Read Oshindonga-Ombiimbeli Ondjapuki OMAPISALOMI 30 Bible Online

OMAPISALOMI 30 - Oshindonga-Ombiimbeli Ondjapuki bible

OMAPISALOMI 30

¹Eimbilo lyeyapulo lyOtempeli; Episalomi lyaDavid Omuwa, otandi ku hambelele, sho wa hupitha ndje, nowa keelele aatondi yandje, yaa yole ndje.

²Onde ku lilile ekwatho, Omuwa Kalunga kandje, e to aludha ndje;

³owa hili ndje mombila. Onda li nda mbolokela muule mwi, ihe owa ningi ndje ishewe omunamwenyo.

⁴Hambeleleni Omuwa, ne aainekelwa ye amuhe! Dhimbulukweni iilonga yOmuyapuki, ne mu mu simaneke!

⁵Ondjahi ye oyokathimbo kowala, ihe uuwanawa we otau kalelele. Ongulohi omahodhi otaga tondoka, ihe ongula otaku holoka enyanyu.

⁶Ondi wete ndi li megameno nonda ti: “Itandi ka sindika nando olumwe.”

⁷Omuwa, owa hololele ndje uuwanawa; owa koleke ohote yandje. Opo ihe owi iholeke ndje, ngame nonda haluka.

⁸Omuwa, otandi ku ithana; otandi ku indile ekwatho:

⁹“Eso lyandje otali ku likolitha shike? Okuya kwandje mombila otaku ku pe ontanitho? Aasi otaa vulu tuu oku ku simaneka? Otaa vulu tuu okuhokolola uudhiginini woye?

¹⁰Uva ndje, Omuwa, ngu u sile ndje ohenda! Omuwa, kwatha ndje!”

¹¹Oondjila dhandje owe dhi shitukitha oondjimbo dhenyanyu; owa kodheke oluhodhi lwandje nowa nyanyudha ndje.

¹²Onkee ano itandi mwena; otandi ku hambelele. Omuwa, ongoye Kalunga kandje, otandi ku pandula sigo aluhe.