Read Oshindonga-Ombiimbeli Ondjapuki OMAPISALOMI 48 Bible Online

OMAPISALOMI 48 - Oshindonga-Ombiimbeli Ondjapuki bible

OMAPISALOMI 48

¹Episalomi lyezimo lyaKora; eimbilo Omuwa oye omunene, i ilongela okusimanekwa moshilando shaKalunga ketu, kondundu ye ondjapuki.

²Sion, ondundu yaKalunga, oyo onde noyo opala; oshilando shomukwaniilwa omunene otashi nyanyudha uuyuni auhe.

³Kalunga okwa holola kutya puye opu na egameno meni lyomapopilongulu goshilando.

⁴Aakwaniilwa oya gongala, ye ya okumatukila ondundu Sion.

⁵Ihe sho ya mono oshilando, oya kumwa; oya tila e taa fadhuka po.

⁶Oya adhika kuumbanda nokehaluko ngaashi omusimba e li pokuvala,

⁷nongoosikepa tadhi telaganithwa koshikungulu oshidhigu.

⁸Otu uvu shoka Kalunga a longo, nongashingeyi otwe shi mono moshilando shaKalunga, Omuwa Omunankondoawike; ota gamene oshilando she sigo aluhe.

⁹Motempeli yoye, Kalunga, otatu dhimbulukwa esilohenda lyoye.

¹⁰Oto hambelelwa kaakuuyuni ayehe, edhina lyoye otali itaandelitha kombanda yevi alihe. Oto pangele nuuyuuki.

¹¹Aasioni ayehe naa nyanyukwe! Omapangulo goye ogu uka; ondigolo nayi kale miilando yaJuda.

¹²Aantu ne yaKalunga, dhingolokeni Sion, ne mu yalule ooshungo dhasho.

¹³Konekeni omakuma ne mu tale omapopilongulu, opo mu ka hokololele oluvalo lwokonakuyiwa:

¹⁴“Kalunga ketu oye nguka aluhe sigo aluhe; oye te ke tu enditha nomethimbo tali ya.”