Read Oshindonga-Ombiimbeli Ondjapuki JOB 36 Bible Online

JOB 36 - Oshindonga-Ombiimbeli Ondjapuki bible

JOB 36

¹Idhidhimika natango kashona, u pulakene. Ondi na oshindji shokupopya peha lyaKalunga.

³Ondi na omayele ga za kokule; Omushiti gwandje oye omuyuuki.

⁴Kala wa tseya kutya oohapu dhandje kadhi shi dhiifundja; nguka e li koshipala shoye, oye omulumentu omunandunge.

⁵Kalunga oye omunankondo, ihe ina dhina aantu; oha dhiginine edhiladhilo lye.

⁶Ite etha aalunde ya kale nomwenyo; aathiminikwa ote ya uthile pauyuuki.

⁷Ota gamene aayuuki; ote ya kwaniileke pamwe naakwaniilwa e te ya simaneke sigo aluhe.

⁸Ihe aantu ngele oya tulwa momalyenge notaa geelelwa omayono gawo,

⁹nena Kalunga ote ya ulukile oondjo dhawo nuuntsa wawo.

¹⁰Ote ya pukulula note ya lombwele, ye ethe uuwinayi wawo.

¹¹Ngele otaa vulika kuKalunga notaye mu longele, omasiku gawo otaga ka hulila melago nomuuwanawa.

¹²Ihe ngele itaa pulakene, otaa ka sa kegongamwele notaa hulu po omoluugoya wawo.

¹³Aakaanakalunga otaa kaleke ondjahi momitima dhawo, nongele ye li muudhigu, itaa pula Kalunga ekwatho.

¹⁴Otaa si manga aagundjuka, otaa si ya fa aahondeli.

¹⁵Kalunga ota putudha omuntu muuwehame we note mu tonatitha muudhigu we.

¹⁶Kalunga okwe ku kuthile muudhigu e te ku tula pehala lyaa na iiponga nokoshililo shi na iikulya yoludhi kehe.

¹⁷Ihe nena oto geelwa nepangulo tali adha aayoni, egeelo otali ku ukilile.

¹⁸Kotoka, waa fundjalekwe keliko; oombumbo dhaahe ku pukithe.

¹⁹Uuyamba woye noonkambadhala dhoye otadhi ku kwatha tuu, waa ye moshiponga?

²⁰Ino yuulukwa uusiku mbwiyaka, uuna iigwana tayi ka pangulilwa eso.

²¹Tonata, waa ye muulunde mboka wa fa wa hala okuhogolola peha lyokweehamekwa.

²²Kalunga oye a simana noku na oonkondo dha shiga ko. Oye omuputudhi omunene.

²³Kaku na ngoka ta vulu okupa Kalunga omayele nenge a tye, okwa puka.

²⁴Dhimbulukwa, u mu simanekele iilonga ye; aantu otaye yi tanga momaimbilo.

²⁵Aantu ayehe oye yi mona, ihe kaku na ngoka e yi uvite ko.

²⁶Kalunga omunene ngiini! Oondunge dhetu otadhi nyengwa oku mu tseya. Omwaalu gwoomvula dhe itatu vulu oku gu yalula.

²⁷Kalunga oye ta gongele omata gomeya ngoka taga ningi omvula moonzigi.

²⁸Iikogo otayi pooka omeya, niihomo otayi ya kaantu ayehe.

²⁹Olye ta tseya, nkene ta tula ko iikogo kegulu nonkene ta ndunduma muyo?

³⁰Tala, nkene ta adhimitha oombadhi, nuuleeleka wefuta ote u kaleke momilema.

³¹Kalunga ta pangula iigwana, oye ote yi pe wo eloolo lyiikulya.

³²Ota kutha olwaadhi niikaha ye note lu lombwele lu akule.

³³Endundumo lye otali tetekele oshikungulu, niimuna wo oya tseya eholoko lye.