Read Oshindonga-Ombiimbeli Ondjapuki OMAPISALOMI 147 Bible Online

OMAPISALOMI 147 - Oshindonga-Ombiimbeli Ondjapuki bible

OMAPISALOMI 147

¹Halleluja! Hambeleleni Omuwa! Osho opala okuhambelela Kalunga ketu; oshu uka oku mu imbila omahambelelo.

²Omuwa ota tungulula Jerusalem; ota gongele aapongekwa yaIsrael.

³Ota aludha mboka ye ehamekwa koomwenyo, nota manga iilalo yawo.

⁴Otu utha omwaalu gwoonyothi note dhi ithana komadhina.

⁵Omuwa gwetu oye omunene nomunankondo; oondunge dhe kadhi shi kuyelekwa.

⁶Ota yambula po aaishonopeki, ihe aakaanakalunga ote ya shundula.

⁷Imbileni Omuwa omahambelelo; hikileni Kalunga ketu uuhumba.

⁸Eyalelo ote li siikile niikogo; evi ote li lokithile omvula nota kokitha omwiidhi komalundu.

⁹Ota palutha iimuna, osho wo uudhilakolagona uuna tau lili.

¹⁰Omuwa ina panda nande oonkondo dhuukambe noina hokwa uufule waakwiita,

¹¹ihe okwa hokwa mboka haye mu tila noku mu simaneka naamboka haa inekele esilohenda lye.

¹²Jerusalem, simaneka Omuwa! Sion, hambelela Kalunga koye!

¹³Oye ta koleke omiyelo dhoye nota yambeke aantu yoye.

¹⁴Ota gamene oongamba dhoye note ku kutitha niikulya iitoye.

¹⁵Ota gandja omalombwelo kombanda yevi, noohapu dhe otadhi uvika mbala.

¹⁶Ota lokitha olumi lwa fa omahegele gomongwa nota gundu ombambi ngaashi omutoko.

¹⁷Otu umbu oompawe ngaashi omamanya. Olye ta vulu okwiitakeka uutalala wombambi?

¹⁸Ihe kelombwelo lye olumi otalu hemuka; ngele ta pepitha ombepo ompyu, omeya otaga tameke oku kunguluka.

¹⁹Ota tseyithile Jakob oohapu dhe nota hololele Israel iipango nomautho ge.

²⁰Shika ine shi ningila iigwana yilwe, mbyoka inaayi tseya iipango ye. Halleluja!