Read Oshindonga-Ombiimbeli Ondjapuki OMAPISALOMI 62 Bible Online

OMAPISALOMI 62 - Oshindonga-Ombiimbeli Ondjapuki bible

OMAPISALOMI 62

¹Episalomi lyaDavid Onda tegelela neidhidhimiko, Kalunga a hupithe ndje; oye awike ndi inekela.

²Oye awike ta gamene ndje e ta hupitha ndje; oye omupopili gwandje, noitandi ka sindika nando.

³Sigo uunake ne amuhe tamu kondjitha omuntu gumwe, ngoka oshimbembe a fa olukutu lwa kulupa?

⁴Otamu kundathana okuhulitha po esimano lye; omu hole iifundja. Momakana otamu tumbula omayambeko, ihe momitima otamu sheke.

⁵Omwenyo gwandje, omuKalunga amuke to mono evululuko; omuye awike u na etegameno.

⁶Oye awike ta gamene ndje nota hupitha ndje. Oye epopilongulu lyandje, ite sindika.

⁷Ehupitho lyandje nesimano lyandje oli li muKalunga; oye emanya lyandje lya kola nepopilongulu lyandje.

⁸Aantu ne, inekeleni aluhe Kalunga. Anekeni omaudhigu geni koshipala she, oshoka oye omupopili gwetu.

⁹Aanenentu naathigona ayehe oyo omufudho gwowala; ayehe kaye na po sha. Ya tula koshiyelekitho, ayehe kape na sha; ayehe omufudho gwowala.

¹⁰Ino inekela okulwa omakumbu; ino inekela iinima ya yugwa; nando uuyamba woye tau tana, ino tula mo omwenyo gwoye.

¹¹Olwindji ondu uvu Kalunga ta popi ta ti, oye Kalunga omunankondo,

¹²oye Omuwa omunahole. Eeno, ota futu kehe omuntu shi thike piilonga ye.