Read Oshindonga-Ombiimbeli Ondjapuki OMAPISALOMI 21 Bible Online

OMAPISALOMI 21 - Oshindonga-Ombiimbeli Ondjapuki bible

OMAPISALOMI 21

¹Episalomi lyaDavid Omuwa, omukwaniilwa okwa nyanyukwa, sho we mu pe oonkondo; ota hambelele, sho we mu ningi omusindani.

²Owe mu pe shoka omutima gwe gwa yuulukwa, owa yamukula omaindilo ge.

³Owe ya kuye nomayambeko ogendji nowe mu zaleke oshishani shoshingoli komutse.

⁴Okwa pula, a kale e na omwenyo nowe gu mu pe, omwenyo omule nogwaaluhe.

⁵Kekwatho lyoye esimano lye olya ningi enene; owe mu pe esimano netumbalo.

⁶Omayambeko goye otage mu landula sigo aluhe nokukalapo kwoye otaku mu nyanyudha.

⁷Omukwaniilwa oti inekele Omuwa Omunankondoawike; ota kala megameno, oshoka Omuwa oku mu hole aluhe.

⁸Omukwaniilwa ota ka kwata po aatondi ye ayehe; ota ka ya nakehe gumwe e mu tonde.

⁹Ote ke ya hanagula po, ngaashi omulilo hagu ningi. Omuwa ote ke ya thekeka po mondjahi ye, nomulilo otagu ya li po.

¹⁰Kape na nando ogumwe gwomoyana ta ka hupa po; omukwaniilwa ote ke ya dhipaga po ayehe.

¹¹Oyo taa ningi oompangela dhawo e taye mu kundathana meholamo, ihe omadhiladhilo gawo itaga ka pita.

¹²Oye te ya yaha niikuti ye e taa fadhuka po.

¹³Omuwa, otatu ku simaneke moluunene woonkondo dhoye! Otatu imbi e tatu simaneke oonkondo dhoye.