Read Oshindonga-Ombiimbeli Ondjapuki JOB 4 Bible Online

JOB 4 - Oshindonga-Ombiimbeli Ondjapuki bible

JOB 4

¹Nena Elifas Omuteman okwa yamukula ngeyi.

²Job, ngele oku na gumwe a hala a popye nangoye, oto vulwa ando?

³Dhiladhila, nkene wa pukulula oyendji nowa pameka omaako ga gwa.

⁴Oohapu dhoye odha kumike aatenguuki; owa kankameke mboka ya tonyala.

⁵Ihe ngashingeyi sho wa adhika kuudhigu, owa tyololoka; sho we ku gumu, owa haluka.

⁶Okulongela Kalunga hakwo wi inekela? Oondjila dhoye dhaa na oshipo, nadhi kale etegameno lyoye.

⁷Dhiladhila nawa, olye a kala kee na mbudhi a adhika komupya? Openi pwa li omuyuuki a yonwa po?

⁸Onda koneke kutya mboka haa papula iimpungu yuudhudhu, oyo wo mboka haa kunu uukolokoshi notaye u teya wo.

⁹Otaa ka pepwa po komufudho gwaKalunga, nehwamo lyondjahi ye otali ya hanagula po.

¹⁰Oonime oohahu ohadhi gono nohadhi pumbu kondjala, ihe omayego goonime oongundjuka oga teywa mo.

¹¹Onime otayi si, ngele kayi na sho tayi li, nuunimona otau halakana.

¹²Elaka olya popitha ndje meholamo; omakutsi gandje ogu uvu enongono.

¹³Oondjodhi otadhi ende mokati kuusiku, uuna oomposi tadhi kwata omuntu.

¹⁴Uumbanda nekakamo olya kwata ndje, nonda dhekweta okuza komutse sigo okoompadhi.

¹⁵Ombepo oya dhenge ndje moshipala, nolufufu kolutu lwandje olwa shindalala.

¹⁶Oya mwena, ihe ine vula okukoneka kutya oshike shoka. Ongoshihehelela shi li momeho gandje. Ondu uvu ewi tali nongona tali ti:

¹⁷“Nakukasa ota ningi tuu omuyuuki koshipala shaKalunga? Nenge omuyelele momeho gomushiti gwe?

¹⁸Kalunga ini inekela naapiya ye yomegulu, nomaayengeli ye ota mono mo omapuko.

¹⁹Ongiini ando mboka ya shitwa neloya, oomboka yu umbwa montsi yevi, mbo taa yonuka po mbala ya fa embilimbili?

²⁰Otaa tetagulilwa methimbo lyokuza ketendo lyeluwa sigo okeningino lyetango. Otaa yonuka po sigo aluhe noitaa dhimbulukiwa we.

²¹Uuyamba wawo auhe owa yiwa nawo; otaa si yaa na oondunge.”