Read Oshindonga-Ombiimbeli Ondjapuki OMAPISALOMI 25 Bible Online

OMAPISALOMI 25 - Oshindonga-Ombiimbeli Ondjapuki bible

OMAPISALOMI 25

¹Episalomi lyaDavid Otandi ku indile, Omuwa;

²Kalunga kandje, onde ku inekela. Ino ethela ndje mohoni yesindiko; aatondi yandje yaa shi nyanyukilwe.

³Mboka taa ku inekele, itaa sindika, kakele kaamboka taa ku iteka nziya.

⁴Omuwa, longa ndje oondjila dhoye; dhi yelithila ndje.

⁵Longa ndje okukala moshili yoye, oshoka ongoye Kalunga kandje, omuhupithi gwandje. Ngame onde ku inekela aluhe.

⁶Omuwa, dhimbulukwa olukeno nohole yoye yaaluhe, ndjoka we yi holola nale.

⁷Dhimina ndje po oondjo nomapuko gomuugundjuka. Dhimbulukwa ndje, Omuwa, omoluuwanawa nomolwohole yoye onene.

⁸Omuwa oye omuyuuki nomwaanawa, aalunde ote ya longo ondjila ndjoka ye na oku yi landula.

⁹Aayishonopeki ote ya tula mondjila yu uka note ya longo okutseya ehalo lye.

¹⁰Nuudhiginini nohole ote enditha ayehe mboka haa dhama ehangano lye nohaa vulika kiipango ye.

¹¹Omuwa, dhima po oondjo dhandje pauvaneko lyoye, oshoka odhindji.

¹²Mboka haa vulika kOmuwa, ote ya longo ondjila ndjoka ye na oku yi landula.

¹³Oyo taa kala aluhe ye li nawa noyana otaa ka thigulula evi.

¹⁴Omuwa okuume kaamboka haa vulika kuye nota koleke ehangano nayo.

¹⁵OkOmuwa nda tala aluhe, ku zile ndje ekwatho, noye ta hupitha ndje moshiponga.

¹⁶Omuwa, tala ndje, u sile ndje ohenda, oshoka ondi li muuwike nonda sa uunkundi.

¹⁷Kutha ndje iimpwiyu, ngu u hupithe ndje muudhigu wandje auhe.

¹⁸Tala ndje, nkene nda ziyalala nonda ngonwa, ngu u dhime po oondjo dhandje adhihe.

¹⁹Tala aatondi yandje mpo ye thike; tala, nkene ye tonde ndje.

²⁰Gamena ndje, ngu u hupithe ndje; ino etha, ndi sindike. Opungoye te kongo egameno.

²¹Uuyuuki nuunoshili wandje nau popile ndje, oshoka onde ku inekela.

²²Kalunga, hupitha Aaisraeli muudhigu wawo auhe!