Read Oshindonga-Ombiimbeli Ondjapuki OMAPISALOMI 69 Bible Online

OMAPISALOMI 69 - Oshindonga-Ombiimbeli Ondjapuki bible

OMAPISALOMI 69

¹Episalomi lyaDavid Kalunga, hupitha ndje, oshoka omeya oga tsa ndje pothingo.

²Otandi ningine menono, nokaku na oshilyatelelo. Onde ya puule womeya; efundja olya kondeka ndje.

³Onda vulwa kokwiithana ekwatho omuligu gwandje ogwa thita. Omeho gandje otaga nyengwa okumona Kalunga kandje.

⁴Mbo ye tonde ndje pwaa na etompelo, oye vule omwaalu gwomafufu gokomutse gwandje. Oyendji oya ningi aatondi yandje, nando inandi ya ninga sha; oya hala okudhipaga ndje. Otandi thiminikwa okufuta shoka inaandi shi yaka.

⁵Kalunga, omayono gandje inage ku holekwa; omapuko gandje owe ga tseya.

⁶Mboka ye na etegameno lyawo mungoye, inaa sithwa ohoni molwandje, Omuwa Omupangeliawike nOmunankondoawike. Mboka haye ku kongo, inaa sithwa ohoni molwandje, Kalunga kaIsrael!

⁷Oshoka ondi idhidhimikile esheko omolwoye nonda humbata esithohoni.

⁸Onda ningi ondjendi mokati kaamwatate, omukwiilongo mokati kaana yameme.

⁹Oshoka uulaadhi omolwongulu yoye otau thiminike ndje, nomasheko gaambo haa ku sheke, oga gwile ndje.

¹⁰Uuna ndi ifupipike nokwiidhilika, nena aantu oya sheke ndje;

¹¹uuna nda zala ehahi lyokuholola oluhodhi, aantu oya yolo ndje.

¹²Mbo ya kuutumba peelo lyegumbo, otaa sheke ndje, nonda ningi eimbilo lyoonkolwi.

¹³Ihe ngame otandi ku indile, Omuwa, yamukula ndje pethimbo lye ku opalela. Kalunga, omolwohole yoye onene yamukula ndje, oshoka ongoye omuhupithi.

¹⁴Hupitha ndje montopo; nakula ndje miikaha yaambo ye tonde ndje, hupitha ndje momeya omale.

¹⁵Ino etha efundja li siikile ndje; ino etha omeya ga ninginithe ndje nenge olumbogo lu ekamene ndje okana kalwo.

¹⁶Omuwa, yamukula ndje omolwohole yoye; tala ndje omolwesilohenda lyoye enene.

¹⁷Omupiya gwoye ino mu pilamena; yamukula ndje mbala, ondi li muudhigu.

¹⁸Hedha ndje popepi, u hupitha ndje; hupitha ndje omolwaatondi yandje.

¹⁹Owa tseya, nkene nda shekwa, nda fupipikwa nonda sithwa ohoni. Aatondi yandje ayehe oye li montaneho yoye.

²⁰Esheko olya hende omutima gwandje, olya thigi ndje ndaa na omukwathi; onda tegelele omunalukeno, ihe ine mona; kapu na omuhekeleki.

²¹Oya tulile ndje onyango miikulya, sho nda li nda sa ondjala; noya pe ndje omaviinu omalulu, sho nda sa enota.

²²Omatelekela gawo nage ya etele epunduko, noondjambo dhawo nadhi ya fale meyonuuko.

²³Tsikitha omeho gawo! Andalaleka oombunda dhawo sigo aluhe!

²⁴Tilila ondjahi yoye kombanda yawo; ongeyo yoye nayi ya hwamene.

²⁵Oontanda dhawo nadhi tembukiwe, mootenda dhawo inamu pitikwa mu kale nando olye.

²⁶Oshoka ohaa tidhagana ngo wa geela; ohaa nyanyukilwa omeehamo gaangoka we mu nyanyagula.

²⁷Kaleka oondjo dhawo membo lyoye, ngoye ino ya mangulula.

²⁸Naa dhimwe mo membo lyaanamwenyo noino ya yalulila membo lyaayuuki.

²⁹Ondi na uuwehame nonda kanitha omukumo; Kalunga, hupitha ndje ngu u gamene ndje.

³⁰Otandi ka simaneka edhina lyaKalunga notandi mu pandula noku mu hambelela.

³¹Shika otashi hokiwa kOmuwa shi vule omayambo giimuna, oshi vule eyambo lyoondumetana.

³²Aathiminikwa otaa uvu ondjimbo yandje e taa nyanyukwa; oonakukugila ekwatho kuKalunga otaa mono omukumo.

³³Omuwa ohu uvu omaindilo goohepele, ye iha dhimbwa oonkwatwa moondholongo.

³⁴Egulu nevi nali mu simaneke, naashihe hashi inyenge momafuta.

³⁵Oshoka Omuwa ota hupitha Jerusalem nota ka tungulula iilando yaJuda. Nena aantu ye otaa ka tula mo e taye shi lala.

³⁶Aana yaapiya ye otaa ke shi thigulula, naamboka ye hole edhina lye, otaa ka kala mo.