Read Oshindonga-Ombiimbeli Ondjapuki OMAPISALOMI 38 Bible Online

OMAPISALOMI 38 - Oshindonga-Ombiimbeli Ondjapuki bible

OMAPISALOMI 38

¹Episalomi lyaDavid, ondjimbolela Omuwa, ino ganda ndje mekehuko, ngoye ino geela ndje wa sa ondjahi.

²Owa yaha ndje niikuti yoye; owa thindile ndje pevi.

³Omolwondjahi yoye ngame ondi li muuwehame uunene; olutu lwandje aluhe olwa pwa po kuuwehame woondjo dhandje.

⁴Otandi sile meyelu lyoondjo dhandje; odho omutenge omudhigu okuhumbata.

⁵Omoluugoya wandje omathina gandje oga nika nogo ola.

⁶Onda dhengwa, nda dhengelelwa; tandi lili esiku alihe.

⁷Onda pembekwa kekithi nondi li popepi nokusa.

⁸Onda dhengwa, nda pwa po thilu; otandi tongo kuuwehame momutima gwandje.

⁹Omuwa, owa tseya shoka nde shi yuulukwa; ohu uvu okutonga kwandje akuhe.

¹⁰Omutima gwandje otagu dhenge, oonkondo dhandje odha pwa po, nomeho gandje oga kanitha eadhimo.

¹¹Ookuume naashiinda yandje itaa hedha ndje we popepi omolwomathina gandje; nooyakwetu oya tameke okukala ndje kokule.

¹²Mbo ya hala okudhipaga ndje, otaa tege ndje noomwigo, naambo ya hala okwaalula ndje, otaa kongo ehulopo lyandje noihaa mwena okweenda ndje mevi.

¹³Ihe ngame onda fa omuthitamatsi noitandi uvu sha, nongomuthitawi, ite popi.

¹⁴Onda fa omuntu itaa yamukula, oshoka itu uvu sha.

¹⁵Ihe ngame onde ku inekela, Omuwa, ngoye Omuwa, Kalunga kandje, oto yamukula ndje.

¹⁶Ino etha aatondi yandje, ya yole okuhepa kwandje; ino ya etha, yu uvile uuntsa okupunduka kwandje!

¹⁷Ngame ondi li pokugwila po; ondi na uuvu waaluhe.

¹⁸Otandi hempulula oondjo dhandje; odha lindimaneka omwenyo gwandje.

¹⁹Aatondi yandje oyo aandjolowele noye na uukolele. Ope na oyendji ye tonde ndje pwaa na etompelo.

²⁰Mbo haa galulile ndje uuwinayi peha lyuuwanawa, oya tsa ondumbo nangame, oshoka ohandi kambadhala okulonga uuwanawa.

²¹Omuwa, ino etha ndje; Kalunga kandje, ino kala ndje kokule!

²²Kwatha ndje ngashingeyi, Omuwa, omuhupithi gwandje.