Read Oshindonga-Ombiimbeli Ondjapuki OMAPISALOMI 103 Bible Online

OMAPISALOMI 103 - Oshindonga-Ombiimbeli Ondjapuki bible

OMAPISALOMI 103

¹Episalomi lyaDavid Omwenyo gwandje, hambelela Omuwa! Ashihe shi li mungame, nashi simaneke edhina lye eyapuki!

²Omwenyo gwandje, hambelela Omuwa! Ino dhimbwa uuwanawa we.

³Oye ta dhimi po oondjo dhandje nota aludha uuvu wandje auhe.

⁴Oye ta hupitha ndje meso nota landula ndje nesilohenda nontalanteni ye.

⁵Ota kutitha ndje nuuwanawa we nota kaleke ndje nda nyashuka nda fa ontsa.

⁶Omuwa ota pangula pauyuuki, naathiminikwa ote ya popile.

⁷Okwa hololele Moses omadhiladhilo ge, Aaisraeli iilongankondo ye.

⁸Omuwa oye omunamutimahenda nomunalukeno, ohi idhidhimike mokugeya noku na ohole ihaayi lunduluka.

⁹Iha tamanana ethimbo kehe, ye iha kala a geya sigo aluhe.

¹⁰Ote tu geele, ngaashi twe shi ilongela, note tu pula pakuyona kwetu.

¹¹Ngaashi uule wokuza pevi okuya kegulu, osho sha tya uunene wohole ye kumboka haye mu simaneke.

¹²Ngaashi uuzilo u li kokule nuuninginino, osho ta kaleke kokule natse oondjo dhetu.

¹³Ngaashi aanona taa silwa ohenda kuhe, osho Omuwa ta sile ohenda mboka haye mu simaneke.

¹⁴Okwa tseya kutya otwa shitwa nashike; oku shi shi kutya otse ontsi yevi.

¹⁵Oshoka omasiku getu oga fa omwiidhi. Otatu nyanyukwa twa fa ongala yokelundu;

¹⁶ombepo sho ya tameke oku yi pepela, otayi si noitayi monika we.

¹⁷Ihe esilohenda lyOmuwa itali lunduluka kumboka haye mu simaneke, nuuwanawa we komaluvalo nomaluvalo

¹⁸okumboka haa dhiginine ehangano lye naamboka haa vulika kiipango ye.

¹⁹Omuwa oku li koshipangelapundi she megulu; ota pangele ayihe.

²⁰Hambeleleni Omuwa, ne aayengeli oofule naanankondo, mbo hamu fala omalombwelo ge nohamu vulika koohapu dhe.

²¹Hambeleleni Omuwa, ne oonakukala megulu; aapiya ye amuhe mbo hamu gwanitha ehalo lye.

²²Iishitwa ayihe nayi simaneke Omuwa, akuhe nkoka ku na epangelo lye. Mwenyo gwandje, hambelela Omuwa!