Read Oshindonga-Ombiimbeli Ondjapuki OMAPISALOMI 119 Bible Online

OMAPISALOMI 119 - Oshindonga-Ombiimbeli Ondjapuki bible

OMAPISALOMI 119

¹Aanelago oomboka yaa na oshipo mokukala kwawo, oomboka haa vulika kompango yOmuwa.

²Aanelago oomboka haa dhiginine iipango ye, nohaye mu kongo noomwenyo adhihe.

³Ihaa puka nando; ohaa landula omautho ge.

⁴Omuwa, owe tu pe iipango yoye nowe tu lombwele, tu vulike kuyo.

⁵Ando nandi kale inaandi puka mokweenda kwandje, nandi vulike kiipango yoye!

⁶Ngele ohandi dhiginine iipango yoye, itandi ka sithwa ohoni.

⁷Otandi ilongo iipango yoye iiyuuki notandi ku hambelele nomwenyo gu uka.

⁸Onda hala okuvulika kiipango yoye; ino etha ndje.

⁹Omugundjuka oto opaleke ngiini okukala kwe, a kale a yela? Ongele ta vulika koohapu dhoye.

¹⁰Otandi ku kongo nomwenyo gwandje aguhe; ino etha ndi paguke mo miipango yoye.

¹¹Oohapu dhoye otandi dhi pungula momutima gwandje, opo ndaa yone kungoye.

¹²Omuwa, otandi ku hambelele; longa ndje omautho goye.

¹³Otandi tumbula mokule iipango yoye ayihe.

¹⁴Otandi nyanyukilwa okulandula iipango yoye shi vule okukala nuuyamba owindji.

¹⁵Onda hala okwiilonga omautho goye nokundhindhilika oondjila dhoye.

¹⁶Otandi nyanyukilwa iipango yoye; oohapu dhoye itandi dhi dhini.

¹⁷Kaleka ndje nawa, omuntu gwoye, opo ndi kale ndi na omwenyo e tandi vulika komalongo goye.

¹⁸Tonatitha omeho gandje, opo ndi vule okumona iikumitha yomompango yoye.

¹⁹Ngame omukwiilongo kombanda yevi; ino holeka ndje iipango yoye

²⁰Omwenyo gwandje ogu na ondjuulukwe onene; onda hala okutseya omapangulo goye.

²¹Oto ganda aainenepeki, aatangalali oto ya tula omutima.

²²Pegula ndje esheko nokudhinwa, oshoka ohandi dhiginine iipango yoye.

²³Aapangeli otaa gongala e taa ende ndje mevi, ihe ngame omuntu gwoye otandi dhiladhila iipango yoye.

²⁴Omalongo goye ogo enyangu lyandje, ogo aapukululi yandje.

²⁵Ondu umbilwa montsi yevi; tula ndje omwenyo pahapu dhoye.

²⁶Onda hempulula iilonga yandje, ongoye nowa yamukula ndje; longa ndje omautho goye.

²⁷Kwatha ndje, ndi uve ko iipango yoye, nena otandi ka dhiladhila iikumithalonga yoye.

²⁸Onda pwa po koluhodhi; tsa ndje omukumo pamauvaneko goye.

²⁹Keelela ndje mondjila ya puka, longa ndje iipango yoye moluuwanawa woye.

³⁰Onda hogolola okukala moshili nokwiitula miipango yoye.

³¹Onda dhama omalongo goye, Omuwa, ino etha ndje, ndi sithwe ohoni.

³²Onda hokwa okuvulika kiipango yoye, oshoka omuyo to pe ndje euvoko lya gwana.

³³Omuwa, longa ndje okutseya ehalo lyoye; onda hala okuvulika kulyo sigo aluhe.

³⁴Fatulululila ndje ompango yoye, ongame notandi yi dhiginine e tandi vulika kuyo nomwenyo aguhe.

³⁵Iipango yoye nayi wilike ndje; oshoka onde yi hokwa.

³⁶Hokitha ndje okuvulika komalongo goye, ndaa game kuuhalu weliko.

³⁷Keelela ndje, ndaa hokwe iinima yaa na oshilonga; pe ndje omwenyo pamauvaneko goye.

