.

¹⁷Oya lombwele Kalunga ya ti: “Za po putse! Omunankondoawike ote tu ningi ngiini?”

¹⁸Oye tuu ngoka a udhitha omagumbo gawo niinima iiwanawa, ihe omatedho gawo ogi iyukila.

¹⁹Aayuuki otaa mono eyonuuko lyawo e taa nyanyukwa, naakaanashipo otaa ya nyonkele taa ti:

²⁰“Eeno, aatondi yetu ya halakanithwa po, nuuyamba wawo wa fikwa po komulilo.”

²¹Igandja kuKalunga, opo u kale u na ombili naye, nena oto ka kala u li nawa.

²²Taamba omapukululo ge e to pungula oohapu dhe momutima gwoye.

²³Ngele oto galukile kOmunankondoawike nongele oto etha uulunde u kombwe mo maandjeni, nena oto ka hepuluka.

²⁴Ngele oto ekelehi oshingoli shoye montsi, oshingolilela shokuOfir to shi umbile molusilu lu li mokati koondundu,

²⁵nena Omunankondoawike ota ningi oshingoli shoye, oshisiliveli shoye sha hogololwa.

²⁶Okuza mpoka oto ka panda Omunankondoawike noto ka taalelitha oshipala shoye kuKalunga.

²⁷Uuna to galikana, ote ku yamukula, noto longo ngaashi wu uvaneke.

²⁸Omatokolo goye otaga ka gwanithwa, nuuyelele otau minikile mondjila yoye.

²⁹Aantu ngele taa kuthwa kiipundi, nena oto ti: “Na simanekwe!” Kalunga nota hupitha aadhinwa.

³⁰Kalunga ota hupitha omukeenashipo. Eeno, nangoye wo ote ku hupitha, ngele iilonga yoye oyu uka.