Read Oshindonga-Ombiimbeli Ondjapuki OMAPISALOMI 66 Bible Online

OMAPISALOMI 66 - Oshindonga-Ombiimbeli Ondjapuki bible

OMAPISALOMI 66

¹Episalomi lyaDavid; Eimbilo Aantu amuhe, hambeleleni Kalunga!

²Tangeni esimano lyedhina lye; mu simanekeni nokuhambelela!

³Tyeni kuKalunga: “Iilonga yoye iikumithi ngiini! Oonkondo dhoye odho oonene, sho aatondi yoye taye ku tsile oongolo ya tila.

⁴Kehe shimwe kombanda yevi otashi isizimike kungoye; otayi ku imbile ehambelelo notayi simaneke edhina lyoye.”

⁵Ileni, mu tale iilonga yaKalunga, iikumitha ye mokati kaantu.

⁶Okwa lundulula efuta, li ninge evi ekukutu; ootate oya taaguluka omulonga kolupadhi. Otse otwa nyanyukilwa iilonga ye.

⁷Epangelo lye otali kala sigo aluhe; omeho ge otaga tongolola iigwana. Oonakwaavulika itaa vulu okutsa ondumbo naye.

⁸Aantu ne, simanekeni Kalunga ketu; omaimbilo gepandulo naga uvike.

⁹Okwe tu kaleke nomwenyo nokwe tu gamene twaa punduke.

¹⁰Kalunga, owe tu yeleke; ngaashi oshisiliveli hashi yelithwa momulilo.

¹¹Owe tu ethele momwigo nowe tu tsike omitenge omidhigu koothingo dhetu.

¹²Owe etha aatondi ye tu lyatagule; otwa piti momulilo nomomeya, ihe owe tu eta kehala lyomahupilo.

¹³Otandi eta omafikilondjambo kotempeli yoye; otandi ku gwanithile omauvaneko gandje.

¹⁴Otandi ku pe ngaashi nda popile, sho nda li muudhigu.

¹⁵Otandi ku yambele iimuna yo ondoka pamwe noonzi; otandi ku pe oondumetana niikombo — olwithi lu uke pombanda.

¹⁶Ileni, pulakeneni amuhe mboka hamu tila Kalunga. Otandi mu lombwele shoka Kalunga e shi ningile ndje.

¹⁷Otandi mu kugile ekwatho; otandi mu hambelele noondjimbo.

¹⁸Ando onda li nda mwenena oondjo dhandje inaandi dhi hempulula, ando Omuwa ina uva ndje.

¹⁹Ihe Kalunga oku uva ndje; oku uva egalikano lyandje.

²⁰Otandi hambelele Kalunga, sho inaa tinda eindilo lyandje, ye a kale ando itaa sile ndje ohenda.