Read Oshindonga-Ombiimbeli Ondjapuki OMAPISALOMI 50 Bible Online

OMAPISALOMI 50 - Oshindonga-Ombiimbeli Ondjapuki bible

OMAPISALOMI 50

¹Episalomi lyaAsa Omuwa Kalunga Omunankondoawike ota popi; oti ithana evi alihe okuza kuuzilo sigo okuuninginino.

²Uuyelele waKalunga otau zi muSion, moshilando sho opala, sho opalelela.

³Kalunga ketu ote ya, ihe ite ende a mwena; omulilo hagu lungunitha otagu mu tetekele, nomalaka gomulilo oge mu kundukidha.

⁴Oti ithana egulu nevi, ga ninge oonzapo oku mu tala, sho ta pangula aantu ye.

⁵Oye ta ti: “Ileni kungame, aantu yandje aainekelwa, mbo mwa dhike ehangano nangame mokuyambela ndje omayambo.”

⁶Ewangandjo otali hokolola kutya Kalunga oye omuyuuki, oshoka oye mwene omupanguli.

⁷“Aantu yandje, pulakeneni, ongame tandi popi; Israel, otandi ku tamaneke. Ongame Kalunga, Kalunga koye.

⁸Itandi ku nyenyetelele omayambo goye nomafikilondjambo ngoka ho etele ndje aluhe.

⁹Ngame itandi pumbwa oondumetana dhomoohambo dhoye nenge iikombo yomiigunda yoye.

¹⁰Iithitukuti ayihe oyandje, osho wo iimuna kiikulundundu yomayuvi.

¹¹Oondhila adhihe dhomiihwa odhandje niinamwenyo ayihe yokelundu.

¹²Ngele ando ondi niwe kondjala, itandi shi ku lombwele, oshoka uuyuni naashihe shi li mo, oshandje.

¹³Ohandi li tuu onyama yoondumetana nenge ndi nwe ombinzi yiikombo?

¹⁴Pa Kalunga koye omayambo gomapandulo, gwanithila Omunankondoawike omauvaneko goye.

¹⁵Ithana ndje esiku lyuudhigu woye; ngame otandi ku hupitha, ngoye e to simaneke ndje.”

¹⁶Ihe komukolokoshi Kalunga ota ti ngeyi: “Omolwashike to tumbula iipango yandje? Oto popile shike ehangano lyandje?

¹⁷Oho tindi, ndi ku pukulule; oho ekelehi omalombwelo gandje.

¹⁸Oho panga uukuume nomufuthi ngo to tsakaneke noho itula kumwe naahondeli.

¹⁹“Okana kwoye otaku popi aluhe uukolokoshi; iho fudha inoo popya iifundja.

²⁰Aamwanyoko oto ya tamaneke naana yanyoko oto ya pe uusama.

²¹Owa longo ayihe mbika, ihe ngame inandi tya sha. Owa dhiladhila kutya onde ku fa. Ihe ngashingeyi otandi ku nyenyetele notandi ku ulukile epuko lyoye.

²²“Ne mboka hamu dhini ndje, pulakeneni, opo ndaaye mu yone po, nokaku na we ngoka te mu hupitha.

²³Omapandulo ogo omayambo gokusimaneka ndje, notandi ka hupitha ayehe mbo haa vulika kungame.”