³⁸Gwanithila omupiya gwoye omauvaneko goye, opo u kale wa simanekwa.

³⁹Kandula po esheko nde li tila, oshoka iipango yoye iiwanawa.

⁴⁰Onda hala okuvulika kiipango yoye; pe ndje omwenyo, oshoka ongoye omuyuuki.

⁴¹Omuwa, ulukila ndje ohole yoye mpoka yi thike; hupitha ndje pamauvaneko goye.

⁴²Otandi yamukula ihe mboka taa sheke ndje, oshoka ondi inekela oohapu dhoye.

⁴³Kwatha ndje, ndi popye aluhe oshili, oshoka ondi inekela omapangulo goye.

⁴⁴Otandi inekele aluhe iipango yoye; eeno, aluhe sigo aluhe.

⁴⁵Otandi ke enda memanguluko, oshoka otandi ka vulika koohapu dhoye.

⁴⁶Iipango yoye otandi ke yi lombwela aakwaniilwa noitandi ka sithwa nando ohoni.

⁴⁷Onda hokwa iipango yoye nondi yi hole.

⁴⁸Iipango yoye ondi yi hole nohandi yi simaneke, ohandi dhiladhila omautho goye.

⁴⁹Dhimbulukwa oohapu dhoye ndho wa lombwele omuntu gwoye, oshoka odha pe ndje etegameno.

⁵⁰Etalaleko muuwehame wandje olyo omauvaneko goye taga pe ndje omwenyo.

⁵¹Aayinenepeki otaa sheke ndje aluhe, ihe ngame itandi gamuka ko kiipango yoye.

⁵²Omuwa, onda dhimbulukwa omapangulo goye gonale nonda mono ehekeleko.

⁵³Sho nda mono aakolokoshi taa yono iipango yoye, onda kwatwa kondjahi.

⁵⁴Iipango yoye oya ningi oshikalimo shondjimbo yandje mokukala kwandje kuundjendi.

⁵⁵Omuwa, uusiku ohandi dhiladhila edhina lyoye nohandi dhiladhila iipango yoye.

⁵⁶Mokudhiginina iipango yoye onda adha mo enyanyu lyandje.

⁵⁷Omuwa, ongoye eliko lyandje. Otandi uvaneke okuvulika koohapu dhoye.

⁵⁸Otandi ku kongo nomwenyo gwandje aguhe; sila ndje ohenda pamauvaneko goye.

⁵⁹Onda tala omikalo dhandje notandi ukitha oonkatu dhandje komautho goye.

⁶⁰Otandi uluma mbala okuvulika kiipango yoye.

⁶¹Aakaanakalunga nando oya tule ndje moonkandja, itandi ka dhimbwa iipango yoye.

⁶²Otandi penduka uusiku, ndi ku hambelelele omapangulo goye gu uka.

⁶³Ngame onda ningi kuume kaamboka haye ku simaneke, nokaayehe mboka haa vulika kiipango yoye.

⁶⁴Omuwa, evi olyu udha esilohenda lyoye; longa ndje iipango yoye.

⁶⁵Kaleka ndje nawa, omuntu gwoye, pamauvaneko goye.

⁶⁶Pe ndje oondunge nomatseho, oshoka ondi itaala iipango yoye.

⁶⁷Manga inaandi geelwa, ondi li nda puka, ihe ngashingeyi otandi vulika kiipango yoye.

⁶⁸Ngoye omunesilohenda noho longo uuwanawa; longa ndje iipango yoye.

⁶⁹Aayinenepeki nando taa fundjaleke ndje, iipango yoye otandi yi dhiginine nomwenyo aguhe

⁷⁰Oyo aayikukutiki, ye na omaiyuvo ga sa, ihe ngame onda hokwa iipango yoye.

⁷¹Okugeelwa okwa li kwo opalela ndje, oshoka okwi ilongitha ndje iipango yoye.

⁷²Ompango ndjoka we yi gandja, oyi na ondilo kungame yi vule iimaliwa oyindji.

⁷³Owa shiti ndje niikaha yoye; pe ndje omayele, opo ndi ilonge iipango yoye.

