Read Oshindonga-Ombiimbeli Ondjapuki JOB 29 Bible Online

JOB 29 - Oshindonga-Ombiimbeli Ondjapuki bible

JOB 29

¹Job okwa tameke ishewe okupopya.

²Akutu, ando onda li ngaashi momasiku ngeyaka, Kalunga sho a li ta gamene ndje!

³Kalunga okwa kala pungame nokwa minikile ndje nuuyelele we, nomomilema onde endithwa kuye.

⁴Eeno, omasiku ngeyaka onda li ndi na uukuume naKalunga, nokwa yambeke egumbo lyandje.

⁵Omunankondoawike okwa li pamwe nangame, naamwandje oya li ya kunduka ndje.

⁶Onda li ndi na omukando ogwindji, noondundu odha kungulukithile ndje omagadhi gooholivi.

⁷Uuna nda yi koshigongi shaakuluntu yoshilando nonda kuutumba mpo hapu gongala aantu,

⁸aagundjuka ngele ya mono ndje, oya yapukile ndje, naasamane aakulupe oya simaneke ndje ya thikama.

⁹Aanenentu oye etha okupopya noya mutike omakana gawo.

¹⁰Omawi goomvalekele oga thiti, nomalaka gawo oga kakatele koondaathelo.

¹¹Kehe ngoka u uvu ndje te popi, okwa popile ndje muuwanawa, naambo ya mono ndje, oya hokolola ndje.

¹²Oshoka onda hupitha oohepele tadhi kugile ndje ekwatho, noothigwa ndhoka dhaa na omupopili.

¹³Omuntu e li muudhigu uunene, okwa pandula ndje; onda nyanyudha omwenyo gwomuselekadhi.

¹⁴Onda longo pashili nopauyuuki nonde u dhiginine ngaashi omuzalo gwandje.

¹⁵Onda li omeho gaaposi nomagulu giilema.

¹⁶Onda ningi he yaakwanaluhepo nonda gama komukwiilongo e li muudhigu.

¹⁷Onda teyagula po oonkondo dhaakolokoshi nonde ya yugu iihakanwa yawo.

¹⁸Onda dhiladhila, otandi ka kala nomwenyo omule notandi ka sila megumbo lyandje.

¹⁹Onda li nda fa omuti gu na omidhi dha adha komeya niitayi yagwo oya gwilwa komume.

²⁰Kehe omuntu okwa li ha simaneke ndje, niikondjitho yandje oya li ya kola.

²¹Aantu oya pulakene ndje nokumwena noya taamba omayele ngoka nde ya pe.

²²Ngele nda popi, inaa tya we sha; oohapu dhandje oye dhi taamba nawa.

²³Oya tegelele ndje ngaashi omunepya a tegelela omvula yontemuna.

²⁴Onde ya uvile ohenda, sho ya tyololoka; enyanyu moshipala shandje olye ya tsu omukumo.

²⁵Onde ya kwatele komeho nonda kuutumba nda fa omuwiliki gwawo. Onda li nda fa omukwaniilwa mokati komatangakwiita ge nonda li omuhekeleki gwoonakulila.