Read Oshindonga-Ombiimbeli Ondjapuki OMAPISALOMI 27 Bible Online

OMAPISALOMI 27 - Oshindonga-Ombiimbeli Ondjapuki bible

OMAPISALOMI 27

¹Episalomi lyaDavid Omuwa oye uuyelele nomuhupithi gwandje; itandi tila nando olye. Omuwa ota gamene ndje kiiponga ayihe; itandi mbandama.

²Aakolokoshi ngele taa ponokele ndje noya hala okudhipaga ndje, otaa punduka e taa gwile po.

³Nonando etanga lyaakwiita li kondeke ndje, itaa vulu okutilitha ndje. Nonando aatondi yandje ya matukile ndje, natango otandi inekele Kalunga,

⁴Omuwa onde mu indile ompumbwe yimwe; ondi na oshinima shimwe ashike nde shi hala: okukala mongulu yOmuwa okukalamwenyo kwandje akuhe, okunyanyudhwa kuuwanawa we nokupula ewiliko lye.

⁵Methimbo lyuudhigu ota shigi ndje; ota gamene ndje motempeli ye e ta londeke ndje kemanya ele.

⁶Aatondi mbono ya kundukidha ndje, otandi ke ya sinda. Nokwiimba ekandanga, otandi ke etela Omuwa omayambo motempeli ye; otandi ki imba te hambelele Omuwa.

⁷Omuwa, uva ndje, sho tandi ku ithana! Sila ndje ohenda e to yamukula ndje!

⁸Sho wa ti: “Ileni, mu simaneke ndje,” ngame onda yamukula: “Otandi ya, Omuwa;

⁹ino holeka ndje oshipala shoye!” Ino geela ndje; ino tidha po omuntu gwoye. Noshito owa kala ekwatho lyandje; ino etha ndje, ngoye ino thiga ndje po, Kalunga, omuhupithi gwandje.

¹⁰Tate nameme otaa vulu okweetha ndje, ihe Omuwa ota sile ndje oshimpwiyu.

¹¹Omuwa, longa ndje okulandula ehalo lyoye, enditha ndje nondjila yaa na iiponga, oshoka ondi na aatondi oyendji.

¹²Ino ethela ndje miikaha yaamboka ye tonde ndje, mboka taa ponokele ndje niifundja nomatilitho.

¹³Ondi shi shi kutya ote kala ndi na omwenyo nokumona uuwanawa wOmuwa mokukalamwenyo huka kwongashingeyi.

¹⁴Inekela Omuwa. Itaala, ino limbililwa. Inekela Omuwa.