Read Oshindonga-Ombiimbeli Ondjapuki OMAPISALOMI 55 Bible Online

OMAPISALOMI 55 - Oshindonga-Ombiimbeli Ondjapuki bible

OMAPISALOMI 55

¹Oshitewo shaDavid Kalunga, uva egalikano lyandje; ino pilamena eindilo lyandje!

²Pulakena e to yamukula ndje; onda namekwa kiimpwiyu yandje.

³Onda mbandamekwa komatilitho gaatondi, onda thindilwa pevi komathiminiko gaakolokoshi. Otaye etele ndje uudhigu; oya geela ndje noye tonde ndje.

⁴Onda tilithwa, nomahalutho geso otaga thindi ndje.

⁵Onda kwatwa ketilo nokekakamo, uumbanda owa tono ndje.

⁶Ando onda li nomawawa ngaashi onguti, ando ote tuka, ndi ka konge evululuko.

⁷Onda hala okutukila kokule nokutungila egumbo mombuga.

⁸Onda hala ndi ikongele nziya epopilongulu, ndaa dhengwe kombepo nokoshikungulu.

⁹Omuwa, piyaganeka okupopya kwaatondi yandje!

¹⁰Moshilando ondi wete mo eyugo niipotha tayi shi kunduka omutenya nuusiku, oshu udha uudhudhu nuupyakadhi.

¹¹Akuhe oku na eyonuuko; omapandaanda ogu udha ethiminiko nekotokelo.

¹²Ando okwa li omutondi gwandje a sheke ndje, ando onda vulu oku shi idhidhimikila; ngele ando omukondjithi gwandje ti inenepekele ndje, ando ote vulu oku mu holama.

¹³Ihe ngo te shi ningi, okuume kandje hatu kala naye, omwiinekelwa.

¹⁴Moonkundathana, otwa li hatu egululilathana omitima notwa galikana pamwe motempeli.

¹⁵Eso nali kuthe po aatondi yandje, ethimbo manga inaali thika; naa kulukile mbala mehala lyaasi ye na omwenyo! Uuwinayi ou li momagumbo gawo nomomitima dhawo.

¹⁶Ihe ngame ote pula ekwatho kOmuwa Kalunga, oye nota hupitha ndje.

¹⁷Omayemato nomakemo gandje otaga thiki kuye ongula, omutenya nuusiku, oye notu uvu ewi lyandje.

¹⁸Oye ta galula ndje nombili kolugodhi, sho nda li te kondjitha aatondi oyendji.

¹⁹Kalunga ngoka a kala omupangeli okuza nalenale, ota ka uva ndje e te ya sindi; oshoka otaa tindi okwiitedhulula noihaye mu tila.

²⁰Kuume kandje konale okwa kondjitha ookuume ke; ina gwanitha omauvaneko ge.

²¹Oohapu dhe odhi na omuthenu gu vule gwomagadhi, ihe oku na uutondwe momutima; iitya ye oyi na omuheka, ihe otayi tete ya fa omagonga ga tsa.

²²Uudhigu woye u fala kOmuwa, oye te ku popile; ihe etha aayuuki ya sindike.

²³Ihe ngoye Kalunga oto hulitha po aadhipagi naafundja mboka, manga etatakati lyokukalamwenyo kwawo inaali thika. Ihe ngame onde ku inekela.