Read Oshindonga-Ombiimbeli Ondjapuki OMAPISALOMI 17 Bible Online

OMAPISALOMI 17 - Oshindonga-Ombiimbeli Ondjapuki bible

OMAPISALOMI 17

¹Egalikano lyaDavid Omuwa, pulakena ndje; sho te indilile uuyuuki; gameka okutsi kwoye kokulila kwandje! Pulakena, sho tandi ku indile nomwenyo gu uka.

²Oto uthile ndje okwaanuusama, oshoka ou shi shoka shu uka.

³Ongoye wa tseya omutima gwandje, oho ya kungame uusiku; owa konakona ndje nawa, ihe ino mona ndje uuwinayi.

⁴Ihandi popi uukolokoshi, ngaashi yalwe haa ningi; onda dhiginine okulandula omautho goye, noinandi landula oondjila dhuupwidhi.

⁵Onda dhiginine okweenda mondjila yoye, noonkatu dhandje inadhi puguma mo.

⁶Kalunga, otandi ku galikana, oshoka oto uvu ndje; gameka okutsi kwoye kungame, u pulakene oohapu dhandje.

⁷Holola ohole yoye onkumithi, ngu u tu hupithe; opungoye tatu holama aatondi yetu.

⁸Gamena ndje ongomuni yeho lyoye; holeka ndje momuzile gwomawawa goye,

⁹ndaa adhike komahomono gaakolokoshi. Aatondi yandje aadhipagi ohaa kondeke ndje;

¹⁰oyo kaye na olukeno notaa popi oohapu dhiilundo.

¹¹Ngashingeyi oya kondeka ndje koombinga adhihe ya tega ompito yokunukila ndje.

¹²Oyo taa langele ndje ya fa onime ya hala okutuulagula ndje.

¹³Ila, Omuwa, kondjitha aatondi yandje, u ya sinde! Hupitha ndje miikaha yaakolokoshi negongamwele lyoye;

¹⁴hupitha ndje mwaamboka ye na ashihe shoka ya pumbwa muuyuni mbuka. Ya geela nuudhigu mboka we ya pungulila. Egeelo nali gwanene oyana ko naku kale lyaana yoyana yawo.

¹⁵Ihe ngame otandi ke ku mona, oshoka inandi longa sha sha puka; nongele te penduka, okukalapo kwoye otaku nyanyudha ndje.