Read Oshindonga-Ombiimbeli Ondjapuki OMAPISALOMI 31 Bible Online

OMAPISALOMI 31 - Oshindonga-Ombiimbeli Ondjapuki bible

OMAPISALOMI 31

¹Episalomi lyaDavid Omuwa, otandi ya kungoye okukonga egameno; ino etha, ndi sindike. Ongoye Kalunga omuyuuki; otandi galikana, hupitha ndje.

²Uva ndje! Hupitha ndje ngashingeyi! Kala epopilongulu lyokugamena ndje nohote yokuhupitha ndje.

³Ongoye eshigo negameno lyandje; wilika, ngu u endithe ndje ngaashi wu uvaneke.

⁴Gamena ndje, ndaa yulwe nomwigo gwa tegelwa ndje; keelela ndje koshiponga.

⁵Otandi igameke kungoye. Omuwa, ongoye to hupitha ndje; ongoye Kalunga omudhiginini.

⁶Ou tonde mboka haa simaneke iikalunga, ihe ngame onde ku inekela.

⁷Otandi nyanyukwa nokutanta omolwesilohenda lyoye. Ou wete okuhepekwa kwandje nowa tseya uudhigu wandje.

⁸Aatondi yandje ino ya pitika ya kwate ndje; owa pe ndje emanguluko, ndi ye shaa mpo nda hala.

⁹Omuwa, sila ndje ohenda, oshoka ondi li muudhigu. Omeho gandje oga vulwa kokulila nonda pwa po kuudhigu.

¹⁰Onda lolokithwa kiimpwiyu, nokulila okwa shonopeke omasiku gandje. Uudhigu owa nameke ndje, nomasipa gandje wo otaga thipuka.

¹¹Aatondi yandje ayehe, naashiinda, otaa yolo ndje. Aashiwikile yandje oya tila ndje; ngele taa mono ndje mepandaanda, otaa yi ndje ontuku.

¹²Ayehe oya dhimbwa ndje, ongo nda sa; onda fa oshiyagaya showala.

¹³Onda pupa omanongono ogendji gaatondi; etilitho olya kunduka ndje. Otaa kundathana okukondjitha ndje notaa uvanene okudhipaga ndje.

¹⁴Ihe ngame ondi inekela Omuwa; ongoye Kalunga kandje.

¹⁵Ondi li aluhe meke lyoye; hupitha ndje miikaha yaatondi yandje, noyaamboka haa tidhagana ndje.

¹⁶Tala nonteni omuntu gwoye; hupitha ndje molwesilohenda lyoye.

¹⁷Omuwa, otandi ku ithana; ino etha, ndi sithwe ohoni. Aadhudhu oyo naa sithwe ohoni; naa thenunukile moshaasi.

¹⁸Mweneka aafundja mbo — aanuuntsa naaitumbaleki mbo haa nyana aayuuki.

¹⁹Uuwanawa woye ou thike peni! Owe u pungulila mbo haa ku simaneke nowe u longekidhila mboka ye ku inekela montaneho yaantu.

²⁰Oho ya holeke megameno lyokukalapo kwoye, ya gamenwe koompangela dhaakolokoshi; oto ya edhilile mondunda ya patekeka, ya kale kokule nomasheko gaatondi yawo.

²¹Hambeleleni Omuwa! Ohole ye onkumithi ngiini, ndjoka e yi hololele ndje, sho nda li nda kundukidhwa kaatondi!

²²Onda li nda tila nonda dhiladhila kutya Omuwa okwe etha ndje. Ihe nani oku uvu okulila kwandje, sho nde mu pula ekwatho.

²³Holeni Omuwa, ne mboka hamu mu inekele. Omuwa ota gamene aayinekeli ye, e ta geele aainenepeki, ngaashi ye shi ilongela.

²⁴Ikoleleni, ne mu kale nomukumo, amuhe mbo mu na etegameno mOmuwa.