⁷⁴Mboka haye ku simaneke, naa nyanyukwe, sho taa tala ndje, oshoka ondi inekela oohapu dhoye.

⁷⁵Omuwa, ondi shi shi kutya omapangulo goye ogu uka, nowa geele ndje, oshoka ou shi kwiinekelwa.

⁷⁶Esilohenda lyoye nali hekeleke ndje, ngaashi wu uvanekele ndje, omuntu gwoye.

⁷⁷Esilohenda lyoye nali siikile ndje, opo ndi kale ndi na omwenyo, oshoka onda hokwa ompango yoye.

⁷⁸Aayinenepeki naa sithwe ohoni, oshoka otaa hepeke ndje pwaa na etompelo lyasha.

⁷⁹Mboka haye ku simaneke, naye ye kungame, oomboka ya tseya iipango yoye.

⁸⁰Nandi vulike kiipango yoye, opo ndaa sithwe ohoni.

⁸¹Omuwa, onda loloka nonda tegelela, u hupithe ndje; ondi inekela oohapu dhoye.

⁸²Omeho gandje oga vulwa, notandi yuulukwa egwanitho lyomauvaneko goye. Uunake to hekeleke ndje?

⁸³Onda fa ompunda yomaviinu yi li molwithi, ihe ite dhimbwa iipango yoye.

⁸⁴Sigo uunake ndi na okutegelela? Uunake to ka pangula aatidhagani yandje?

⁸⁵Aayinenepeki otaa fulile ndje omakelo, naashika osha tsa ondumbo nompango yoye.

⁸⁶Iipango yoye ayihe oyi shi kwiinekelwa; kwatha ndje, oshoka aantu otaa tidhagana ndje owala.

⁸⁷Konyala ya dhipage ndje, ihe ngame itandi etha iipango yoye.

⁸⁸Hupitha ndje molwesilohenda lyoye, ngame notandi vulika kiipango yoye.

⁸⁹Omuwa, oohapu dhoye odhaaluhe; otadhi kala dha kola sigo aluhe.

⁹⁰Uudhiginini woye otau kala sigo okoluvalo noluvalo; owa eta po evi nolya thikama.

⁹¹Pahapu dhoye iinima ayihe otayi kala po, oshoka otayi vulika kungoye,

⁹²Ando onda li inaandi hokwa ompango yoye, ando nda si po nale komahepeko.

⁹³Omalongo goye itandi ga dhimbwa, oshoka omugo nda mono omwenyo.

⁹⁴Hupitha ndje, oshoka ngame omuntu gwoye. Nonda hala okuvulika kiipango yoye.

⁹⁵Aayinenepeki otaa tegele ndje omwigo, ya yone ndje po, ihe ngame otandi ilongo iipango yoye.

⁹⁶Onda mono kutya kehe oshinima oshi na ehulilo lyasho, ihe iipango yoye otayi kala sigo aluhe.

⁹⁷Ompango yoye ondi yi hole ngiini! Ohandi yi dhiladhila esiku alihe.

⁹⁸Iipango yoye otayi ndungike ndje ndi vule aatondi yandje, oshoka ondi yi na aluhe.

⁹⁹Ondi na euvoko ndi vule aanongeki yandje ayehe, oshoka ohandi dhiladhila omalongo goye.

¹⁰⁰Ondi na omayele ndi vule aakuluntu kungame, oshoka ohandi vulika komautho goye.

¹⁰¹Ondi ikeelele okulonga uuwinayi, opo ndi vulike koohapu dhoye.

¹⁰²Inandi dhina omalongo goye, oshoka ongoye mwene we ga longo ndje.

¹⁰³Oohapu dhoye oontoye ngiini kelaka lyandje! Odho oontoyelela dhi vule omagadhi goonyushi.

¹⁰⁴Otandi likola oondunge miipango yoye, onkee otandi tondo uugoyoki.

¹⁰⁵Oohapu dhoye odho onyeka mokweenda kwandje, nuuyelele mondjila yandje.

¹⁰⁶Otandi dhiginine euvaneko lyandje, otandi vulika kiipango yoye iiyuuki.

