Read Oshindonga-Ombiimbeli Ondjapuki OMAPISALOMI 45 Bible Online

OMAPISALOMI 45 - Oshindonga-Ombiimbeli Ondjapuki bible

OMAPISALOMI 45

¹Oshitewo kezimo lyaKora; Eimbilo lyohole Iitya iiwanawa oyi li komutima gwandje, mokutotela omukwaniilwa ondjimbo ndjika. Ongopena yomunyoli onkulungu, elaka lyandje oli na nale oshitewo.

²Ngoye ependa mokati komakanda agehe; ngoye omupopi onkulungu. Kalunga okwe ku yambeka aluhe.

³Homata egonga lyoye, ndjayi omunankondo; ngoye omunene nowa simana.

⁴Osheendo shomukwaniilwa nashi adhe esindano okupopila oshili nuuyuuki! Oonkondo dhoye otadhi ku pe esindano ekumithi.

⁵Iikuti yoye oya tsa, otayi tyuula momitima dhaatondi yoye; iigwana otayi ihata poompadhi dhoye.

⁶Epangelo ndyoka Kalunga e ku pe, otali kala sigo aluhe. Oto pangele aantu yoye nuuyuuki,

⁷ou hole shoka shu uka nou tonde uuwinayi. Onkee Kalunga, Kalunga koye, e ku hogolola nokwe ku tilile eyambeko olindji, u vule omukwaniilwa kehe.

⁸Omigwayo dha nika nawa odha tilwa koonguwo dhoye; aayimbi otaye ku imbile moombala dha polekwa nomasipa goondjamba.

⁹Mokati kaakiintu aambala omu na aakadhona, aana yaakwaniilwa. Kolulyo lwoshipangelapundi shoye okwa thikama omunyekadhi, a zala omakwilika goshingolielela.

¹⁰Mufuko gwomukwaniilwa, pulakena sho te ti — dhimbwa yaandjeni naakweni.

¹¹Eopalo lyoye otali ku hokitha komukwaniilwa; oye omuwa gwoye, ou na okuvulika kuye.

¹²Aatiro otaa ku etele oombalagelo; aayamba otaa kambadhala oku ku heka neliko.

¹³Omuna gwokombanda omukadhona oku li mombala nokwo opala ngiini! Omuzalo gwe ogwa tungwa noondali dhoshingoli.

¹⁴Momuzalo gwe guulenga oye mu fala pomukwaniilwa, a landulwa kiinkumbi ye, nayo wo oya falwa pomukwaniilwa.

¹⁵Oya li ya nyanyukwa taa ligola e taa ningine mombala yomukwaniilwa.

¹⁶Ndjayi yandje, oto ka mona aamwoyemati, ya pingene oohekulu muukwaniilwa, noto ke ya kwaniileka kombanda yevi alihe.

¹⁷Ondjimbo yandje otayi taandelitha esimano lyoye sigo aluhe, nakehe gumwe ote ke ku simaneka momathimbo gokomeho.