Read Oshindonga-Ombiimbeli Ondjapuki OMAPISALOMI 51 Bible Online

OMAPISALOMI 51 - Oshindonga-Ombiimbeli Ondjapuki bible

OMAPISALOMI 51

¹Episalomi lyaDavid, konima omuprofeti Natan sho a popi naye molwepunduko lyawo naBatseba Kalunga, sila ndje ohenda omoluuwanawa woye owindji. Dhima po oondjo dhandje omolwesilohenda lyoye enene.

²Yoga ndje uuwinayi wandje auhe, ngu u thete po ondjo yandje.

³Omayono gandje onde ga dhimbulula; oondjo dhandje odhi li aluhe momeho gandje.

⁴Okungoye awike nda yono, nonda ningi shoka ho shi tondo. Onkee ano ino puka, sho to pangula ndje; oshu uka, sho to geele ndje.

⁵Ngame omulunde okuza kevalo, okuza kesiku ndyoka nda valelwa muuyuni.

⁶Ngoye oto pula, ndi kale moshili; pe ndje omadhiladhilo ge na oondunge.

⁷Kutha po ondjo yandje, ndi kale nda yogekeka; yoga ndje, ndi kale nda yela ndi vule oonguwo oontokele.

⁸Pulakenitha ndje omawi genyanyu nogeligolo; nonando wa dhenge ndje nokudhengelela, otandi ka nyanyukwa natango.

⁹Isiikila, waa tale oondjo dhandje, dhima po omayono gandje agehe.

¹⁰Kalunga, shitila ndje omutima omuyogoki, ngu u tule meni lyandje ombepo ompe noyevuliko.

¹¹Ino kutha ndje po koshipala shoye; ngoye ino kutha ndje Ombepo yoye ondjapuki.

¹²Pe ndje natango enyanyu lyomehupitho lyoye, ngoye u ninge ndje omuvuliki.

¹³Nena aalunde otandi ke ya longa okuvulika kiipango yoye, notaa ka galukila kungoye.

¹⁴Kalunga, omuhupithi gwandje, keelela ndje ndaa dhipagwe, notandi ka hokolola nenyanyu uuyuuki woye.

¹⁵Omuwa, makula okana kandje, e tandi ku hambelele.

¹⁶Omayambo ito ga pumbwa, ando nde ge ku pe; omafikilondjambo ino ga hokwa.

¹⁷Kalunga, ombepo yi ishonopeka oyo eyambo lyandje, omutima gwi itedhulula ito gu ekelehi.

¹⁸Kalunga, sila Sion ohenda, ngu u mu kwathe; tungulula omakuma gaJerusalem.

¹⁹Nena oto ka nyanyukilwa omayambo gu uka nomafikilondjambo getu. Oondumetana otadhi ka yambelwa koshiyambelo shoye.