Read Oshindonga-Ombiimbeli Ondjapuki JOB 38 Bible Online

JOB 38 - Oshindonga-Ombiimbeli Ondjapuki bible

JOB 38

¹Nena Omuwa okwa yamukula Job moshikungulu.

²Ongoye lye to pilaaleke omayele gandje noohapu dhaa na oondunge?

³Ilongekidha ngaashi omulumentu, u yamukule omapulo gandje.

⁴Owa li peni, sho nda shiti uuyuni? Lombwela ndje, ngele ou na ontseyo yasha.

⁵Olye a tokola uunene wawo? Olye e u yeleke nondjelekongodhi?

⁶Evi olya thikamekwa po koshike? Olye a dhike omakankameno galyo?

⁷Esiku ndiyaka oonyothi dhongula odhi imbi, naayengeli oya ligola kenyanyu.

⁸Olye e edhile po iiyelo yefuta, uuna omeya ga pimpuka mo mela lyayina?

⁹Ongame nda siikile efuta niikogo nonde li gonyene momilema omiluudhe.

¹⁰Onde li ningile oongamba nonde li kaleke handiya yomiyelo dha patekeka.

¹¹Onde li lombwele nda ti: “Opo to hulile mpa! Omakuthikuthi goye opo taga hulile mpa.”

¹²Job, mokukalamwenyo kwoye owa lombwelele uusiku u she?

¹³Owa vulile okulombwela eluwa li tende nokutukulutha mo aalunde momaholameno gawo?

¹⁴Uuyelele wetango otau minikile iikulundundu nomasilu gevi ngaashi omagonyoto moonguwo nenge omandhindhiliko moshihotekitho.

¹⁵Aalunde otaa togwa kuuyelele walyo notau ya keelele kiilonga yuukolokoshi.

¹⁶Owa yile sigo okoonza dhefuta nenge u adhe sigo okondaandelo yalyo?

¹⁷Owu ulukilwa omiyelo dhokuusi nenge u entamene momilema omiluudhe thokothoko?

¹⁸Owa tseya uuyuni mpo u thike? Lombwela ndje, ngele owa tseya ayihe mbika.

¹⁹Ondjila yokuya kaandjawo yuuyelele ou yi shi, nenge kaandjawo yomilema owa tseya ko?

²⁰Oto vulu tuu okweenditha uuyelele nokugalula omilema?

²¹Eeno, oto shi vulu, oshoka ngoye omuntu gwonale, noomvula dhoye odhindjidhindji.

²²Owe enda tuu maandjawo yuutalala, nenge u tale mompungulilo yoompawe?

²³Mbika onde yi pungulile omathimbo guudhigu, oongoka goontamanana nogiita.

²⁴Owa talela po ehala mpo etango hali piti, naampo ombepo yokuuzilo hayi ziilile?

²⁵Oku na tuu ngo a vulu okupalela omvula oompompolonga nenge okuwilika omityalakata?

²⁶Oku na tuu omuntu a lokithile omvula moshilongo shaa na aantu, nenge mombuga yowalawala?

²⁷Olye ta vulu okututika ombuga nomalondo nokumenithila mo omwiidhi omutalala?

²⁸Omvula oyi na he, olye a gwitha omume?

²⁹Olye yina yiikangwa noyombambi?

³⁰Omeya otaga kukuta ga fa emanya notaga hekele kombanda yefuta.

³¹Omanyuku oto vulu oku ga mangela kumwe? Oto vulu okumangulula Okalimbanombwa?

³²Oto vulu okuholokitha po Ekaladhidhi pomathimbo galyo nokweenditha Hungilila noyana?

³³Oompango dhomewangandjo ou dhi shi, nenge oto vulu oku dhi longitha kombanda yevi?

³⁴Iikogo otayi vulika tuu kelombwelo lyoye, e tayi tameke okuloka?

³⁵Oto vulu okulombwela oombadhi dhi adhime? Dhi tye ando: “Otwa longo, ngaashi we tu lombwele.”

³⁶Olye a pe iikogo oondunge, newangandjo olye e li nongeke uunongo?

³⁷Olye e na oondunge dha gwana okuyalula iikogo? Olye ta pimpi iiyuma yokegulu, yi pooke omvula?

³⁸Omvula nge ya loko, evi otali mbandele.

³⁹Oto vulu tuu okukwatela oonime iihakanwa yadho, nenge u kutithe oonime oongundjuka,

⁴⁰ngele tadhi holama momakololo, nenge tadhi lala dha langela moomvugo dhadho?

⁴¹Olye ha palutha omadhilakola, uuna taga tuka ga sa ondjala, nuuna uumwana tau ithana ndje notau pula ndje iikulya?