Read Oshindonga-Ombiimbeli Ondjapuki OMAPISALOMI 34 Bible Online

OMAPISALOMI 34 - Oshindonga-Ombiimbeli Ondjapuki bible

OMAPISALOMI 34

¹Episalomi lyaDavid, sho a zi puAbimelek Onda hala aluhe okupandula Omuwa; itandi hulitha oku mu hambelela.

²Otandi mu hambelelele iilonga ye; aathiminikwa ayehe naa pulakene e taa nyanyukwa.

³Uvitheni pamwe nangame uunene wOmuwa; tu simanekeni atuheni edhina lye.

⁴Onda galikana Omuwa, oye nokwa yamukula ndje; okwa kutha ndje uumbanda auhe.

⁵Aathiminikwa otaa itula puye e taa nyanyukwa; itaa thigilwa nando ofogo.

⁶Omapongo otage mu ithana, oye note ga yamukula; ote ya hupitha moothina dhawo adhihe.

⁷Omuyengeli gwOmuwa ota tonatele mboka haa vulika kOmuwa note ya hupitha moshiponga.

⁸Konakona mwene, u mone, nkene Omuwa omwaanawa. Aanelago oomboka taa mono egameno puye.

⁹Vulikeni kOmuwa, aantu ye amuhe; mbo haa vulika kuye, oye na ashihe ye shi pumbwa.

¹⁰Oonime wo ohadhi hepa iikulya, ihe mboka haa vulika kOmuwa, oye na uukali auhe.

¹¹Aagundjuka, ileni, pulakenii ndje, ngame notandi mu longo okusimaneka Omuwa.

¹²Owa hala okukalamwenyo okuwanawa? Owa hala omwenyo omule nelago?

¹³Gamuka kokupopya uuwinayi nokokuhokolola oohapu dhiifundja.

¹⁴Etha uukolokoshi e to longo uuwanawa; lalakanena ombili, ngu u yi kondjele.

¹⁵Omuwa oha tonatele aayuuki noha pulakene okulila kwawo;

¹⁶ihe oku tonde mbo haa longo uukolokoshi, onkee ano, uuna taa mana oondjenda, otaa dhimbiwa mbala.

¹⁷Aayuuki otaa ithana Omuwa, oye notu uvu ko; ote ya hupitha muudhigu wawo auhe.

¹⁸Omuwa oku li popepi naamboka ya dhengwa pevi; ota hupitha mbo ya kanitha etegameno.

¹⁹Omuyuuki ota tsakanekwa kuudhigu owindji, ihe Omuwa ote mu hupitha muwo.

²⁰Omuwa ote mu shigi nawa lela; kape na nando olimwe lyomomasipa ge tali teywa.

²¹Uukolokoshi otau li omuningi gwawo; mbo ye tonde omuyuuki otaa ka geelwa.

²²Omuwa ota hupitha aantu ye; ota popile mbo taa kongo egameno puye.