¹⁰⁷Omuwa, onda hepekwa nayi; tula ndje omwenyo, ngaashi wu uvaneke.

¹⁰⁸Omuwa, taamba egalikano nepandulo lyandje, ngoye u longe ndje ompango yoye.

¹⁰⁹Otandi teneneke aluhe omwenyo gwandje, ihe itandi dhimbwa iipango yoye.

¹¹⁰Aakaanakalunga otaa tegele ndje omwigo, ihe ngame itandi gamuka ko komalongo goye.

¹¹¹Iipango yoye oyo uuthiga wandje sigo aluhe, oyo enyanyu momutima gwandje.

¹¹²Onda hala okuvulika kiipango yoye sigo aluhe.

¹¹³Oonakulya oompanda mbali ohandi ya tondo, ihe ondi hole ompango yoye.

¹¹⁴Ongoye eshigo negameno lyandje; otandi inekele oohapu dhoye.

¹¹⁵Aakolokoshi ne, zii po pungame, opo ndi dhiginine iipango yaKalunga kandje!

¹¹⁶Kwatha ndje pamauvaneko goye, notandi ka kala ndi na omwenyo. Ino etha ndi sithwe ohoni, sho nde ku inekela.

¹¹⁷Yambula ndje po, e tandi hupu; otandi ka dhiladhila aluhe iipango yoye.

¹¹⁸Oto ekelehi ayehe mboka haa yono iipango yoye, oshoka iifundja yawo itayi ya kwatha sha.

¹¹⁹Aakaanakalunga ayehe yokombanda yevi, oto ya ekelehi ngaashi omange giiyela, onkee ngame ondi hole iipango yoye.

¹²⁰Olutu lwandje aluhe otalu kakama; onde ku tila omolwomapangulo goye.

¹²¹Onda longo shoka shu uka nosho opala; ino gandja ndje miikaha yaahepeki yandje.

¹²²Popila omupiya gwoye, a kale nawa; ino etha aadhudhu ya hepeke ndje.

¹²³Omeho gandje otaga yuulukwa ekwatho lyoye, otandi tegamene omauvaneko goye ge shi kwiinekelwa.

¹²⁴Ningila omuntu gwoye pasilohenda; longa ndje iipango yoye.

¹²⁵Ngame omupiya gwoye, pe ndje omatseho, opo ndi uve ko nawa omalongo goye.

¹²⁶Omuwa, ethimbo lya thiki, u shi ninge, oshoka ompango yoye otayi yonwa.

¹²⁷Ngame ondi hole iipango yoye shi vule oshingoli, eeno, oshi vule oshingoli sha hogololwa.

¹²⁸Onkee otandi kala momautho goye agehe gu uka notandi tondo uugoyoki.

¹²⁹Omalongo goye ogo omakumithi, onkee otandi vulika kugo.

¹³⁰Efatukuluko lyoohapu dhoye otali gandja uuyelele; otali longo ngoka kee na oondunge.

¹³¹Otandi ekama e tandi hetha, oshoka onda yuulukwa iipango yoye.

¹³²Tala ndje, u sile ndje ohenda, ngaashi ho shi ningile mboka ye ku hole.

¹³³Gamena ndje pamauvaneko goye; ino etha uulunde u pangele ndje.

¹³⁴Hupitha ndje miikaha yaathiminiki yandje, opo ndi vule okuvulika komalongo goye.

¹³⁵Minikila ndje nuuyelele woye. Nowu longe ndje iipango yoye.

¹³⁶Omilonga dhomahodhi otadhi tondoka momeho gandje, oshoka aantu itaa dhiginine iipango yoye.

¹³⁷Omuwa, ngoye omuyuuki, niipango yoye oyu uka.

¹³⁸Omautho goye ogo omayuuki; oga kola ga kolelela.

¹³⁹Onda geya unene, oshoka aatondi yandje oya dhina oohapu dhoye.

¹⁴⁰Omauvaneko goye ogo omawanawa, nomupiya gwoye oku ga hole.

¹⁴¹Nando ngame onda dhinika, itandi dhimbwa nando omalongo goye.

¹⁴²Uuyuuki woye owaaluhe, nompango yoye oyoshili.

