Read Oshindonga-Ombiimbeli Ondjapuki OMAPISALOMI 109 Bible Online

OMAPISALOMI 109 - Oshindonga-Ombiimbeli Ondjapuki bible

OMAPISALOMI 109

¹Episalomi lyaDavid Kalunga, otandi ku hambelele; ino mwena we!

²Aakaanakalunga naafundja oya ponokele ndje. Otaa lundile ndje

³notaa popi ndje nayi e taa kondeke ndje pwaa na etompelo.

⁴Otaa tondo ndje, nando ngame ondi ya hole nohandi ya galikanene.

⁵Ohaa shunithile ndje uuwinayi peha lyuuwanawa nuutondwe peha lyohole.

⁶Otaa ti: “Na kongelwe omupanguli omukolokoshi; etha gumwe gwomaatondi ye e mu tamaneke.”

⁷Ihe omukolokoshi ngoka na pangulwe e ta monika ondjo; omagalikano ge naga talike eyono.

⁸Omasiku ge naga hule po; omuntu gulwe na kuthe po iilonga ye.

⁹Oyana naa ninge oothigwa; nomukiintu gwe omuselekadhi!

¹⁰Oyana naa ninge omapongo gokuhehela owala; naa tidhwe mo momagumbo gawo!

¹¹Aanangunga ye naa ye neliko lye alihe, naayeni naa kuthe po iinima ye ayihe.

¹²Inaku kala nando ogumwe e na ohenda naye nenge a kwathe oothigwa ndho a thiga po.

¹³Oluvalo lwe aluhe nalu hule po, nedhina lye nali dhimbiwe kepipi tali landula.

¹⁴Omuwa ita dhimbwa uukeenakalunga woohekulu, ye ita dhimi po oondjo dhayina.

¹⁵Omuwa ota dhimbulukwa oondjo dhoohekulu, ihe aayoni yo yene ote ya dhimbwa thilu.

¹⁶Omuntu a tya ngawo iha dhiladhila okukala omunahenda; oha tidhagana ohepele, epongo nomunaluhodhi.

¹⁷Sho e hole okuthinga, naye na thingwe wo! Sho kee holele yakwawo uuwanawa, naye ina halelwa uuwanawa!

¹⁸Na zale ethingo ngaashi onguwo, nali mu tondoke ngaashi omeya nongaashi omagadhi momasipa.

¹⁹Nali mu kuwike ngaashi eguwo, ye ne li zale aluhe ngaashi epaya mombunda.

²⁰Omuwa, aatamaneki yandje ya geela pamukalo nguka, oomboka haa popile ndje muuwinayi.

²¹Omuwa Kalunga kandje, kwatha ndje pauvaneko lyoye; hupitha ndje omoluuwanawa wesilohenda lyoye.

²²Ngame ohepele nepongo; onde ehama unene muule womutima gwandje.

²³Otandi kana po mbala ngaashi omuzile gwokomatango otandi pepwa po ngaashi oombahu.

²⁴Oongolo dhandje odha nongwa, sho ndaa na iikulya; onda nanga omasipa gowala.

²⁵Aantu sho taa mono ndje, otaa yolo ndje, omolwokudhina ndje, otaa ipukapuka komitse.

²⁶Omuwa Kalunga kandje, kwatha ndje; hupitha ndje omolwesilohenda lyoye.

²⁷Ulukila aatondi yandje kutya ongoye omuhupithi gwandje.

²⁸Otaa thingi ndje, ihe ngoye oto yambeke ndje. Aatidhagani yandje otaa ka sithwa ohoni, ihe ngame, omupiya gwoye, otandi ka nyanyukwa.

²⁹Aatondi yandje naa gugwe; naa zale ohoni ngaashi eguwo.

³⁰Otandi pandula Omuwa notandi mu hambelele; otandi mu simaneke mokati kegongalo,

³¹oshoka ota popile ohepele note mu hupitha miikaha yaamboka ye mu pangulile eso.