Read Oshindonga-Ombiimbeli Ondjapuki JOB 37 Bible Online

JOB 37 - Oshindonga-Ombiimbeli Ondjapuki bible

JOB 37

¹Eeno, molwaashika omwenyo gwandje ogwa nuka mo, notagu yi pehala lyagwo.

²Pulakeneni ewi lyaKalunga, endundumo ndyoka tali zi mokana ke.

³Ota halakanithile oombadhi kegulu note dhi unzile sigo okooha dhuuyuni.

⁴Nena otaku uvika endundumo lyewi lye; oye omukwaniilwa ta ndunduma, noombadhi otadhi shela.

⁵Kalunga ota ndunduma pamukalo omukumithi; ota longo iikumitha itaatu vulu oku yi uva ko.

⁶Ota lombwele oompawe dhi gwile pevi, nomvula ote yi puukitha.

⁷Aashitwa ye ayehe naa tseye iilonga ye. Oye ota mweneke iilonga yaantu.

⁸Iiyamakuti otayi hiti momakololo gayo notayi kala momahala gayo.

⁹Oshikungulu otashi tukuluka, nombepo otayi zi uutalala.

¹⁰Omufudho gwaKalunga otagu kukutike omeya e taga ningi iikangwa, nomafuta omanene otaga hekele.

¹¹Iikogo ote yi humbatitha omeya note yi udhitha oombadhi.

¹²Kewiliko lye otadhi shela nevi alihe, dhi gwanithe shoka e dhi lombwele.

¹³Kalunga ota lokitha omvula, a geele aantu nenge wo a holole ohole ye.

¹⁴Job, pulakena! Ilongelela, ndhindhilika iilongankumwe yaKalunga!

¹⁵Owa tseya kutya Kalunga ote enditha ngiini iikogo, nonkene ta shelitha oombadhi?

¹⁶Owa tseya, nkene iikogo tayi mweluluka kegulu? Mbika oyo iilonga iikumithi yaKalunga.

¹⁷Ngoye oho hepekwa kuupyu, uuna ku na ombepo ya pupyala.

¹⁸Oto vulu tuu okukwatha Kalunga, a yale egulu noku li koleka li fe osheela sha yaminwa?

¹⁹Tu longa shoka tu na okulombwela Kalunga; katu shi wo shoka tu na okupopya.

²⁰Ngame ite vulu okupopya naKalunga; omolwashike ndi na oku mu pa ompito, a yone ndje po.

²¹Aantu itaa vulu okutongolola etango; uuyelele walyo otau togo omeho gawo, uuna egulu lya yela sheke.

²²Eadhimo enene otali monika kuumbangalantu, nuuyelele waKalunga otau tu tilitha.

²³Omunankondoawike otatu nyengwa oku mu adha; oye omuyuuki nomunashili mokukalathana kwe naantu.

²⁴Onkee ano aantu naye mu simaneke, oshoka ita hokwa aantu mboka yi ishi oondunge.