Read Oshindonga-Ombiimbeli Ondjapuki JOB 31 Bible Online

JOB 31 - Oshindonga-Ombiimbeli Ondjapuki bible

JOB 31

¹Onda ningi etokolo lya kola, ndaa tale omukadhona nde mu haluka.

²Oshoka omuntu ota pewa shike kuKalunga, Omunankondoawike ota futu ngiini iilonga ye?

³Eyonuuko otali adha omukeenakalunga, noshiponga oongoka ha longo uukolokoshi.

⁴Oondjila dhandje ke dhi wete ando nokutseya ashihe shoka te longo?

⁵Inandi hala okuya miifundja nenge ndi ye mokukotokela.

⁶Kalunga na koneke ndje nawa nota ka mona kutya nani ngame kandi na uusama.

⁷Ngele nda puka mo mondjila nda hilwa kokahalu komeho nenge iikaha yandje ya nyatekwa kuulunde,

⁸nena shoka nda kuna, nashi liwe po kuyalwe, niilya yandje nayi vudhwe mo.

⁹Ngele onda fuulwa komukiintu gulwe nenge nda li te petapeta poontu dhaashiinda,

¹⁰nena mukadhandje na ninge gwomulumentu gulwe.

¹¹Shika osho iihunalela, uulunde tau pangulitha omuntu.

¹²Osho omulilo gwehanagulo tagu lungunitha po eliko lyandje alihe.

¹³Inandi ekelahi omatamaneko gaapiya yandje aamati naakadhona, uuna taa pe ndje uusama.

¹⁴Ngele onde shi ninga, otandi ka ninga ngiini, uuna Kalunga ta adha ndje? Otandi ka tya ngiini, Kalunga ngele ta pangula ndje?

¹⁵Kalunga ngoka a shiti ndje, oye wo e ya shita. Oye awike e tu shitila momala goomeme.

¹⁶Inandi tinda okukwatha oohepele, nomuselekadhi inandi mu thiga po owala.

¹⁷Inandi etha oothigwa dhi ye nondjala, ngame ndi na iikulya.

¹⁸Onde dhi tekula nda fa he okuza muugundjuka wandje, nokokuza kevalo lyandje onda sile aaselekadhi oshimpwiyu.

¹⁹Uuna nda mono omuntu e na onkayi nenge omukwanaluhepo kee na ekumbyatha,

²⁰onde mu pe oonguwo dha za momafufu goonzi dhandje. Oye nokwa pandula ndje unene.

²¹Ngele ando ondi na oohapu nothigwa e tandi popi iifundja mompangu,

²²nena iikaha yandje nayi teke, niipepeti yandje yi dhomoke.

²³Omolwokutila egeelo nuuyelele waKalunga, itandi vulu okuninga ngaaka.

²⁴Inandi inekela iimaliwa, nenge ndi tale oshingoli sha hogololwa kutya osho egameno lyandje.

²⁵Inandi itangela uuyamba wandje nakehe shoka sha longwa kiikaha yandje.

²⁶Inandi galikana etango, sho tali eta oonte dhuuyelele, nenge omwedhi mokutoka kwagwo.

²⁷Inandi pukithwa nenge ndi hongololwe okusimaneka ayihe mbika.

²⁸Oshoka okulonga ngeyi okwo oondjo tadhi pangulitha omuntu. Shika ando otashi holola kutya inandi inekela Kalunga.

²⁹Nando esiku limwe inandi nyanyukilwa oshiponga shaatondi yandje, noinandi shambukilwa uudhigu we ya adha.

³⁰Inandi popya oohapu tandi ya halele ethingo nenge eso.

³¹Ayehe mboka ye li megumbo lyandje, oya tseya kutya kaku na ngoka nde mu panga iikulya.

³²Inandi tokelitha omukwiilongo momapandaanda, oshoka egumbo lyaandjetu olye egulukila aluhe oondjendi.

³³Inandi holeka oondjo dhandje nda fa aantu yalwe; inandi kaleka omayono gandje momutima inaandi ga holola.

³⁴Inandi tila kutya aantu otaye shi tala ngiini; inandi mwena, ihe onda yi pondje.

³⁵Oku na tuu omuntu ta pulakene sho te ti? Ngashingeyi otandi nyola eipopilo lyandje; Omunankondoawike na yamukule ndje, nomutamaneki gwandje na nyolele omatompelo ge membo.

³⁶Otandi ga nateke komapepe gandje notandi ga zala ngaashi oshishani.

³⁷Ondi na okuhokololela Kalunga ayihe mbyoka nde yi ninga, notandi yi kuye ngaashi komukwaniilwa.

³⁸Ngele ando onda longele owala epya lyandje inaandi li futila,

³⁹ando onda lile iipalutha mbyo ya zi mo, ngame tandi etha aalongi yalyo ya se ondjala,

⁴⁰nena ando peha lyokumena iilya niishokelya, nali mene oondjoho nomano. Oohapu dhaJob odha hulile mpaka.