Read Oshindonga-Ombiimbeli Ondjapuki OMAPISALOMI 68 Bible Online

OMAPISALOMI 68 - Oshindonga-Ombiimbeli Ondjapuki bible

OMAPISALOMI 68

¹Episalomi lyaDavid; Eimbilo Kalunga okwa thikama nokwa tidha po aatondi. Mboka haa tsu ondumbo naye, naa ye ontuku.

²Ya pepa po, ngaashi olwithi talu yi ombepo; ongaashi ezi tali hemukithwa komulilo, osho aakolokoshi taa kana po koshipala she.

³Ihe aayuuki otaa shambukwa notaa nyanyukwa koshipala shaKalunga; otaa ligola e taa tanta.

⁴Imbileni Kalunga, imbeni nokusimaneka edhina lye; longekidheni epola lyaanguka he ende miikogo. Omuwa olyo edhina lye — nyanyukweni koshipala she.

⁵Kalunga oye he yoothigwa nomugameni gwaaselekadhi; oye a kala mehala lye eyapuki.

⁶Oye ta pe omapongo omagumbo, ota piitha mo oonkwatwa e te ya pe emanguluko, ihe oonakwaavulika otaa ka kala mevi lya lokota komutenya.

⁷Kalunga, owa kwatele komeho aantu yoye, sho we ende nayo mombuga.

⁸Evi olya kakama, negulu olya lokitha omvula omolwokuholoka kwaKalunga puSinai, eholoko lyaKalunga kaIsrael.

⁹Kalunga, owa gandja omvula ya gwana; owa mwenyeke evi lya li lya kukuta.

¹⁰Aantu yoye oye li lala; eeno, Kalunga, molunza luuyamba woye owa pe mo oohepele.

¹¹Omuwa okwa gandja oshipango naakiintu oyendji oya ningi aayuvithi

¹²“Aakwaniilwa naakwiita yawo otaa yi ontuku.” Aakiintu momagumbo otaa topola oshihakanwa:

¹³iifetha yoonguti dha kolongithwa oshisiliveli, nomawawa gadho taga tayima oshingolilela, omanga yamwe yomuyo ye li mokati koonzi.

¹⁴Kalunga Omunankondoawike sho a halakanitha aakwaniilwa mbeya, osha li sha fa oompawe tadhi loko kondundu Salmon.

¹⁵Ondundu Baasha oya tumbalala, ondundu yomitse omile!

¹⁶Ne oondundu dhomitse odhindji, omolwashike mwa sila efupa ondundu ndjoka Omuwa Kalunga a hogolola a kale ko sigo aluhe?

¹⁷Omatembakwiita gaKalunga ogo omayuvi ogendji; Omuwa okwa zi kuSinai e te ya motempeli ye ondjapuki.

¹⁸Sho a yi kombandambanda, okwa faalele oonkwatwa; okwa pewa oombalagelo kaantu nokoonakwaavulika wo — Omuwa Kalunga oko ta ka kala aluheluhe.

¹⁹Esimano nali pewe Omuwa Kalunga, omuhupithi gwetu; ngoka ta humbata omaudhigu getu esiku kehe.

²⁰Kalunga ketu oye Kalunga ha hupitha; Omuwa ngoka te tu hupitha meso.

²¹Kalunga ota ka keka ko omitse dhaatondi ye, odhaamboka taa tsikile okuyona kwawo.

²²Omuwa okwa ti: “Aatondi yeni otaye ke mu galukila taa zi kuBaasha, kohi yefuta otii ya kutha ko,

²³opo mu ke ende mombinzi yaatondi yeni, manga oombwa dheni tadhi shakumine ombinzi yawo.”

²⁴Kalunga, omusholondondo gwoye ogu wetike; osheendo shaKalunga, omukwaniilwa gwandje, oshu uka muuyapuki we.

²⁵Komeholela oku na aaimbi, taku landula aahiki yuuhumba, pamwe nayo aakadhona aahiki yoontunda.

²⁶Simanekeni Kalunga megongalo lyaantu ye; hambeleleni Omuwa megongalo lyaIsrael.

²⁷Ezimo enkelo lyaBenjamin olyo lye ya kwatela komeho, opo ihe aana yokombanda yaJuda pamwe nongundu yawo, notaku landula aana yokombanda yaSebulon naNaftali.

²⁸Kalunga, holola oonkondo dhoye; ulika oonkondo dhoye ngaashi shito.

²⁹Dhi holola motempeli yoye muJerusalem, moka aakwaniilwa taa ku etele omagano.

³⁰Ganda Egipiti, oshilikama shoka mokati komanenge, oshigunda shoontsezi mokati kuutaagona! Ayihe ngele yi igandja, otayi ke ku tsila oongolo e tayi ku pe oshisiliveli. Halakanitha aantu mbo ye hole okuhinga iita.

³¹KuEgipiti otaku zi aatumwa; Aaetiopia otaa ka yelutha omaako nokugalikana Kalunga.

³²Imbileni Kalunga, omapangelo gokombanda yevi, simanekeni Omuwa!

³³Oonguka te ende miikogo, mewangandjo lyonalenale; uveni ngu ta ndunduma newi enene.

³⁴Uvitheni oonkondo dhaKalunga; uunene we ou li kombanda yaIsrael, oonkondo dhe odhu udha ewangandjo.

³⁵Kalunga, ongoye omutilithi motempeli yoye; Kalunga kaIsrael ota gandja oonkondo nomukumo kaantu ye. Kalunga na simanekwe!