Read Oshindonga-Ombiimbeli Ondjapuki OMAPISALOMI 145 Bible Online

OMAPISALOMI 145 - Oshindonga-Ombiimbeli Ondjapuki bible

OMAPISALOMI 145

¹Eimbilohambelelo lyaDavid Otandi ku simaneke Kalunga, omukwaniilwa gwandje; otandi tanga edhina lyoye aluhe sigo aluhe.

²Onda hala oku ku pandula esiku kehe nonda hala okutanga edhina lyoye aluhe sigo aluhe.

³Omuwa oye omunene a gwana okusimanekwa; uunene we otau nyengana okuyelekwa.

⁴Iilonga yoye otayi tangwa komapipi nomapipi; otaga hokolola iilongankondo yoye.

⁵Otaga uvitha esimano noonkondo dhoye, nangame wo otandi dhiladhila iilonga yoye iikumithi.

⁶Aantu otaa ka hokolola iilongankondo yoye; ngame otandi ka uvitha iilonga yoye iinene.

⁷Otaa ka tanga uuwanawa woye owindji notaa ki imba nokunyanyukilwa uuyuuki woye.

⁸Omuwa oye omunamutimahenda nomunalukeno, omutalanteni noku udha ohole.

⁹Omuwa oku na ombili naantu ayehe, oku na ohenda naayihe mbyoka e yi shita.

¹⁰Omuwa, eshito lyoye alihe otali ku simaneke; aantu yoye otaye ku tanga.

¹¹Otaa hokolola esimano lyepangelo lyoye notaa uvitha oonkondo dhoye,

¹²opo aantu ya tseye iilongankondo yoye nesimano lyoshilongo shoye.

¹³Epangelo lyoye otali kala aluhe, nangoye oto kala omukwaniilwa sigo aluhe. Omuwa ota dhiginine omauvaneko ge, noku hole iishitwa ye ayihe.

¹⁴Omuwa ota yambula po aapunduki nota pendutha po mboka yi ihata po.

¹⁵Omeho gaayihe otage ku ligamene; ongoye noto yi pe oondya pethimbo.

¹⁶Oto kamununa eke lyoye e to kutitha iinamwenyo ayihe kesilohenda lyoye.

¹⁷Omuwa oye omuyuuki miilonga ye ayihe, noku hole iishitwa ye ayihe.

¹⁸Omuwa oku li popepi naayehe mboka taye mu ithana, naamboka taye mu galikana moshili.

¹⁹Mboka haye mu simaneke, ote ya pe ashihe shoka ye shi pumbwa, notu uvu omaindilo gawo e te ya hupitha.

²⁰Omuwa ota gamene ayehe mboka ye mu hole, ihe aakaanakalunga ayehe ote ya dhimi po.

²¹Nandi hambelele aluhe Omuwa; iishitwa ayihe nayi simaneke edhina lye eyapuki aluhe sigo aluhe.