Read Oshindonga-Ombiimbeli Ondjapuki OMAPISALOMI 57 Bible Online

OMAPISALOMI 57 - Oshindonga-Ombiimbeli Ondjapuki bible

OMAPISALOMI 57

¹Episalomi lyaDavid konima yepandela lyaSaul lya zi mekololo Kalunga, sila ndje ohenda, sila ndje ohenda, oshoka okungoye tandi kongo egameno. Otandi holama momuzile gwomawawa goye, sigo iikungulu iidhigu tayi kodha.

²Otandi ithana Kalunga gwokombandambanda, Kalunga ngo ha gwanithile ndje oompumbwe adhihe.

³Oye ta yamukula ndje e li megulu e ta hupitha ndje; ota sindi aathiminiki yandje. Kalunga ota hololele ndje esilohenda lye nuudhiginini we.

⁴Onda kondekwa kaatondi, mbo ya fa oonime dha fukila onyama yomuntu. Omayego gawo oga fa oomwele niikuti; omalaka gawo oga fa omagonga ga tsa.

⁵Kalunga, holola uunene woye kegulu nesimano lyoye kombanda yevi alihe.

⁶Aatondi yandje oyu umbu oshiyulitho shokuyula ndje; onda tonwa kuudhigu. Oyo ya fulile ndje ekelo mondjila, ihe oya gwile mo yo yene.

⁷Kalunga, ngame ondi na einekelo lya kola; otandi imbi e tandi ku simaneke!

⁸Mwenyo gwandje, penduka! Okaharpa nokashandja kandje, imba! Onda hala okupendutha etango.

⁹Omuwa, otandi ku pandula mokati kiigwana. Otandi ku simaneke mokati kaakuuyuni.

¹⁰Ohole yoye yaa na ndjele, oya tsa kegulu; uudhiginini woye otau thiki keyalelo.

¹¹Kalunga, holola uunene woye kegulu nesimano lyoye kombanda yevi alihe.