Read Oshindonga-Ombiimbeli Ondjapuki JOB 6 Bible Online

JOB 6 - Oshindonga-Ombiimbeli Ondjapuki bible

JOB 6

¹Uudhigu nuuwehame wandje ando u yelekwe koshiviha,

³ando uudhigudhigu u vule ehekevi lyopooha dhefuta, omolwasho oohapu dhandje inadhi dhiladhilwa nawa.

⁴Iikuti yOmunankondoawike oyi li mungame, uuzigo wayo otau ehameke ndje; omatilitho gaKalunga otaga halutha ndje.

⁵Ongolo ohayi lili tuu, ngele oyi li pomwiidhi, nenge ondumetana ohayi komo, uuna yi li pelonzi?

⁶Iikulya yomunya otayi liwa tuu, ngele inayi toywa, nenge muutokele weyi omu na tuu omulyo gwasha?

⁷Itandi vulu oku yi lya, iikulya ya tya ngaaka otayi alukitha ndje.

⁸Kalunga oshike itaa yamukula eindilo lyandje, a pe ndje shoka nda hala?

⁹Kalunga okwa hokwa okunyanyagula ndje, okwa ganeke oshikaha she, a tete ndje.

¹⁰Nando ongaaka, ote kala nda nyanyukwa, eeno, ote nuka kenyanyu mokati kuuwehame uunene; ine dhina oohapu dhOmuyapuki.

¹¹Omukumo gwandje oguni, ndi kale ndi na etegameno? Onakuyiwa yandje oyini, ndi kale ndi idhidhimika?

¹²Ondi na oonkondo nda fa emanya? Olutu lwandje oshiyela?

¹³Itandi vulu we okwiikwatha ngame mwene; kape na ngo ta hupitha ndje.

¹⁴Omuntu e li muudhigu ota pumbwa ekwatho lyookuume, nonando ne ethe Omunankondoawike.

¹⁵Ihe ne, ookuume kandje, omwa fundju ndje, omwa fa omilonga tadhi pwine, uuna kwaa na mvula,

¹⁶uuna omeya gadho itaaga tondoka, sho ga ningi iikangwa nolumi talu ga hekelitha.

¹⁷Ihe uupyu ngele we ya, otadhi hengumuka.

¹⁸Omasilu gomilonga otaga uka huka naahwiyaka notaga londo pombanda, sigo ga hulu.

¹⁹Oongamelo tadhi zi kuTema otadhi kongo omeya, aahalithi Aasheba oye na etegameno,

²⁰ihe etegameno lyawo otali kanene momilonga dha pwina.

²¹Ngame otii mu tala mwa fa omilonga ndhoka, omu wete oshiponga shandje nomwa haluka.

²²Inandi mu pula, mu pe ndje sha, ine indila nando osha shomeliko lyeni.

²³Inandi mu pula, mu hupithe ndje miikaha yomutondi nenge yakayamukulwa.

²⁴Eewa ano, nongekii ndje, mu lombwele ndje omapuko gandje. Otandi ngungumana e tandi mu pulakene.

²⁵Oohapu dhi na uukwashili otadhi tompola sha. Ihe ne oompata dheni otadhi kwatha shike?

²⁶Otamu dhiladhila okupopya kwandje ombepo yowala tayi pepe, ihe omolwashike tamu yamukula omuntu a kanitha omukumo?

²⁷Otamu umbile oothigwa iihogololitho notamu iyambapaleke neliko lyakuume keni.

²⁸Ngashingeyi talii ndje nawa. Itandi mu fundju.

²⁹Omwa ya kokule unene. Etheni uugoyoki. Inamu pangula ndje. Inandi puka.

³⁰Elaka lyandje oli na uukolokoshi? Eiyuvo lyandje itali vulu ando okuulukila ndje epuko?