¹⁴³Uudhigu nuumbanda owa adha ndje, ihe iipango yoye otayi nyanyudha ndje.

¹⁴⁴Omalongo goye ogo omayuuki sigo aluhe; longa ndje oondunge, ndi kale ndi na omwenyo.

¹⁴⁵Omuwa, otandi ku galikana nomwenyo aguhe; uva ndje, notandi ka vulika kiipango yoye.

¹⁴⁶Otandi ku galikana, hupitha ndje; otandi dhiginine omalongo goye.

¹⁴⁷Ohandi meneka tandi galikana notandi ku kugile ekwatho; ondi inekela omauvaneko goye.

¹⁴⁸Uusiku auhe otandi lala nda tonata notandi dhiladhila oohapu dhoye.

¹⁴⁹Omuwa, uva egalikano lyandje pasilohenda lyoye; kaleka ndje nomwenyo pamautho goye.

¹⁵⁰Aatidhagani yandje aadhudhu oye li popepi, ihaa dhiginine iipango yoye.

¹⁵¹Ihe ngoye, Omuwa, ou li popepi nangame, niipango yoye ayihe oyoshili.

¹⁵²Nonale onda tseya kutya omalongo goye owe ga tula po, ga kale po sigo aluhe.

¹⁵³Tala uudhigu wandje, u hupithe ndje, oshoka inandi dhimbwa iipango yoye.

¹⁵⁴Gamena ndje e to popile ndje; hupitha ndje, ngaashi wu uvaneke.

¹⁵⁵Ehupitho oli li kokule naakaanakalunga, oshoka ihaa vulika kiipango yoye.

¹⁵⁶Omuwa, olukeno lwoye olwo olunene; sila ndje ohenda e to hupitha ndje.

¹⁵⁷Ondi na aatondi naatidhagani oyendji, ihe itandi etha okuvulika kiipango yoye.

¹⁵⁸Aagwaaleki mbono otandi ya nyanyala, oshoka ihaa vulika koohapu dhoye.

¹⁵⁹Omuwa, tala nkene ndi hole omalongo goye; hupitha ndje pasilohenda lyoye.

¹⁶⁰Oohapu dhoye adhihe odhoshili; omapangulo goye agehe ogu uka nogaaluhe.

¹⁶¹Aanankondo otaa tidhagana ndje pwaa na etompelo lyasha, ihe ngame otandi simaneke iipango yoye.

¹⁶²Otandi nyanyukilwa omauvaneko goye ongaashi omumoni gweliko.

¹⁶³Ohandi tondo nohandi nyanyala iifundja, ihe ompango yoye onde yi hokwa.

¹⁶⁴Otandi ku hambelele luheyali mesiku omolwomapangulo goye omayuuki.

¹⁶⁵Mboka ye ku hole, oye na ombili, nokaku na shoka tashi ya pukitha.

¹⁶⁶Omuwa, onda tegelela u hupithe ndje; otandi vulika kiipango yoye.

¹⁶⁷Otandi vulika komalongo goye, oshoka onde ga hokwa unene.

¹⁶⁸Otandi vulika komautho nokiipango yoye, oshoka okukala kwandje akuhe ou ku shi.

¹⁶⁹Omuwa, onkugo yandje nayi thike koshipala shoye; pe ndje omayele pamauvaneko goye.

¹⁷⁰Uva omagalikano gandje; hupitha ndje pamauvaneko goye.

¹⁷¹Otandi ku hambelele aluhe, oshoka oto longo ndje iipango yoye.

¹⁷²Otandi tanga omalongo goye, oshoka iipango yoye ayihe oyo iiyuuki.

¹⁷³Kala aluhe popepi nangame, u kwathe ndje, oshoka onda hala okuvulika kiipango yoye.

¹⁷⁴Omuwa, onda yuulukwa ekwatho lyoye; iipango yoye oyo enyanyu lyandje.

¹⁷⁵Kaleka ndje nomwenyo, opo ndi ku simaneke; iipango yoye nayi kwathe ndje.

¹⁷⁶Onda puka nda fa onzi ya kana; konga omupiya gwoye, oshoka iipango yoye inandi yi dhimbwa.