Read Oshindonga-Ombiimbeli Ondjapuki OMAPISALOMI 132 Bible Online

OMAPISALOMI 132 - Oshindonga-Ombiimbeli Ondjapuki bible

OMAPISALOMI 132

¹Omuwa, dhimbulukwa David nomaudhigu agehe ngoka a li nago.

²Oye oku uvanekele Omuwa nokwa popi nokugana kOmunankondo, Kalunga kaJakob, a ti:

³“Itandi ka ya megumbo lyandje nenge ndi ye mondunda yandje, ndi ka kothe.

⁴Itandi ka etha, ndi kwatwe koomposi nenge ndi thithikile,

⁵manga inaandi monena Omuwa omutumba, ehala lyokukala Omunankondo, Kalunga kaJakob.”

⁶Oshikethahangano otwe shi kundana, manga shi li muEfrata; otwe shi mono momalundu gaJaar.

⁷Ileni, tu yeni kongulu yOmuwa; ileni, tu tseni oongolo poompadhi dhe.

⁸Thikama, Omuwa, u ye kehala lyoye lyokuvululukilwa. Ila noshikethahangano, endhindhiliko lyoonkondo dhoye.

⁹Aayambi yoye naa longe shoka shu uka, naantu yoye naa imbe nokunyanyukwa.

¹⁰Molweuvaneko ndyoka we li pe omuntu gwoye David, ino ekelahi omukwaniilwa ngoka we mu gwayeke.

¹¹Omuwa oku uvanekele David euvaneko itaali lunduluka a ti: “Gumwe gwomaamwoye otandi ke mu langeka koshipundi shuukwaniilwa woye.

¹²Aamwoye ngele otaa dhiginine ehangano lyandje niipango nde yi ya nongeke, nena oyana otaa ke ku landula muukwaniilwa aluhe sigo aluhe.”

¹³Omuwa okwa hogolola Sion; okwa hala shi kale omutumba gwe ta ti:

¹⁴“Ndika olyo ehala lyandje lyokukala aluhe; onda hala okukala muka nokupangela.

¹⁵Otandi yambeke Sion niilikolomwa yasho; oohepele dhamo otandi ke dhi pa eloolo.

¹⁶Aayambi yamo otandi ke ya etela ehupitho, naantu yandje otaa ki imba nokunyanyukwa.

¹⁷Otandi ka koleka uukwaniilwa waDavid, noluvalo lwe otalu ka ya koshipundi she shuukwaniilwa.

¹⁸Aatondi ye otandi ke ya sitha ohoni, ihe oshishani otashi ka adhima komutse gwe.”